مين اللي ما يحبش حمص غير 4 في مصر

الواضح تماما ان هناك حالة من الراحة النفسية للاعبين في تواجد

نجمين في حجم و قيمة و قامة ... احمد العجوز و محمد حمص

اطلب من حضراتكم الرجوع الي لقطة احراز عبد الرحمن مجدي هدف جميل د 64 .... اين ذهب عبد الرحمن مجدي وجري اكثر من 3/4 الملعب  ... ذهب الي لاعبي الفريق الذين يقومون بالتسخين ... واختار  اللاعب المظلوم والمغبون حقه - دونا عن باقي اللاعبين وقبل رأس نادر رمضان وكانه يقول له حقك عليه انا يا نادر

ايضا اطلب من حضراتكم رؤية محمد الشامي وهو مرفوع بين احضان محمد حمص بعدما احرز الشامي هدف جميل د 88  .. وراس الصاعد موضوعة علي كتف محمد حمص بعدما احرز هدفه في الدقيقة 91
الواضح فعلا ان اللاعبين كان لديهم كبت وغل وحزن ورفض من ما يجري من كبرياء ال فرعون فيما يخص بعض اللاعبين

 
وبصراحة اقولها سبب عدم توفيق الكابتن ادهم السلحدار ومحسن ابو جريشة ..هو انهما كانوا  بيسمعوا الكلام وحاضر وامينا وجاءوا في فترة كانت كده وكملوا عليها
واللاعب عادة له قرون استشعار بيفهم كل شئ من الالف الي الياء .. ولو كان المدير الفني وافق انه يبقي شخلول و بيسمع كلام سعادة الفرعون ... قول علي المدير الفني يا رحمن يا رحيم  
ولو سمع محمد حمص واحمد العجوز الكلام وقالوا امين .. يبقي بلا ماردونا وبلا قاهر الطليان ... حيبقوا من جماعة سلاحف وغربان الفرعون .... وبأقولها من دلوقتي بصراحة و بالمفتشر ... ونحن في عز الفرحة بالفوز 4-0 علي نادي مصر

طبعا مش حنقول عودة الروح ولا عودة اللوح - لان الماتش كان نسبيا سهل وجميل ولكن الاهم هو استعادة الثقة وهنك احترام واضح من اللاعبين نحو نجم النجوم احمد العجوز وتاريخه انه احرف من احرف واحد في الفريق كله علي بعضه ... وللنجم محمد حمص وتاريخه الانظف من الثلج في الدراويش
وده فقط وتواجد حمص والعجوز ... فما بالنا بتواجد باقي النجوم الكبار زي محمد صلاح ابو جريشة وحسني عبد ربه ومحمد صبحي .. كانت حتبقي ليلة يا عمدة ولا الف ليلة و ليلة 
فاهم يا عم الفرعون الناظر .... يا ريت تفهم .. بقي لك سنين بتاكلها مكسيكي وسبيسي مع الجارليك كرييم  ... جرب المانجو الاسماعلاوي مرة في حياتك و الله ما حتندم خالص ... ويا رب عدي الايام اللي جاية علي خير و تندم بعيد عننا ... علشان الواحد جاب اخره خلاص

لكن كان فيه حاجة غريبة في مباراة اليوم لا تقول لي العجوز و لا حمص ... من الدقيقة 28 الي الدقيقة 48 ..ما كانش فيه اسماعيلي خالص ... اللاعيبة روحت و الجهاز الفني اخد تعسيلة والدنيا بقت تكلم تيكلم خالص وفريق مصر بقي مصر المقاصة !!! و 4 ركنيات و الكرة تعدي من قدام حارس الاسماعيلي محمد مجدي و هو شايفها و لا قادر يلمسها و 3 فرص تهديفية والكابتن خالد جلال بقي ايهاب جلال !!!! وطمع في الاسماعيلي وعمل تغييرات هجومية واللاعب محمد نصر د 45+2 ضاعت منه فرصة لو لبست الكورة في وش قدمه ...كان نزل محمد فوزي علي الفور بدلا من محمد مجدي 

 ...ده احنا بقت سيرتنا وحشة خالص  

ايه اللي حصل يا حضرات في العشرين دقيقة دول - فين حمص و العجوز وبلاش سعفان !!! لو تراجعنا امام الاهلي يوم الجمعة القدم حنشوف ليلة سودة ولا قرن الخروب ... و مفيش تراجع ولا استسلام يا عم العجوز اعمل معروف مش مهموز

واتصور ان فرص شيلنجو والشامي ومن بعدها طرد مدافع فريق مصر شريف اشرف ابو الشرف د 64 بواسطة الفار ... وكان لسه خالد جلال مفكر نفسه ايهاب جلال .... لكن عبد الرحمن سددها وهدها وشدها .. في الحارس المتميز عصام ثروت ..كان نقطة اختلاف موازين المباراة 

كلمة اخيرة للشخاليل علي الفيس بوك ... تعرفوا تسكتوا شوية لحد نهاية الدوري ... و بلاش تهدوا في الفريق و نجومه  و اهو عبد الرحمن مجدي بقي هداف الفريق رغم انف المنتفخين و المصدقين نفسهم انهم بيفهموا ,,, احسن من الكابتن الجوهري 

عبد الرحمن مجدي لاعب ممتاز و فقط يحتاج مدير فني و لو تتذكروا  تولي امره الكابتن علي ابو جريشة الهر الساحر مدة اسبوعين فقط .. دخل المنتخب الاول المصري... يا ريت تحرمونا من تحليلكم و حقدكم و النفسنة الكحلي  بتاعتكم ... خلينا نخلص من الموسم الغريب  و العجيب ده 

وربنا يسترها معاكم  و معانا       

والف الف مبروك الفوز والثلاث نقاط 

وانتهي كلام خارج المقرر