الضرب في الميت حرام و خلينا متفائلين !!!!!!!
النهاردة كلام خارج المقرر مختلف شويتين .. حنكون متفائلين و سعداء و فرحانين زي الصورة
..الحمد لله فزنا من بعد صيام عن كل شئ و لا صيام شهر رمضان المبارك ..من بعد 8 مباراتين اتسوينا علي الجانبين فيهم زي شوي الهابروجر و السويييس .. الويل دوون
و كمان احرزنا هدفين من بعد372 دقيقة صيام الي ما بعد المغرب في 4 مباريات و كمان بقينا 41 نقطة و لو حتي استمرينا في المركز السابع و ربنا يعدي الايام الجاية علي خير حتي نخلص من الموسم الحالي ..الاسود علي ازرق الكلاماتا .. اللي عيشنا فيه من غم و حزن و دموع و ضغط و سكر ... بسبب سعادة الناظر الديكتاتور و شوية السلاحف اللي حواليه
بس حاقول لك لكم ...سر .. بس احلفوا انه سر ..بيني و بينكم
عندي اخبار زي الزفت ... عن ما يجري داخل الاسماعيلي من سعادة الناظر الديكتاتور افندي
اخبار تضمن وقوع النادي في الموسم القادم و اسوء من الموسم الحالي
و الموسم الحالي سيعتبر نزهة سعادة و جمال و رحمة و رضا .. من اللي حيحصل الموسم القادم
و بالموسم القادم سنقول كلنا : ايييييه فين مستوي الموسم الماضي .. كان الفريق وحوش عتاولة و في منتهي الرجولة و الاداء و الانتماء
كلنا حنقول: فين ايامك الحلوة يا ماندوجا و شيلونجو و اوكيكي و تحركات شكري نجيب و عطاء عمر الوحش و رجولة عبد الرحمن مجدي و تركيزه ... يا ليت الايام دي تعود
ليه كل ده
اقول لكم باختصار اليومين دول
سعادة الناظر ..خلاص رسم خطة الموسم القادم .. رسمه اسود من هباب الحلل .. و اللي مش عاجبه يشرب من بحيرة التمساح او ترعة ابو الغيط
مس حنتكلم النهاردة و لا بكرة و لا بعده .. حنتكلم بعد يوم الاربعاء
اشمعني الاربعاء
لان يوم الاربعاء ماتش الاسماعيلي و الاهلي ... و الحقيقة نتمني ان نري الاسماعيلي كما هو .. بدون ضغط منا علي الاطلاق من كلام خارج المقرر .. او كلام داخل المقرر
و حاقول لكم سر كمان .. و الله و الله العظيم ... التقارير جاهزة و الوقائع سليمة ...اننا داخلين علي ايام اسود من الخروب
و لو سعادة الناظر – اللي مفيش قادر عليه – لا اخوه النائب و لا اخوه التاني اللي مش نائب ... و لا حتي كبير الاسماعيلية ..الكل وضع صوابعهم في الشق و يأسوا من الناظر و افكاره و اعماله
و الجميع بينظروا اليه .. انه خارج الحساب و العقل .. كأنه انسان أنوي نادر.. زي ما ما كان بيقول الفنان الكبير يوسف وهبي !!! و زي ما قابل في النهاية الغوريلا ( توسكا ) .. و عموما لو الناظر ما اتعدلشي .. ... هناك حلان
اما يطرد الناظر ... من الاسماعيلي كما طرد من في ابريل 2005 ... و الضرب في الميت حرام و حتي لو لم لا يحس بيه
يا اما سنظل في الكرة الدوارة زي الغرفة الكرة الدوارة بتاعة اختبار راد الفضاء .. تلف تلف و مش عارفين احنا فوق و الا تحت و الا تحت و الا فوق
عندنا اخبار زي القراصيا و الخروب او العرقسوس البايت .....بمناسبة شهر رمضان المبارك
بس نؤجلها الي بعد يوم الاربعاء
و يوم الاربعاء مش قريب
يا ربنا يا عليم بحالنا جميعا .. استرها معانا بحق ايام رمضان المفترجة و ننهي الموسم ده علي خير .. و كفاية علينا فضائح و احنا تعبنا خلاص
و كل عام و حضراتكم بخير و سعادة
و انتهي كلام خارج المقرر .. قبل ان نبدأ
و رمضان كريم
