إسماعيلي إس سي - i s m a i l y S C - فجأة ( موسيقي تصويرية ) ...أصبح كولومبيا

فجأة ( موسيقي تصويرية ) ...أصبح كولومبيا

حجم الخط Decrease font Enlarge font
image

علي طريقة كلام خارج المقرر ... كل من كان في ملعب المقاولون العرب , انتظارا للمباراة الودية مع الدراويش

.. كان بيحاول يعرف اي اخبار عن الوافد الافريقي علي الفريق. هل هو غاني او نيجيري او ايفواري .. لكن فجأة .. اصبح كولومبيا

قبل ما الموقع الرسمي ينزل خبر التعاقد مع ديدو كالدرون الكولومبي ..كان الجميع يضرب اخماس في اسداس ولا تسأل اي احد من المسئولين .. الا و يكاد يقسم  انه لا يعرف شئ

اما  بعدما الخبر نزل و اتعرف  ... يكاد يقسم الجميع انهم كانوا علي علم .. بس كانوا ( مدكنيين )  حفاظا علي السرية ... و الكتيبة و اللواء كمان  

زي ما حصل في التعاقد مع التشيكي فرانز شتراكا .. بعد ما كان الكل بيتكلم عن شوقي  غريب كمدير فني للدراويش . يعني من المحلة الي التشيك  في جرة قلم  

و مجلس الادارة الحالي بيشتغل بطريقة الصدمة العكسية تماما .. نتكلم و نبحث في حاجة .. و يروحوا يعملوا حاجة تانية خالص

و بعد ما كانوا بيكتبوا (ضن ) قبل ما اللاعب او المدرب يركب الترماي .. كانت امة لا اله الا الله .. تعرف

  دلوقتي بقي مجلس ( النظارة ) شغال زي مكتب توزيع القوي العاملة  .. بدا ما يوديك شركة مقاولات .. يوديك معهد التمريض

عموما نتمني التوفيق  و الابداع و الابداع للمهاجم الكولومبي ديدو كالديرون  مع التشيكي  شتراكا ... و المدارس الكروية كترت قوي و انتشرت قوي مع الدراويش ... الله يرحم لما كان السيد محمد ابو السعود رئيس مجلس المغارة كاد ان يتعاقد مع مدرب غاني  !!!!

الاستاذ و الاعلامي الكبير سيد حسن استغل فرصة تواجده في مصر لمتابعة المباراة و مع رشفة من النيس كافية الساخن في جو صقيع .. اكد لي ان فرانز شتراكا  المدير الفني للدراويش  علي علم و بموافقة علي الكولومبي كالديرون.. ماشي يا عم سيد

تروح الدوحة و ترجع بالسلامة يا عرب و يا اصل من اصول الاعلام الاسماعلاوي  

نعود الي الموضوع .. كان فيه لاعب غاني و امريكي الجنسية ..كان معروض علي المقاولون العرب و تناول الافطار مع فريق المقاولون الصبح .. و لكنه انضم لمعسكر الاسماعيلي قبل صلاة الظهر و تناول مع الدراويش الغدا  و لعب مع الاسماعيلي في الشوط الثاني ...  لمزيد من الخداع  و التموين  .. علي حكاية الكولومبي 

خبر التعاقد مع الكولومبي كالديرون. كان من حوالي 3 ساعات و نصف ... و من ساعتها و خبراء التحليل و الموافقات و الاعتراضات .. شغالين علي ودنه .. مقالات و تحاليل و ( من نوع تحليلي يا بطة ) و كان الاسماعيلي او مرة يجيب لاعبين اجانب .. فين ايامك يا كوفي متشاك و ميسي غانا و ميسي فلسطين و قتال القتلة و السفاح و ابو رجل مسلوخة و منهم  من جاء  و مشي غير ماسوف عليه   .. و مش فاكرين له سيرة علي الاطلاق  و منهم واحد برازيلي كمان

و الموافق علي العين و الراس و المعترض علي العين  الراس  .. طبعا... الا جماعة ( السيكو سيكو ) اياهم .. لان لو المجلس الحالي بقيادة ابراهيم عثمان ..جاب كريستيان ميسي ... حيعترضوا و يسودوا الدنيا .. و طبعا السبب معروف و مكشوف و مهروش     

و كمان اللي معترض علي التعاقد مع كالديرون من خلال مشاهدة الفيديوهات.. اقول له ..انت ما شفتش فيديوهات محمد زيكا  قبل كده 

و اللي قاعد فرحان بالتعاقد مع كالديرون من خلال مشاهدة الفيديوهات.. اقول له ..انت ما شفتش فيديوهات محمد زيكا  قبل كده.. ايضا

فاكرين الفرحة الطاغية اللي كانت في شارع السلطان حسين  مع رئيس مجلس المغارة ..  و الزفة و الهيصة و الطبل و الزمر .. راحت فين يا جماعة الخير

لا فيديوهات بتشفع و لا سي في بتنفع . اساسا خبرات و فيديوهات جون انطواي كانت عبارة عن ( قالب طوب اسود ) و لكنه حصل  علي هداف الاسماعيلي و هداف الدوري .. و  كان هناك عمالقة التهديف في الاندية الغنية و بملايين الملايين

الاسماعيلي صانع النجوم .. و يكشف النقاب عن المواهب . فاكرين محمد بركات .. لما اتكتب فيه تقرير من الكابتن او الشيخ طه اسماعيل لما كان مدير فني للاسماعيلي  و قال علي بركات .. مش نافع مش نافع .. و تحول بركات الي اسطورة داخل و خارج الاسماعيلي .. طيب فاكرين حمزة الجمل لما كان مرفوض من الاسطورة الكونت دي شحته  في البداية .. و كيف اصبح حمزة حمزة .. اوعي يجي لك حمزة

الاسماعيلي لعب اليوم مع المقاولون و تعادل 0-0 و قبل كده خسر1-2  وديا من الداخلية و قبلها انهي الدور الاول و في رصيده 21 هدف من 17  في 17 مباراة .. يعني نسبة تهديف منخفضة لغاية و لو لعب الاسماعيلي 17 ماتش في الدور الثاني حتكون هي هيه نسبة التهديف و ده معناه المركز التاسع في نهاية الموسم.. و هو يعني ان هجوم الاسماعيلي و الهدافين في غرفة الانعاش .. و محتاجين اضافة قوية و نتمناها ان تكون من خلال الكولومبي كالديرون و يعوضنا العقم التهديفي  في الفريق

نتمني كل التوفيق و النجاح  للكولومبي ديدو اوديجو كالديرون  مع الدراويش و كل الصفقات الجديدة  و يعوضنا  خير عن سنوات المغارة و توابعها  

اللهم امين ,,,     

جديد إس سي
image

كيف هٌزم الزمالك و الاسماعيلي 1957 ,, امس

و تواصل مكتبة موقع اسماعيلي اس سي العامرة بفضل الله تعالي و توفيقه , الكشف عن كنوز الدراويش التاريخية و نقدم وثيقة عمرها 61 سنة
image

محمود صبابة نجم الكرة الخماسية يحتفل بزفافه اليوم

كتب مؤمن مجدي ... يحتفل ﻻعب الاسماعيلى و منتخب مصر لكرة الصاﻻت محمود محمد صبابة بحفل زواجه اليوم الخميس
image

عمرو فهيم : مركز الوصافة غير مضمون حتي اخر مباراة

كتب مؤمن مجدي .. في تصريح خاص لموقع اسماعيلي اس سي من الكابتن عمرو فهيم مدرب الدراويش , قال فيه ان الفوز علي فريق مصر المقاصة كان بفضل الله تعالي ثم جهود اللاعبين
image

أرقام الدراويش بعد مباراة مصرالمقاصة فى الدورى

كتب : محمد حنيدق .. بعد فوز الاسماعيلى على مصر المقاصة اليوم 2/1نستعرض مع حضراتكم أرقام ما بعد المباراة
image

بيدرو بارني : سعيد بالفوز علي فريق صعب

كتب ميدو حسين ... في تصريح خاص لموقع اسماعيلي اس سي من البرتغالي بيدرو بارني قال فيه ان سعيد بالفوز علي فريق مصر المقاصة و حصد الثلاث نقاط
image

بعد المقاصة ..لو باع المجلس حذاء لاعب .. فليرحل

لو ركزنا شوية حنعرف ان طريقة لعب البرتغالي بيدرو بارني المدير الفني للدراويش .. هي و كانك تشاهد فيلم مرعب من اخراج المخرج العالمي ويس جرافن
image

شاهد هدفي الدراويش في مصر المقاصة

في المباراة التي انتهت بفوز الاسماعيلي بهدفين مقابل هدف
image

بهاء مجدي و محمود متولي يغيبان امام الرجاء

كتب مؤمن مجدي ... اصبح من المقرر غياب اللاعبان بهاء مجدي و محمود متولي عن مباراة الاسماعيلي القادمة في مواجهة فريق الرجاء و المقرر لها يوم الاحد القادم و الموافق 22 ابريل الجاري
image

المهم تفوز و لو الاداء طين .. ودرجات اللاعبين

بقلم د اكرام نسيم .. في الدقيقة 92 كاد ان ينقلب الحال بسبب راسية جون انطوي و يصبح القلقان حزين ... تعالوا نشوف درجات اللاعبين
Powered by Vivvo CMS v4.1.5.1