كرة الشامي الميتة + فخر = الفوز و 3 نقاط

هي كرة القدم كده من الخمسينات و ما قبلها و الي يوم الدين .. عندك

 لاعب خطاف تحرز اهداف و ساعتها لا تتعادل ..او تفوز ... ما عندكش لاعب خطاف مفيش اجوال و ساعتها لا تتعادل او تخسر 

ركزوا معايا في اللعب الطولي  للاعب محمد الشامي 95% بيخسر الكرة و تضيع منه و في مباراة اليوم امام الانتاج الحربي 3 فرص للشامي يستلم و يعمل الصعبة .. لكن لان رجليه الاتنين شمال .. تضيع الفرص  الواحدة وراء الاخري ... لكن بالدقيقة 69  و من اسيست للاعب العراقي همام طارق - يستلم الشامي بصعوبة و لكنه يتعلثم و يتخلبط و يتلخبط .. و كادت تضيع الفرصة - كالعادة .. لكن الكرة كانت علي موعد مع الوافد التونسي فخر الدين بن يوسف .. ليسدد صاروخ في شباك الانتاج الحربي و لا يراها عامر عامر و لا عامر عامر عامر  يعني 3 عامر .. الا و الكرة في الشباك محرزة الفوز للدراويش و 3 نقاط غالية و مهمة

جربنا رؤوس حربة - ميتين و عندهم اكتئاب  - و كرة الشامي اللي بيموتها - كالعادة - بتضيع  تروح ملح  .. لكن مع التونسي  فخر الدين .. هل هلال قمر الدين في الدقيقة 70

و منهم لله مجلس السلاحف و مجلس المغارة من قبله - كنا نسينا راس االحربة من ايام ما باعوا جون انطواي  

و بمناسبة اللاعب محمد الشامي - كان يومه حيبقي لون الزيتون النهاردة و الحفلة كانت حتبقي عليه الليلة .. ليه ... رجع تسبب في ضربة جزاء اتحسبت علي الاسماعيلي د 21 !!!!! و منها سجل معاذ الحناوي هجف التعادل وكان المظلوم و المجتهد محمد هاشم قد احرز هدف التقدم للدراويش  براسية خادعة و خرج حارس الانتاج الحربي - يقفش في الفراخ - و ترك راس هاشم يسجل هدف مبكر للدراويش د 6 

و رجع نفس الشامي و تسبب في ضربة جزاء للاسماعيلي د 29 بلمسة يد من معاذ الحناوي - برضه - و يسدد و يسجل كابتن الدراويش باهر المحمدي هدفا بذكاء  و بمعلمة د 29  و يعيد الدراويش للصدارة من اول  ضربة جزاء للاسماعيلي في الموسم الحالي

 لكن كان تراجع الاسماعيلي و اخطاء بالجملة و ارتباك دفاعي و لكن يعود الاسماعيلي الي الخطورة و يتجلي همام طارق و اسيست روعة الي عبد الرحمن مجدي و يسدد فوق العارضة 38 و يصاب محمد صادق افضل لاعبي الدراويش و يخرج و ينزل محمد مخلوف د 31 

و بالمناسبة قبل ما انسي  جماهير الاسماعيلي علي الفيس بوك  - اخر طراوة ... و لو كان لها في الامر شئ ..كنا فقدنا اجمل سيرد باك و هو محمد هاشم الذي يرتفع مستواه من مباراة الي مباراة و باصرار و صبر جميل و نتمني ان يكون عبد الرحمن مجدي ..عنده نصف اصرار هاشم ... و الا سيكون قريبا في الدرجة الثالثة ... نصيحة من القلب لعبد الرحمن مجدي .. العناد في الكرة و الطموح المبكر ..نهايته سودة  زي نهاية الحارس محمد عواد  

و يتجلي الحارس عامر اوس 2 في التصدي للتونسي فخر الدين و تسديداته د 48 و 86 و من مجدي  صاروخ فوق العارضة و راسبة من فخر فوق العارضة و هو اهم ملامح الهجوم الاسماعلاوي لتخفيف الضغط علي دفاع الدراويش مقابل فورةمن لاعبي الانتاج الحربي و الذي لا يريد الاستسلام حتي د 95 من المباراة و الحقيقة ان الحكم محمود ناجي قد بالغ في الوقت بدل الضائع و احتسب  دقيقة واحدة بالشوط لاول وخمسة دقائق بالشوط الثاني تغاضي عن ضربة جزاء صحيحة للعراقي همام طارق ... و لكن هذا لا يمنع التحية للاعبي الانتاح الحربي الذي لم يهزم من 9 مباريات و تلقي 3 هزائم  فقط بالموسم الحالي من الاهلي  المقاولون و بيراميدز و اخيرا الاسماعيلي لنتيجة 3-2 

فيه نقطة كمان في جماهير الفيس بوك و هي لو حاول الفرد يجمع اراء ( مين يلعب ومين يخرج و مين ينزل مكان مين  )  حيجي له صداع و شلل رعاش ..كمية خبراء فوق فوق العادة ... ايه ده كوله ايه ده كوله.. و مستحيل تلاقي اتنين متفقين - يخرج همام  ينزل بيومي و  لما خرج صادق ,  ليه ينزل مخلوف لازم ينزل بيومي .. و يخرج عبد الرحمن مجدي  و ينزل بيومي و كان مفروض يخرج بيومي و ينزل بيومي  ....  و كأن بيومي بسبعة ارواح و الطريف ان فيه احد المشجعين عايز اسامة ابراهيم  يعدم رميا بالرصاص و ينزل احمد كماتشو !!!!! اراء في اراء في اراء ...غريبة و عجيبة بصراحة

 لكن كل ده مش مهم ,,, عادي الخبراء في الفيس بوك هم امتداد للخبراء من ايام الستينات في ملعب الاسماعيلي القديم في الثلاثيني     

 لكن المهم اية - النهاردة 30 يناير و الساعة 8 مساءا و باقي 24 ساعة و مفيش تعاقدات و لا دعيمات

 روحوا الله يوقف نموكم .. يا مجلس السلاحف .. قولوا امين   

 و انتهي  كلام خارج المقرر