إسماعيلي إس سي - i s m a i l y S C - وبرضه عايز تغلب بيراميدز .. بأمارة ايه

وبرضه عايز تغلب بيراميدز .. بأمارة ايه

حجم الخط Decrease font Enlarge font
image

الاول أعتذر عن تأخر تقرير ( كلام خارج المقرر ) لظروف صحية .. و الله يعطينا

 و يعطيكم الصحة و الصبر ..طالما بنشجع الاسماعيلي

وزي ما قلنا في تقرير كلام خارج المقرر اللي فات وعايز تغلب الزمالك ... بإمارة ايه.. نقول : و برضه عايز تغلب بيراميدز .. بأمارة ايه

وعايز تغلب الزمالك ... بإمارة ايه 

 اقول لكم انا بالأمارة ايه

بأمارة الاخ محد الشامي اللي اضاع الفريق وافسد الهجمات كلها ولا احسن ليبرو في الفريق المنافس .. و اه و الف اه  لو كان حصل كده من عبد الرحمن مجدي .. كان زمان جماهير الفيز بوك .. علقوه في شارع السلطان حسين واللي ما يشتري يتفرج او يتنيل  

لكن علشان ده عبد الرحمن مجدي  و ده محمد الشامي .. علي قلب الجماهير زي العسل.. ضيع و اخرب الدنيا يا شامي

الاخ الشامي في الدقيقة 16 و 22 و32  و 52 و 53 و 61 و 77 - افسد هجمات و اضاع فرص لا تضيع من لاعب  رجليه الاتنين شمال 

لكن الجماهير عندهم خيار و فاقوس ..و ده عادي من ايام حرب البسوس ... تغفر لناس و تشنق ناس و ترتاح ويا ناس عن ناس ..زي ما قال العندليب الراحل 

الاسماعيلي حتي د 22 ..كان منظره يصعب علي الكافر و 7 لاعبين داخل منطقة الجزاء و ثامنهم محمد مجدي .. و  خمسة تنقلات للاعبي  بيراميدز داخل منطقة جزاء الاسماعيلي . و كأن لاعبينا ..واكلين شوال قطن و شاربين غراء ابيض 

و لم يستطع الاسماعيلي تهديد  مرمي بيراميدز الا عن طريق الكرات الطويلة المقطوعة بامتياز - ليس من المدافع - انما لاعب الاسماعيلي بيلعب كرات طولية بدقة تمرير %100 الي قدم الخصم و برافو بجد برافو - تمريرات طريقة جري المعيز - كمان مش نافعة  

 في الدقيقة28 ..كانت قمة الكوميديا لاداء الاسماعيلي ... الفريق تناقل الكرة 14  مرة و تمريرة - ليس عن مهارة او استعراض السيرك - انما مش عارفين  يلاقو ثغرة يمروا منها ... و في الاخر راح الصاعد الواعد المدافع الايسر محمود البدري ..رافعها في الاوت ... و خلصنا و خلص نفسه و خلص الفريق ... بلا وجع قلب

و الله الدقيقة 28 كانت نقطة  مضحكة جدا علي حالنا لون الزيتون الكالاماتا و ظهرت ابداعات ( حنجرة و كزبرة )  في الفريق واللي خلوه فريق مهرجانات

الاخوين ( كزبرة و حنجرة ) لم يفسدوا الفريق فقط - انما افسدوا الجماهير او بعضهم علي الاقل - لدرجة انك تري جمهور عجيب و غريب - اللي بيقول لعبنا ماتش كويس و اتهزمنا برجولة و لولا ضياع الفرص ... و لان اولئك الجماهير من دفعة محمد حماقي و حسن شاكوش  ... مش شايفين ان الاسماعيلي اضعف خط دفاع و بيمر منه اي لاعب منافس زي السكين في الجاتوة ...و احسن خط دفاع يهدي السكند بول الي المهاجمين و يقول لهم ..تعالوا هاجمونا كمان و كمان

ماتش ايه اللي حلو . و انت عندك مهاجمين لا يعرفوا يعني ايه كلمة مهاجم و الكرات القليلة التي تصل لهم - بيجي لهم طاسة الخضة و الرعشة و الكزة ... امام الجول

يمكن من اسباب تأخر  تقرير كلام خارج المقرر ... اني افتكرت هدف للراحل العظيم محمد حازم و بحثت عنه ..علشان نتفرج كيف كان الاسماعيلي بينهي الهجمة و تشعر وكان اللعبة متفق عليها  قبل لعبها و تم المران عليها 1000 مرة 

جملة تكتيكية غريبة و عجيبة بين عماد سليمان و حازم ..ارجو ان تتفرجوا عليها جيدا وتدققوا فيها جيدا ..كرة شبه ميتة .. و لكنها قدرات و كفاءات 

شوفوا معايا و سبحوا بابداع الخالق سبحانه و تعالي

 https://www.youtube.com/watch?v=Q4abaLfiK7A&feature=youtu.be

دقق جيدا في تحرك حمادة الرومي مع القماش - مع وقفة محمد حازم بجانب عماد سليمان و بينهما خطوات قليلة و .كيف تحرك حازم و اين ذهب في جزء من الثانية ... خلف المدافعين في اقل من ثانية و مع الكرة في الهواء ..  و كيف استقبل الكرة بالرأس بشكل اعجازي في قرار فيمتو ثانية ..رائع يا عماد و رائع يا حازم و رائع من البداية يا رومي ..هو ده الاسماعيلي   

كتير من الجمل دي ..كانت العلامة للاسماعيلي من ايام رضا و شحتة و العربي .. و اسامة خليل و علي ابو جريشة و من قبلهم بيضو و عوض عبد الرحمن  و صلاح ابو جريشة ... لكن جيل حسن شاكوش ..... بيقول لعبنا ماتش حلو

المباراة اتكشفت بدري من الدقيقة 6 عندما احرز جون انطواي  هدف بيراميدز .. الفريق اتفك تماما - لا هناك قائد في الملعب و لا جهاز فني خارج الملعب  و لم يظهر خطورة للفريق الا د 31 من فرصة احمد مدبولي و انقذها الحارس المهدي سليمان ببراعة و تسديدة د 44 من اسامة و من بكيتي 46 و يحاول فخر الدين بلا فائدة  ... وغيركده ..مفيش مفيش طوال الشوط الاول 

بالشوط الثاني - اتفتحت ماسورة الفرص واتفاجئ الجميع بتراجع فريق بيراميدز ومنح الاسماعيلي اللعب الهجومي... وكان المدرب الكرواتي ..عارف ان مفيش راجل هداف في الاسماعيلي وكلهم فسفس.. سيبوهم يلعبوا بدل القعدة علي القهاوي 

 و فعلا  لا رجال في الفريق يستغلوا الفرص و اضاع الشامي الفرصة الرابعة و الخامسة و السادسة و فخر الدين كمان د 56 و 84 و راسية محمد هاشم الي خارج المرمي د 88  بشكل عجيب - حتي لا يفرح ( كزبرة و حنجرة ) .. فيه نية وحشة في النادي ونفسيات عفنة ... ايه الحل 

الله اعلم ,,  حنخلص منهم امتي - ده لو ما خلصوش هما علينا قبلها

و ربك تعالي - هو الستار - استرها معانا يا رب

 بس سؤال لا يمكن نخلص قبل ما ننهي التقرير ... هو ليه وجيه عبد الحكيم نزل النهاردة في الملعب بدل بكيتي د 68  .. و متي كان اخر مرة نزل وجية في الملعب 

 سؤال وجيه ... وحكيم ...مش كده     

 وانتهي الكلام خارج المقرر     

جديد إس سي
image

الإسماعيلى يحصل على توقيع أحمد مصطفى

وقع اللاعب  أحمد مصطفى على عقد مدته 4 مواسم مقبلة مع النادي الاسماعيلي حسب الاتفاق المالي و التعاقدي مع مسئولي لجنة التعاقدات   والتى تضم الرباعى خالد
image

صالات الاسماعيلي يخسر 2-1 من المقاصة

تلقى فريق الإسماعيلى لكرة الصالات خسارة أمام مصر المقاصة بهدفين مقابل هدف فى المباراة التى جمعتهما ضمن منافسات الدور نصف النهائى بالدورة المجمعة.
image

مجدي و ايمن و البدري و صادق بالمنتخب الاوليمبي

قرر الكابتن شوقي غريب المدير الفني لللمنتخب الاوليمبي عمل قائمة المنتخب  40 لاعبا كهيكل مبدئي للفريق استعدادا للمعسكر القادم الذي سينطلق اول نوفمبر المقبل والسفر الي
image

الاتحاد العربي يكشف مواعيد المباريات بكأس محمد السادس

كشف طلال آل الشيخ مدير بطولة كأس محمد السادس للأندية العربية، عن مواعيد المباريات المتبقية في المسابقة المذكورة. وقال آل الشيخ في تصريحات على قناة الرياضية
image

احتمال اقامة مباراة الزمالك و الاسماعيلي في 25 اكتوبر

يدرس الاتحاد المصري لكرة القدم ولجنة المسابقات السيناريوهات المحتملة لمباراة الزمالك والإسماعيلي في الدوري حال قرر الاتحاد الأفريقي لكرة القدم "كاف" تأجيل مباراة الزمالك والرجاء المغربي.
image

صالات الاسماعيلي و المقاصة في تحدي خاص

يلتقي اليوم فريقا كرة الصالات , الاسماعيلي فريق مصر المقاصه فى دور قبل النهائي للدوري الممتاز لكره الصالات فى تمام الساعة الرابعة من عصر اليوم ’ على صاله الشرقيه للدخان
image

الزمالك والاسماعيلي قبل نهاية شهر أكتوبر الحالي

قرر الإتحاد المصري لكرة القدم إقامة الجولة الأخيرة لمسابقة الدوري الممتاز لموسم 19-2020 أيام 29 و30 و31 أكتوبر الحالي ومنها مباراة الزمالك والاسماعيلي وبجانب مباريات الجولة
image

وحيد : هناك شائعات هدفها إفقاد الثقة فى لجنة التعاقدات

صرح المتحدث الإعلامى للنادى الإسماعيلى علاء وحيد بأن النادى يناشد جماهيره الوفية بعدم الانسياق لما يتردد من شائعات هدفها إفقاد الثقة فى لجنة التعاقدات، نافيا ما تردد من إفشال لصفقة عن طريق تحديد اسم عضو باللجنة واحد وكلاء اللاعبين.
image

جمهور الدراويش و الصفقات و خد هات و صراع السماسرة

كل سنة ..يظهر العارض المَرضي ( بفتح الميم ) مرتين عند جماهير الدراويش – صيفا و شتاءا .. هو هوه نفس الكلام و نفس التقارير و نفس البوستات عن بوابة الكارتة
image

موقف فريق الرجاء بحدد موعد مباراة العودة بالعربية

من المقرر ان يحدد موقف نادي الرجاء البيضاوي المغربي بعد اكتشاف اصابة ثمان لاعبين بالفريق
Powered by Vivvo CMS v4.1.5.1