إسماعيلي إس سي - i s m a i l y S C - هزمنا الجيش 3-0 بسبب عثمان و الألاضيش

هزمنا الجيش 3-0 بسبب عثمان و الألاضيش

حجم الخط Decrease font Enlarge font
image

عزيزي القارئ لا تشتم و لا تسب ... و لا حتي توجه اللوم الي اي لاعب بالفريق ... في الاخر هو لاعب

لا به و لا عليه .. ابحث فقط عن  فكر عثمان و الألاضيش بتوعه في كل مكان .. اللي بيقعدوا معاه و يبرروا له علي الانترنت 

يا عزيزي القارئ .. اهدئ معايا و فكر ... هل ممكن ان يفرط رئيس نادي في العالم في 7 او 8 لاعبين ... و لا يعوضهم بسبب البخل و الشح .. و يكون للفريق شكل او لون او رائحة ... و الله لو ريال مدريد ..ما ينفع

المهندس ابراهيم عثمان مش بس باع 8 لاعبين اساسيين في موسم واحد .. و لا كمان  وضع في الفريزر  3 لاعبين ... يعني فريق كامل .... عايزين ايه و تتوقعوا ايه يا جماهير الدراويش

و الله نسيت ... و انا اسف جدا جدا ... اني اوجه الشكر و التقدير و الاعجاب بالجماهير الرائعة التي ذهبت الي كوبري القبة و اتحمصوا في الشمس الحارقة  

و ظلت تلك الجماهير الوفية تشجع حتي الدقيقة 85  بلا راحة علي الاطلاق

و الله انا حزين لحالهم ... اكثر من حزني علي الهزيمة بنتيجة ثقيلة من فريق طلائع الجيش

و الله انا اسف لكم يا رجالة .. انتوا فقط الذين يدفعون سبب تهور عثمان و شلة الالاضيش

احنا محروق دمنا و احنا قاعدين نكتب علي النت و امام مروحة او تكييف ... و انتم يا جماهير يا عظيمة لسه  بتبحثوا علي مواصلة ترجعكم الاسماعيلية

و ترجعوا بسلامة يا ابطال  

و الله انا اسف لكم ..جدا جدا و اشكركم جدا جدا

 لكن نقول ايه ... منه لله اللي حرق دمكم و خلال ترجعوا مقهورين علي حال الفريق  

 المهندس ابراهيم عثمان .. لا يجلس الا مع الالاضيش  - مين هما .. كل الذين لا يرفعوا اصواتهم  علي الاطلاق  و اول ما سعادة البيك .. يقول كلمة واحدة ... هما وراه زي القطيع ... يكرروا نفس الكلمة ... زي ما بيحصل في الصوت و الضوء في الهرم و الكرنك..بيرددوا الكلام زي  من وراء الكاهن الاعظم 

ان اراد شئ ابراهيم عثمان .. ليس وراء الالاضيش و قبلهم سلاحف المجلس الخرساء .... الا التاييد و المباركة لبيع اي لاعب و خلاص  و تفريغ الفريق و تدمير النادي

و الالاضيش هما ملوك التبرير في بيع اللاعبين  و افكار تحرق الدم .. في الاستثمار و   ان اللاعب ده - ابن و..... .. و لازم يسيب النادي علي الفور و بيع يا ابراهيم بك الكبير و تمزج  و استمتاع و انت توقع علي استمارات البيع و كانك تبيع خرفان و نعاج في سوق النخاسة  

كله كدب في كدب و نفاق و مسح خوخ  جوه النادي الاسماعيلي .. مفيش حد بيقول كلمة حق لله سبحانه و تعالي ... الكل بيبحث عن رضا ابراهيم بك عثمان

و علي الانترنت -  و يا عيني بقي علي الانترنت .... هناك فقهاء و معلمين تبرير لبيع فلان و نشتري مكانه فلان  و فلان و فلان و لا يكاد يذكر لاعب ما - مرشح للرحيل .. و الا و كتب : خلاص يروح اللاعب فلان  في داهية و نجيب مكانه احمد الشيخ و عمرو بركات و مش عارف مين + 50 مليون جنيه   

 و علي فكرة هناك  من كان يري  احتراف محمد عواد هو شرف  للاسماعيلي و مصر و افريقيا والعالم العربي و للكرة الارضية ... الان بيشتم في من وافق  في رحيل محمد عواد و في اللي جاب مكانه ... عصام الحضري ..... ده واحد بس  من الالاضيش

لان الاضلوش ( مفرد الالاضيش ) من صفته التلون زي الحرباء  و القفز من المركب زي الفيران .. و مستعد للفور علي البحث عن رئيس مجلس دارة ليكون اضلوش معاه

Image may contain: 3 people, people sitting and suit

بالله عليك يا عزيزي القارئ - دقق في الصورة ... هل يمكن لواحد من الثلاثة الجالسين مع ابراهيم عثمان او الثلاثة الغايبين من الساحف ... يقول له ثلث الثلاثة كام

 ...  صعب جدا الكلام الفني عن مباراة فضيحة السلاحف و الالاضيش... لن يوضح شئ اهم من سوءادارة م.ابراهيم عثمان  في الفريق و سياسة قتل النجوم  و احضر مدرب من درب شكمبة الجزائري .. و جعل منه اضلوش كبير و العب باللي في ايدك

 تعالوا نشوف تشكيل الفريق اليوم .. ستجد انه مازال ترجمه لما قلناه  عن مباراة انبي ... كله عك في عك في عك في لعبة مكعبات و بلا الوان 

العب يا باهر مساك و انت اصلا باك يمين و العب يا هاشم باك يمين و انت اصلا مساك .. علان نربي محمود متولي .. اللي افسده اصلا ابراهيم عثمان  بسبب  فتح باب الرحيل لكل من يريد و من لا يريد زي محمد فتحي  و العب يا ماندوجا راس حربه و محمد صادق يلعب صانع العاب و ساعات ظهير ايسر و الشامي يلعب مكان صادق و حسني ينقل الكورة الي الامام مع انه ديفندر و العب كمان صانع العاب و نادر رمضان اساسي اليوم و غدا احتياطي و الشامي اساسي امس و اليوم احتياطي

 ليه كل العك ده ..نركز سوا - كل لاعب رحل من الفريق لم يعوض واحد مكانه علي الاطلاق- الا طارق طه مكان بهاء مجدي ... و كل الباقيين لعبة المكعبات اللي شفناها في مباراة انبي الاخيرة

 مين مسئول عن كل العك ده .. مش الجزائري مضوي مع انه وافق عليه و حلف براس ابوه ان بهاء مجدي و محمد فتحي ..لن يرحلوا ... المسئول عن العك هو المهندس ابراهيم عثمان و الالاضيشه - سواء في المجلس او في المكتب او علي الانترنت

سؤال للمهندس ابراهيم عثمان .. وانا عارف انه لا يري و لا يقرأ شئ .. لان الالاضيش بيفلتروا كل حاجة 

   بالله عليك .. ده فريق يلعب في افريقيا لابطال الدوري في نوفمبر القادم و كمان مش في الكونفدرالية 

 زعلت قوي يا مهندس عثمان لما الكابتن محمد صلاح ابو جريشة  قال ان الاسماعيلي حيبقي اضحوكة الدوري 

 خلاص حنبقي - اضحوكاكا  في افريقيا .. اضحوكتون  في البطولة العربية .. بسببك و بسبب السلاحف و الالاضيش 

ضميرك مرتاح يا مهندس ابراهيم .. بتنام ازاي و انت لوثت سيرة المعلم عثمان احمد عثمان - رحمة الله عليه

و كمان بيزعلوا قوي من وصف - مجلس السلاحف - طيب نسال السلاحف .. سحلوف سحلوف 

هل يستطيع - سحلوف منكم - الاستقالة و الاعتراض  علي ما حدث من تدمير للفريق 

 فين المهندس خالد فرو - مدمن الاستقالة - و الا كانت اوامر الاستقالة تاتي له من مكتب عرابي -  مع مجلس ابو الحسن و مجلس ابو السعود 

سبحان الله تعالي وله في خلقه شئون

فريق الاضيش عثمان - من الدقيقة 81 الي الدقيقة 94 ..مسحوا بالفريق الارض  - بكل معني الكلمة و د 87 و 88  ضاع من الجيش فرصتين للتهديف  و كمان د 91 و كان شكل الاسماعيلي - يصعب علي الحاخام الهودي - و في نهاية المباراة د 94  يحرز الفريق الجيشي  الهدف الثالث له - حتي تنزل الستارة و الفضيحة مكشوفة للجميع

 مين السبب في الفضيحة ... لا مضوي و لا اللاعبين ... هو المهندس ابراهيم عثمان و سلاحفه و الاضيشه 

منكم لله  ..جميعا             

و مضطر اقفل  كلام خارج المقرر.. حتي لا نغلط في احد     

جديد إس سي
image

ناصر خالد مستشار فني لحراس المرمى لبورتو للتسويق الرياضي

بعد نجاحاته المستمرة داخل النادي الاسماعيلي في قطاع الناشئين ومدرسة الكرة التي استمرت ١٥ عام عمل خلالها مع جميع الفرق وكان مثال يحتذا به في
image

الإسماعيلى يرد على قرار نقل قمة الإسماعيلى مع الأهلى لبرج العرب

صرح الاعلامي علاء وحيد المتحدث الرسمي للنادي الإسماعيلي ان اتحاد الكره أخطر اليوم الإسماعيلي بتغير ملعب مباراته مع الاهلي من استاد الاسكندريه الي استاد برج العرب
image

تأهيل ثنائى الفريق واستشفاء الأساسيين

بدأ فريق الكرة الأول بالإسماعيلى الاستعداد لقمة الأهلى يوم الأربعاء المقبل باستاد برج العرب بالإسكندرية ، ضمن مؤجلات الأسبوع الــ12 من عمر مسابقة الدورى المحلى.
image

أبو جريشة: واجهنا ظروفا لم تحدث فى انجلترا و لا افكر في الرئاسة

أكد على أبو جريشة، نجم الإسماعيلى السابق ورئيس اللجنة الفنية بقلعة الدراويش، أنه لا يفكر حالياً فى رئاسة النادى، وقال أبو جريشة فى تصريحات لبرنامج "بى أون تايم"، لا أفكر مطلقاً فى رئاسة الاسماعيلى فى الوقت الحالي، ولا يمكننى التفكير فى هذا الأمر حالياً لست أنانياً.
image

الفريق يعود للمران اليوم و بعد راحة 24 ساعة

 من االمقرر ان يعود الفريق الأول بالاسماعيلي للمران اليوم وبعد راحة 24 ساعة حصل عليها اللاعبون  و يقام المران في الساعة الثالثة عصر اليوم استعدادًا لمواجهة
image

سيبكم من ابراهيم عثمان و هو الباقي مفيش إحساس خالص

اتصور انه لم يوجد مجلس ادارة للنادي الاسماعيلي ( منتخب او معين ) , الا و إستقال عدد من اعضاءه اعتراضا علي سوء ادارة رئيس النادي
image

الذكري السنوية الخامسة لرحيل ساحر الثلاث خشبات حسن مختار

تمر علينا الذكري السنوية الخامسة لرحيل نجم الاسماعيلي السابق وحارس مرماه فى السبعينيات حسن مختار ساحر الثلاث خشبات الذى وافته المنيه في 5 مارس 2016 ,, داعين الله أن يدخله فسيح جناته
image

حمص : الإسماعيلي لن يهبط.. ويجب وضع لائحة لتحفيز اللاعبين

يثق محمد حمص نجم الإسماعيلي السابق أن الدراويش لن يهبطوا للدرجة الثانية مشيرا إلى أن الفريق سيخرج من أزمته الحالية.
image

جماهير الإسماعيلي :هبطنا اكلينيكيا والجميع مسئولون

سيطرت حالة من الحزن و الإستياء بين جماهير ومحبي ومشجعي فريق النادي الإسماعيلي عقب تعادل فريقهم مع فريق وادي دجلة بدون أهداف في مباراة قمة
Powered by Vivvo CMS v4.1.5.1