خلف و عثمان, ايه العسل ده يا خراشي يا ناس
سيبكم من ماتش المقاولون و الهزيمة بهدفين... بص شوف الصورة حلوة ازاي
... عسل يا ناس ..خلفوته و عثمانوته .. تقولش اتنين لسه في شهر العسل و عثمانوته بيهمس في ودن خلفنوته و يقول له : تيجي نحكم الدراويش و تعملي لي قراقيش
ايه العسل اللي بينقط من أم الصورة دي .. لا دي صورة تستاهل تتكبر و تتبروز و تتوثق كمان
يا سلام علي حمرة الخجل اللي علي وش خلف .... عذراء يا ناس ... و هيما باين علي كلامه انه خبرة ..خبرة بجد
فعلا ايام الخطوبة .. هي اجمل ايام العمر
يخرب بيتوكم و ببيوت اللي جنب بيوتكم و يخرب بيت اللي ما يقول يخرب بيتوكوا انتم الاتنين ... امين امين امين
نتكلم نقول ايه ... و نوصف ايه و نحلل ايه ... و القصة كلها مطينة بطين و هباب حالل كمان
مباراة 94 دقيقة لا فيها فرصة واحدة و لا لعبة حلوة و مدير فني سلحداري بالصدفة و فريق لا بيهش و لا بينش
الله يخرب بيوتكم انتم الاتنين في ساعة واحدة و دقيقة واحدة .. قولوا: امين .... اصبح انتظار مباراة للاسماعيلي ... عملية عذاب .. و الفرجة عليها عذاب في عذاب .. و من بعدها عذاب في عذاب في عذاب
اصبح الاسماعيلي ملطشة الملاطيش ... و الجماهير عايزه تتمسك باي حاجة حلوة و يا سلام علي العرض القوي امام الاهلي ... الجماهير مش عايزة تفرح جمهور الاحمر فيها .. ماشي ... لكننا قلنا ... لا كان فيه قدام الاهلي لا عرض و لا طول و الفريق زي هباب الحلل ... الناس زعلوا مننا
و قلنا السلحدار مش مدرب و لا كوتش و لا له في الباذنجان و كل القصة ان ابراهيم عثمان بيحبه و خلاص ... قالوا ياسلام علي الحماس و خلي الملعب نار يا سلحدار
العملية في المستطيل الاخضر ... حاحة تانية خالص ... عايزة خبراء و مخططين و ادارة و علم و قانون .. لكن خلف و عثمان خلوها ... خل مخلل
ابراهيم عثمان .. عايش في عالم افتراضي .. لوحدة خاااااالص و لا يصل اليه الا اصوات الطبالين و المبرراتية و المصلحجية ( و كلهم و الحمد لله عاملين للعبد لله - بلوك و بيعلنوا كرههم لموقع اسماعيلي اس سي سرا و علانية و الكل يعرفهم كويس ) ... و عثمان عايش و مش عايش كرئيس الاسماعيلي .. و مسلم كل حاجة للاستاذ المبجل الفريد زمانه و مكانه : محمد خلف .. مفيش في اعضاء مجلس السلاحف ( شنب ) يقدر يقول تلت التلاتة كام ... لمحمد خلف. حتي عضو مجلس الادارة تحت السن ... راح في الوبا من اول يوم ..كله اخرس اعمي ابكم .. امام محمد خلف
النتيجة ايه .. لا استقرار فني او اداري او معنوي او بطيخي داخل جدران النادي الاسماعيلي ... عايزين ايه و متوقعين ايه
فريق المقاولون العرب اقل من نفقات الاسماعيلي 50% علي الفريق الاول .. لكن عندهم مهندس اسمه محمد عادل ... رجله برقبة كل من يدير كرة القدم في النادي الاسماعيلي و معاه خيرة نجوم الفريق كمستشارين محترمين
الفريق الاسماعلاوي ... عايز مدير فني .. اختار اسوء المدربين و هاتهم .. الفريق الاسماعلاوي .. عايز لاعبين .. اختار اسوء اللاعبين و هاتهم و اطلع من نقرة و انزل في دحديرة و الخ الخ ... و طوال المواسم الثلاث السود مع ابراهيم و خلف . و القادم اسود من الهباب .. لكن مين بيحاسب و مين بيقدر يرفع صوته
و كل اركان المنظومة فاسدة فساد الكارتيلات .. زي ما شباب الجمعية العمومية .. اتضربوا بالشلاليت في قلب النادي الاسماعيلي و لا حد بيحاسب و لا بيتكلم و لا بينادي بالصح او بيقكر فيه من الاصل
علشان كده .. قلنا الاسود و الاسوء ... لم يأتي بعد
قلنا من سنوات طوال .. طالما لا يوجد جمعية عمومية قوية و محترمة للنادي الاسماعيلي ... سيتحكم في النادي الاوباش و العواطلية و الخونة و المصلحجية ... و هو ما يحدث ... و لا انت و لا انا و لا غيرنا حيقدر يفتح بقه ... و لو فتح بقه .. حيتضرب بالشلاليت في مكان حساس و بالقلم علي قفاه و علي أم رأسه .. و سيظل ابراهيم عثمان و خلف النوايب ... يدمروا في الاسماعيلي و يمحوا تاريخه ..حتي يسقط الاسماعيلي ... بلا امل في اي شئ
العملية الان ليست خسارة خمسة مباريات و لا مركز عاشر و الا عشرين .. الحكاية اصبحت مستقبل كيان بناه الاباء و الاجداد بضمير و رجولة .. و في زمن صعب .. و لكن الان بيضيعوه افراد من السفهاء .. و الكل بيتفرج و الكل اخره بعض ساعات غضبان و اتعشي و نام .. و خلص الامر و انتهي
لكن الاسماعيلي بيضيع و بيقع الوقعة الاخيرة ... اللي ما فيش من بعدها ... قومة علي الاطلاق
و خلف النوايب و عثمان بيه ... مكملين
و انتهي كلام خارج المقرر
