شوفت الفريق يا عمنا ابو جريشة ...و فين خلف

هو سؤال مرتبط بالصورة المرفقة .. هو الاخ تامر موسي عضو مجلس السلاحف ...رايح الماتش ليه

.. وكمان رايح يجلس بالقرب من الهر الساحر ابو جريشة والكابتن انوس وبينهما الكابتن عصمت قينون

نجوم الستينات والسبعينات في المقصورة فاهمين ومنورين .. لازم يعني طبق باتنجان مخلل من غير ملح .. علشان يسد النفس

وكمان مين اللي واقف بين الكابتن علي ابو جريشة والكابتن انوس ..ده.. وباين عليه مشغل الموبايل علي وضعية التسجيل كمان ومش عارف.. وبصراحة ..كان مفروض اي ( سحلوف ) في الادارة او تابع لها ... يقعد في بيته ومعاه خس وجزر الي نهاية الموسم ومفيش مانع من شوية حمص شام .. ابعدوا بقي ..قرفتونا في عيشتنا.. كفاية ان معلق المباراة بيقول علي الاسماعيلي في مباراة اهل القاع .

 وفين كمان الاستاذ محمد خلف ... !!!!!!!!!!  قمة سوء التنظيم بصراحة ....  والا كيف يغيب الاستاذ محمد خلف عن المقصورة وكان من المفترض ان يجلس كمان بعد الكابتن علي ابوجريشة .. يعني تبقي زي صينية الرقاق ... راق رقاق ... وراق لحمة ... واهو كله طبيخ

 وفي الاول الف الف مبروك لفوز الدراويش وحصد ثلاث نقاط مهمين في سباق القاع وبقينا في المركز 14 وعقبال كده لما نعيش ونشوف الاسماعيلي في المركز 10 .. ومش بعيد علي ربنا ..يا جماعة

والله الواحد مش عارف يقول ايه .. نتكلم عن حكاية ( الاستبعاد ) من بطولة افريقيا والا حكاية ( الاستعباد ) اللي عمله فينا اخونا الديكتاتور الاعظم وخلينا نشوف النجوم في عز الظهر .. اقول لكم .. خلونا في ماتش النهاردة بين الاسماعيلي اللي كان .. وبتروجيت 

يا تري يا هل تري يا كابتن علي ابو جريشة - افضل لاعب في افريقيا واحسن من لمس كرة القدم علي الاطلاق .. شاف الفريق ازاي اليوم؟؟!!... واتكلم مع الموهوب الرائع انوس علي ايه ( مع ان بينهم ا.عادل الصباح  زي ما قال لي ميدو حسين ) وفي دماغهم ايه ( دماغ ابو جريشة وانوس - مش الصباح ) وكيف يمكن ان نعدل التايهة والمائلة ازاي

 الفريق احرز هدف جميل عن طريق الناميبي شيلونجو بالدقيقة 8 ( وهي دقيقة نحس ..(. فكر عزيزي القارئ وانت طبعا عارف ليه ) و كان قبلها راسية من مارشال د 5 ... و بعد كده خلاص خالص.. فين الاسماعيلي مفيش علي ريش .. لولا لمحة حلوة من لمحات من محمد صادق  د 16 وبعدها  فريق الدراويش - لم هدومه - ومشي ..ما افتكرناش انهم رجعوا .. الا بتصويبة مباغتة من المارشال عودة نافورة وهو يسدد من الوضع متزحلقا د 33 ويركب بتروجيت ركب الماتش و يدلدل رجليه.. واصبح قريبا جدا جدا من التسجيل ومن الدقيقة 20:28  بتروجيت بيصنع كل شئ  بالكرة وخط الوسط ضائع تماما

 وجدية قوية من بتروجيت ورغبة في تغيير المباراة وسلبية وتمريرات مقطوعة بالجملة ووسط محاولات للغلبان محمد صادق في وسط الملعب ومين قال ان محمود متولي لاعب وسط !!!!!!! و اول وصول للاسماعيلي في الشوط الثاني لمنطقة جزاء بتروجيت كان د 62 وركنية ساخرة التنفيذ

وكاد مشجعي الاسماعيلي ومعاهم الهر .. ان ينخلع قلوبهم من (تجلي ) اسامة ابراهيم لتصل الكرة الي احمد عفيفي الذي يتخض اكتر مننا ويسدد الكرة الي فوق العارضة د 63 ويسوء اداء الاسماعيلي الي د 76 بشكل يجيب الضغط والدقيقة 8 النحس تسيطر علي الاجواء وتغييرات محدش فاهمها من سيدومير بعد خروج متولي د 74 وضغط متواصل من بتروجيت كان في قمته د 81 وطرد مارشال - ربنا يشفيه - من الصحة اللي هوه فيها  د 85

وخمسة دقائق من الحكم الصباحي ونزول كريم بامبو في وقت مالوش لازمة وخوف حتي الثانية الاخيرة علي فوز باهت و صعب

لكن الثلاث نقاط اهم و ابقي .. ويمكن يمكن ان يكون الهر الساحر علي ابو جريشة .. ينقذنا خلال الاسبوع الباقي من القيد الشتوي ..ان كان لنا عمر .. طالما بنشجع الدراويش    

وانتهي كلام خارج المقرر