كل واحد يضرب اللي جنبه قلم ... يا سلاحف
لو كنت مكان الدكتور ابراهيم فارس و الاستاذ عطيطو و المهندس تامر موسي و الرابع و الخامس مش
فاكر اسمه.. كنت طلبت منهم ان نقف دائرة و كل واحد يضرب اللي جنبه قلم و تفضل الاقلام تدور و تدور و تدور .. الي ان يسقط الجميع علي الارض.. اما الناظر ده محتاج شلوووووووت ..يطير بيه من النادي الي الكارتة
و لكن بشرط ان يكون الشلووووت ..من واحد عفي صحته لا تقل من واحد زي حمزة الجمل زمان ... و يكون لابس جزمة ميري
سيبكم من ان الحكم ظالم ابن ظالم و سيبكم من ان مساعد الحكم احول ابن احول ... لكن عايز رائيكم بجد و بصراحة ... هل فريق الاسماعيلي ابراهيم عثمان ... يستاهل حتي يتعادل
الاسماعيلي كان يمكنه التقدم علي مازيمبي بضربة جزاء المحمدي و لكن دخل فيه هدفين و كان اتقدم علي القطن برضه بضربة جزاء .. و لكن اتغلب 2-1 ... النهاردة تقدم بهدف علي لافريقي د 8 و بعدين اتغلب 2-1 .. بالله عليكم ده فريق و الا ده جهاز فني و الا دي ادارة
الافريقي يستاهل الفوز 100% و حتي ان كان ساعده الحكم الكاميروني و طاقمه ... و الاسماعيلي يستحق الهزيمة 100% و لو كان الحكم ضده
رئيس نادي ضارب فاشل فاشل فاشل و اعضاء مجلس طراطير زرازير و لا ليهم لزمة و عضوين اتنين زعلانين ... و كابتن مقموص و معتزل في وقت قاتل
فين النجاح اللي يمكن ان يحدث ... سيبكم من الحكم خالص ... هل نستحق بالفعل كنا ندخل دور المجموعات من الاصل
ناخدها واحدة واحدة
حراسة المرمي - دمرها فيروس عصام الحضري اللي ( ..... الهيبة) لا مؤاخذة و مكان النقاط .... تخيل ما تريده بلا ضوابط
خط الدفاع .. نهاره اسود من الكحل - ريتشارد في الثلاجة و ماشي ماشي ... لا العب يا ريتشارد .. و حرك باهر الي المساك و هات لاعب مجمد في ثلاجة ميت عقبه و سموحة .. و اول مباراة العب يا اسامة يا ابراهيم .. عايز ايه
خط الوسط ... زلزال اخونا حسني عبد ربه ( الكيزر ) ... خلي كل الناس تقول حنلاعب الافريقي و الا الترجي يوم الاحد و الا الاتنين ... و نازل قبل الماتش ( يعيط ) في الملعب... زي واحد رايح فرح و يعيط او رايح عزاء و بيضحك ... هي ناقصة لخبطة
خط الهجوم .. هات لاعبين و املاء الفراغ - عيان مش عيان ... اهو اي حاجة و السلام و العب ياله ..ارقص ياله
كل الخطوط ضاربة و متشابكة و معفنة
عايز تكسب ازاي ..مش عارف و ليه
عايزين نتكلم فنيا من واقع الماتش ..ماشي
الاسماعيلي لم يتخطي نصف الملعب في الشوط الاول الا في الدقيقة 6 .. و كان الجمهور الرائع اللي فوق من راسي من فوق .. لم يحرك اي شئ في اي لاعب .. علشان امكانياتهم كده و فريق مهلل و لا قائد و لا صانع العاب و لا استقرار من اي شئ
الاسماعيلي احرز هدف في الدقيقة 8 ..بجملة هي الوحيدة في المباراة ذات 87 دقيقة .. عارف ثاني فرصة كانت امتي للاسماعيلي كانت د 77 من الاخ مارشال نافورة و باصاها باقتدار الي حارس الافريقي سيف الدين الشرفي و اللي اتصدي لكرة طارق طه د 48 و راسية طائشة من بافور د 68
يعني علي ارضك و وسط جماهيرك الرائعة ... فرصتين فقط طوال المباراة و في المقابل ... عد و شوف عدد فرص فريق الافريقي د 3 في القائم و د 17 و 26و انفرادت بالجملة في اول ربع ساعة من الشوط الثاني اللي لعب فيه الاسماعيلي ضاغط وبعد كده فنيص فنيصة كاملة
بعدها استولي الافريقي علي الكرة و نصب السيرك التونسي .. في تناقل الكرة في مساحت ضيقة و امتلاك لكرة و الحصول علي فاولات و مخالفات لاستهلاك الوقت بشكل ايجابي من د 16 الي د 30 ... ليه فاق الاسماعيلي اول ربع ساعة من الشوط الثاني
بسيطة جدا و اسهل اجابة
فريق الاسماعيلي طوال المباراة - غير الربع ساعة دي ..كان الفارق بين خط الوسط و شيلونجوا ..30 متر في اغلب الاحيان و انفصال تام بين الهجوم و الوسط و خروج عبد الرحمن مجدي من المعادلة .. لذلك كان الضغط من وسط الملعب لاعبي الافريقي من قلب الدفاع - لم يلعبوا علي الاجنحة الا في الكرات المرتدة
ارجعوا الي الدقيقة 18 و ركزوا كويس مع اللاعب المظلوم باهر المحمدي قبل ما يشتت الحارس محمد مجدي .. ركزوا مع باهر المحمدي حتلاقية بيعطي تعليمات و هو بيلف حوالين نفسه في مظهر يوضح الربكة و الحوسة اللي هو فيها و معاه الغاني ريتشارد اللي محدش عارف هو قاعد و الا ماشي و لا راكب بسكيلتة ... حمراء و الا بيضاء ... و الا فيه كولومبي و الا فيها ... فيل بزلومة
الجماهير الرائعة العظيمة تحولت مع اكتمال القمر من مستر جيكل الي مستر هايد .. من قمة التشجيع و الجمال .. الي فتوات الناجي و مستأذبين بالحديد و النار .. و ارادت ان ( تفش غلها ) في الحكم و الزتونة ابو راية سودة اللي مسك ظهره مرات عديدة من اللي جاله من خيرات الجماهير ... افسدت المباراة.. و محدش يعرف العقوبات اللي جايه ايه
الحكم الكاميروني اوقف اللعب 30 دقيقة ومن بعدها الغي المباراة و هناك اصابات في الجماهير التونسية قبل المباراة و محدش يعرف ايه و فين و ليه
و السلاحف الخرساء و لا هي هنا ... و قنابل دخان مسيل للدموع و قبض علي شباب الجماهير و حرب شوارع بين الامن و الجماهير و لم يخرج ججمهور الافريقي الا الساعة 11 مساءا من الاستاد و اخونا ميدو حسين مع االشكر ليه - مخنوق من الغاز
و من الاكيد جملة عقوبات قادمة في الطريق و لان المصائب لا تاتي فرادي .. يا ريت مصيبة منهم ... تشيل و تاخد اللي في بالي و في بالك
ايوة هو ..اللي جاء علي بالك
قولوا... امين
و انتهي كلام خارج المقرر
