فشل السلاحف و القرود .... فاق الحدود
لوعندك ذرة من العدل او من العقل ...لا تلوم اي لاعب في الاسماعيلي
و لا اي واحد في الجهاز الفني
مفيش لاعب يستحق السباب و الانتقاد .. و لا محمد مجدي الجمل و لا اسامة ابراهيم و عبد الرحمن مجدي .. و لا حتي مجرد توجيه اللوم لهم
و الفرنسي ديديه جوميز و اللي معاه من اخوانا السلحدار او ابو جريشة او سعفان ... برضه لا لوم عليهم علي الاطلاق
مفيش لاعب .. يطلب منه المدرب انه يلعب , و يرفض و يقول للمدرب : لا يا كابتن انا لعيب وحش و انا حمار
مفيش مدرب حيقول له رئيس النادي تعال درب ... و يرفض ويقول للرئيس : لا يا ريس انا ما باعرفشي ادرب و انا حمار
و لو جبت واحد غطاس مجاري .. ولبسته شورت و فانلة .. و قلت له انت لاعب او انت مدرب ... حيقول لك و ماله ..انا احسن لاعب و احسن مدرب
يبقي مين الغلطان ... غطاس المجاري .... و الا اللي جاب غطاس المجاري
اي لاعب واي مدرب ... هما مجرد ادوات .. بتروح السوق و تختار و تنقي و بعدين تشتري و تخلي الادوات تشتغل
و لما يكون معاك ادوات كويسة و محترمة و متينة من الاصل و صناعة اصلية .... و تبيعها و تروح تشتري صناعة تيواني و مهزأة و دوبلكيت ... يبقي العيب برضه مش في الصناعة التايواني .. علي الاطلاق ... العيب في من يختار و يشتري و يبيع و كانه شغال نخاس في سوق العبيد و الجواري
و عايزين الخلاصة ... الاسماعيلي بالادوات اللي معاه دي ... احسب نقطة لكل مباراة ( في المتوسط ) في دستة المباريات القادمة و ربنا يسترها علي الاسماعيلي و جماهيره
و نصيحة ... استمتعوا باليوم و غدا الي يوم 28 اغسطس يوم ماتش طنطا و الاسماعيلي القادم ... لان القادم اسوء و اسوء من اللي فات
الخلاصة انه كان بيمثل الفريق اليوم 11 قرد في الملعب و 7 قرود علي دكة الاحتياطي و كلهم قرود في قرود
و من الدقيقة 14 من الشوط الاول و من عرضىة عشوائية من مدبولي و قلشها محمد هاشم ... الي الدقيقة 45+3 و هدف عماد حمدي اللي جاء بطريقة عنكب و شد و اركب ..الاسماعيلي ما دخلشي الثلث الاخير من ملعب حرس الحدود
و خلال من الدقيقة 14 الي الدقيقة 44 ... القرود ... بيلعبوا عجين الفلاحة و نوم العازب و رقصة عزيزة في فيلم الحرام و حلق حوش ..حوش حلق
لكن حرس الحدود بيلعب حتي اخر دقيقة و كاد لاعب حرس الحدود جريندو يضع الخابور الاخير من كرة طائرة وسط خيبة دفاع الدراويش بالدقيقة 94 و الحارس محمد مجدي كان حيتكسر ظهره و هو بيتابع الكرة فوق العارضة
طوال المباراة 100 دقيقة ..90 وقت اصلي و 2 و 8 دقائق وقت بدل الضائع .. اتحدي ان يكون متفرج الا وقاعد مبلم و منتظر تعادل الحرس لو كنا فائزين
و لان العبد لله شاف اجيال من ايام رضا و شحتة و العربي و علي ابو جريشة و اسامة خليل و محمد حازم و عماد سليمان و حمادة الرومي و احمد العجوز و فكري الصغير و الصاوي و اوتاكا و محمد صلاح ابو جريشة .. و بركات لا
كنت بتتفرج علي ماتش الاسماعيلي زمان و كانك بتاكل شوية سهلية مشوية علي جوزين كابوريا نتئ مبرطخين و معاهم بيض سبيط مع شوربة ام خلول .. و تحلي بقفص مانجو فص الفونس
دلوقتي بتتفرج علي ماتش الاسماعيلي و كانك واكل اكله مسمومة و بتحاول تستفرغ ... و لا مؤاخذة
الاسماعلاوية كانوا ملوك الكرة و الجمال و الموهبة و .... و ذلك اري من العدل جدا هو وصف كل لعيبة الاسماعيلي من عينة شيتا و كل عائلة البابون .. ومانجاني و تارامانجاني و بولجاني و تانتور و القرد الغيور تيرك و الحاجة (كالا ) ام طرزان و زوجها كيرشاك فعلا .. تنطيط و خربشة و تشليت و عبط العبط من الفريق بشكل مريب
و تشعر ان الجميع بيبحثوا عن صباع موز .. يمسك به المدرب جوميز خارج الملعب و لو حصل عليه احد القرود و لعب الماتش ... يصقف بايديه و رجليه زي القرد ميمون
شفتوا الشامي بيلعب بطريقة صباع الموز و الا شيلوجو .. هو ابو الموز نفسه و احلي ما قدمه ضربتي راس في منطقة الست يارد للاسماعيلي و لا احسن مدافع.. يا راجل ... ده مروان محسن برقبة كل هجوم الاسماعيلي ... تصدقوا دي
اوعوا تلوموا علي محمد مجدي انه تسبب في 3 ضربات جزاء ... محمد مجدي ما جراش ورا ا. محمد خلف و قال له : و النبي تلاعبني عندك يا عمو... لا ده عمو خلف هو اللي جري و جري و جري ورا محمد مجدي ..و بيعطيه راتب و تعاقد بمئات الالوف .... علشان يتسبب في 3 ضربات جزاء
اوعوا تلوموا علي الفرنسي ديديه جوميزة ... لان جوميزة جاء عن طريق البحث و السيرش علي جوجول و الحاجات العبيطة دي ... و تعال و النبي يا عم جوميز و خد دولارات و دولارات و درب عندنا و حيعجبك الحال عندنا .. بس اقفل خاشمك و حط لسانك....... في بقك
عايزين تلوموا .. لوموا من جاب اللاعبين وباع اللاعبين و فرغ الفريق بمباركة بعض جماهير النكسة و اللي بيكرهوا لعيبة الاسماعيلي كره العمي و تشعر منهم بالحقد علي اي لاعب بالفريق ... و يقول في اول فرصة و مع اول مسحة مناخير ...روح في ستين داهية غور
عايزين تلوموا .. لوم نفسك ايها القارئ العزيز.. لانك مش عضو في الجمعية العمومية و الناظر بيلعب بالنادي زي اليويو و باللي جابوه ... في وقت ما هو عايز و بالشكل اللي هوه عايزه ... مفيش واحد في الاسماعيلية يقدر يفكر يقول له... ثلث الثلاثة كام يا عم ابراهيم
رجالة الحرب الفيسبوكية محروق دمهم ( وده اخرهم ) بسبب اتوبيسات عمال المزرعه وعمال مصانع الجبس في راس سدر وفي المنطقه الصناعيه وعمال مصنع مواسير حلوان و لو عايز الدليل.. اقول لك
و لو رشح الناظر نفسه و معاه عطيطو و بطيطو و زعطيطو وكتاكيتو بني ... حينجح و حينجحوا و باكتساح كمان .. رغم أنفك و أنفي و أنف اللي يتشدد لنا
و لا حول و لا قوة الا بالله العلي العظيم
و انتهي الكلام خارج المقرر
