إسماعيلي إس سي - i s m a i l y S C - همام ومدبولي وبافور و مدرب اخرس وعثمان

همام ومدبولي وبافور و مدرب اخرس وعثمان

حجم الخط Decrease font Enlarge font
image

في البداية نقول الف الف مبروك لعشاق الدراويش في كل مكان علي الفوز الجميل المتوتر

علي فريق اهلي بنغازي باربعة اهداف مقابل هدفين  .. وان شاء الله تعالي نضيف الف الف مبروك ثانية عندما نتجاوز الفريق الليبي المكافح في تونس وبعد كده نتكلم عن الفنيات والبلح الامهات ... ليه ؟؟؟؟

وكبداية  ايضا .. من يتحدث عن الاداء الخططي والتنفيذي وقدرات المدير الفني الصربي ميودراج بيستش والتغييرات وغيره ... يبقي لا مؤاخذة - ما بيفهمش .... الألف من كوز الدرة

 ليه ..تاني

 لاننا كنا بننتقد توقيت احضار المدير الفني بشكل متاخر ومفاجئ ... يبقي مش دلوقتي نحمل المدير الفني الصربي .. اي حاجة خاصة بالماتش من ناحية الكتشنة او التغييرات او خلافة .. احنا لا نغير كلامنا او ننساه او نتناساه

 مبدأنا واحد سواء في التحليل او التقييم  

لكن مباراة اليوم هي كما قال كابتن الفريق الليبي الشقيق انها مباراة جس نبض - والحسم في تونس ...... وكلامه صح 100% او اصبح كذلك 100% وحتي لو فزنا باربعة اهداف .. لكن اهلي بنغازي احرز هدفين في ارض الخصم .. وعندهم فرصة لا تقل عن 50%  مثل الاسماعيلي تماما 

وعلي فكرة نرحب ونشيد بجماهير الفريق الليبي الشقيق وكانوا روعة في المدرجات وصحتهم كويسة قوي وحيتعبونا في تونس

القصة كلها في مباراة اليوم عبارة عن سطور بسيطة  

 افتكاسات واخطاء عم ابراهيم عثمان ... لا يمكن ان يتحملها الصربي ميودراج بيستش بالوقت الحالي .... لكن بالقطع ستتحول افتكاسات واخطاء عثمان الي عمنا الصربي ميودراج  ... بمرور الوقت ولابد ان يصحح الصربي لذلك ويفوق  معانا كده 

 واول نقطة ممكن نتكلم عنها 

 المدرب صربي بيتكلم صربي وضائع في الانجليزي ومعاه مواطنه ومساعده .. وتعليم الانجليزي في صربيا . .. حرام ومحرم من قبل جورباتشوف ... نجيب احنا صربيان .. و نستخسر نجيب مترجم ... يبقي لا مؤاخذة احنا جايبين صربي أخرس .. بيفهم اللاعبين فكره ازاي ويتكلم ازاي 

 فضيحة بجلاجل وجرسة بحناجل ... شاهدناها مع ترجمة الاخ العبقري الكابتن طارق ابو الليل مع اخونا ميودراج .... هو كده عثمان .. لازم يحرق دمنا ويبوظ الطابخة البايظة اصلا.. وخلي الاستوديو التحليلي فكاهي ولا عادل امام ومحمد هنيدي .. فضيحة بجد

Image result for ‫المعلم شكل في سيدتي الجميلة‬‎

 لا وكمان الكابتن الحاج صبري المنياوي صاحب التعليم الحكومي من عينة ( شيي إت .. هيي إت ..ميدي ترريان سيي ) .. زي المعلم شكل - محمد يوسف -  الله يرحمه .. في مسرحية سيدتي الجميلة مع الراحل العظيم فؤاد المهندس... يعني العملية بزرميط في قرنبيط ... من البداية الي النهاية

 تاني نقطة ... الغاني المدافع الجميل ريتشارد بافور -  مع الاسماعيلي من سنتين ونصف - وافضل مدافع في الاسماعيلي من زمااااان - ولو عايز تقول افضل بديل ..ماشي .. و صاحب اجمل هدف للاسماعيلي في الموسم الماضي في سموحة وهو الهدف الذي جعل الاسماعيلي يهرب من الصراع علي الهبوط 

 ليه يمشي بافور  ... يا عم ابراهيم  عثمان

 علشان تسجل لاعب زي الصربي ديمتروف .. واشمعني ديمتروف .. لان لولا انه كان جاي ..كان حيفضل بافور في الاسماعيلي .. وراح ديمتروف في الكازوزة واستبعد السماسرة اللي لعبوا في الموضوع ده 

 طيب مشي بافور واتصاب محمد مجدي - كالعادة ... حتلعب بمين قلب دفاع... حتلعب طبعا بمحمد هاشم .. ومن خلفه الحارس الفذ محمد فوزي .... يا داهية سودة وكحلي وزيتون كلاماتا كمان 

ودقي يا مزيكا ... حزايني

 ثالث نقطة

 Image may contain: 1 person

 شفت يا عم ابراهيم عثمان .. ربنا يكرمك يارب ... زي ما كرم موسوليني ... اللاعب العراقي همام طارق ..الراجل ما بقالوش 24 ساعة .. ونزل ولعب وبيلعب ازاي ومين هو النجم وفائدته في الفريق ازاي.. كل الناس بتقول ميسي او بركات .. انا باقول همام هو القائد الفذ الهمام محمد حازم الجديد - بس شعره ناعم

Image result for ‫الحناوى كركر‬‎ 

شفت يا عم ابراهيم عثمان ... ربنا يكرمك يارب ....  بصوت الحناوي - محمد سعد كركر -  مستوي اللاعب المحترم ايه والملعب بيميل معاه ازاي والكرة بتحبه ازاي

طبعا .. واحد من الكوخية والمهللية والمبرراتية حيقول : انت بتقوووول ايه ..ما هو عوثمان اللي جاب همام طارق ومدبولي 

 حارد عليه وواقول له ... إتنيل واسكت ... عوثمان جاب 54 لاعب خلال 3 سنوات منهم 51 لاعب مجانا والله يرحم سافيولا ومليجي وأوشا واوفا وابو ليفا وصابونة وتيكا علي العالي وتيكا علي الوطي .. وكله ببلاش يا فجل 

 لازم يعرف ان هناك فريق بين الغالي والرخيص وفرق كبير قوي .. اما المجانا ده زي الجوافة والمانجو اللي بتروح محلات وشركات العصير ... معطوبة في معطوبة وسقط بلا فائدة ... يا عم افهم بقي

رابع نقطة

 الكابتن باهر المحمدي ..كابتن الاسماعيلي اللي عنده 23 سنة .. شئ جميل ورائع ومحبوب وحبوب ... مفيش كلام

بس ليه لا يجدد .. ليه سرحان وليه مش هو ... الاجابة بسهولة ... .. انتظروا الانتقالات الشتوية القادمة حتعرفوا الموضوع 

 ليه  ..عثمان لا يحسم تمديد تعاقد باهر المحمدي والا عايزه محمود متولي التاني ... ومش عايزنا نخلص من أم الليلة السودة دي

ليه لا يجدد عثمان للاعب الجميل المظلوم عماد حمدي .. والا عايزه كريم بامبو التاني

  عثمان باشا عثمان .. راجل تاجر شاطر .. بياع بياع بياع .. وبيعرف يربي كتاكيت ويثمنهم  والفراخ تبيض والكتاكيت تكبر وتبقي فراخ والفراخ تبيض .. وكله منافع حتي في السماد العضوي من بقليا الفراخ  

الكلام كتير والمشاعر كتير والكلام خارج المقرر كتير وخاصة عن عشر دقائق رعب بالمباراة من د 69 الي د 79 والوجوم كان علي وش عثمان والجماهير كان واضح وثغرة في الباك الشمال و فقدان الكرة بلا حساب واخطاء كتير .. وكله من الفتي والفتيايين حول عثمان  

 لكنها بالنهاية- مباراة في اول الموسم ونتيجة مش بطالة - وبكرة يمكن يكون احسن من النهاردة ..... بس عثمان يعقل ويصحصح معانا      

وكل عام والجميع بخير وسعادة 

وانتهي كلام خارج المقرر    

جديد إس سي
image

صبري المنياوي : يجب إلغاء الدوري هذا الموسم

طالب صبرى المنياوى مدير الكرة بالنادى الاسماعيلى، مسئولي اللجنة الخماسية بإتحاد الكرة بإعلان إلغاء مسابقة الدوري المصري الممتاز هذا الموسم بسبب فيروس كورونا. وقال صبري المنياوي
image

محمد طلعت: وكيل مشهور في الإسماعيلية سبب عدم انتقالي للدراويش

قال محمد طلعت مهاجم الفريق الأول لكرة القدم بنادي سموحة، إنه كان قريبا من الانتقال إلى صفوف الإسماعيلي، في الفترة الماضية، ولكن تدخل وكيل أعمال
image

«جوميز» يتحفظ على أداء لاعبى الإسماعيلى.. ويطلب دعم الدراويش بـ3 لاعبين

طلب الفرنسى ديديه جوميز، المدير الفنى للفريق الكروى الأول بنادى الإسماعيلى، تدعيم الدراويش بـ3 لاعبين خلال الموسم المقبل فى مراكز الوسط المدافع والوسط المهاجم بالإضافة
image

هدوء و ترقب في الاسماعيلي انتظارا لاستئناف المنافسات من عدمه

لا حديث داخل أروقة النادي الاسماعيلي الا عن الازمة الحالية التي تعيشها الرياضة المصرية ببب تداعيات و مقاومة فيروس كورونا - كوفيد - 19
image

المباراة النادرة بين الاسماعيلي 1-1 المصري 1985

من خلال مكتبة موقع اسماعيلي اس سي العامرة بفضل الله تعالي و توفيقه ,,نواصل تقديم كنوز الدراويش الذهبية النادرة
image

الإسماعيلى «يوبخ» مجدى بعد أزمة الكورونا

سادت حالة من الاستياء داخل النادى الإسماعيلى، خلال الساعات القليلة الماضية، بسبب الأنباء التى تداولت إصابة محمد مجدى مدافع الفريق بفيروس كورونا المستجد، وذلك بعدما
image

الإسماعيلي يسعى لتأمين عماد حمدي خوفًا من انتقاله لبيراميدز

دخل مجلس إداراة النادي الإسماعيلي، في مفاوضات جادة مع عماد حمدي لاعب الفريق الأول لكرة القدم بالنادي، من أجل تجديد تعاقده مع الدراويش لمدة 3
image

مجدي وحقيقة تسبب زراعة الشعر في أزمته الأخيرة

ما السبب وراء الأزمة الأخيرة والاشتباه في إصابته بفيروس كورونا؟ ولماذا لم يوفق في الزمالك؟ تحدث محمد مجدي مدافع الإسماعيلي عن كل ذلك في حواره
image

المباراة النارية بين الاسماعيلي 4-3 الزمالك 1997

من خلال مكتبة موقع اسماعيلي اس سي العامرة بفضل الله تعالي و توفيقه ,,نواصل تقديم كنوز الدراويش الذهبية النادرة
Powered by Vivvo CMS v4.1.5.1