إسماعيلي إس سي - i s m a i l y S C - الاسماعيلي حزين ذليل , يحكمه المخابيل

الاسماعيلي حزين ذليل , يحكمه المخابيل

حجم الخط Decrease font Enlarge font
image

مرة اخري ..لا توجه اي سباب او حتي لوم خفيف الي اي

 لاعب في الاسماعيلي و لو حتي الحارس محمد مجدي  ربيب العملاق سعفان الصغير

لا تلوم و لا حتي تغضب من اي لاعب  .. اللوم كله او عايز السباب كمان يجب ان يوجه الي من جعل الاسماعيلي فريق حزين و ذليل ... يحكمه مجموعة من المساطيل  و المساخيط و المخابيل

القصة كلها من رأس السمكة العفنة المخبولة و المسطولة من زغاريد تتلف و تلف علي مجموعة من المجاذيب  و اللي جعلوا من فريق الدراويش .. حرافيش  ريش علي مفيش و ناقصهم ورنيش

القصة فعلا كلها مجموعة من المخابيل ... استعانوا بشوية مساخيط  تحكموا في الفريق من الالف الي الياء

و النتيجة .. اهي شايفنها عيانا بيانا .. مش بسبب الهزيمة من الاهلي

لان الهزيمة من الاهلي 3-0 هي نتيجة منطقية  طبيعية و متوقعة جدا ... و بلاش عناد و مكابرة  و تقول كان ممكن و كان و كان والحكم عاشور و الكلام اللي لا بيودي و لا يجيب و بيخلي العقل يغيب  .. و الا تبقي واحد من البهاليل اللي بيدعموا المخابيل

 و تعالوا نحسبها مع بعض  ... واحدة واحدة

لا يوجد  رئيس في نادي في الدنيا  كلها و بحالها و عرضها ... يسلم دقنه و قفاه الي مجموعة من الافاقين و البهاليل .. الا جابوا راسه في الارض و افسدوه و جعلوه فرعون فاشل ... زي اخونا الدولي المدرب بعقلية مشجع .... عراب بيع الحارس محمد عواد  ... و حلف براس ابوه كفرا و نفاقا ان الاسماعيلي مش محتاج حراس مرمي ... ازاي الحال بقي ... و انت شايف ايه يا عزيزي القارئ

 سعادة الناظر .... دخل عمر الوحش الثلاجة و حط في دماغه  شريحة زي الليمبي  8 جيجا ... و علشان الانتخابات و الاصوات .... رجع الوحش كابتن و المسدد الاول لضربات الجزاء و اساسي فوق الاساسي .. علشان كرسي صاخب المخل... ازاي الحال بقي

سعادة الناظر .. سلم عقله علشان ينام و ينام  يحافظ علي صحته كمان و كمان ... الي مجموعة اشارجية و شماشرجية .. جابوا له 14 افريقي و عراقي و ناميبي و غيني و اوغندي و موزمبيقي و من بلاد جبال التبت ... و لا واحد نافع و لا للدولارات شافع  ... و القصة كلها واضحة زي الشمس 

سعادة الناظر ... سلم قلبه و مفتاحه الي محترف التعاقد و جاب له مدربين  اجانب صايصين زي شوربة  الفول النابت ... و هات ده و مشي ده  و اطرد ده و انهي تعاقد ده ... و معاه شوية اجهزة فنية و لا اجهزة طرد سيفون الحمام ... و لا شكل و لا هيئة و لا منظر 

 سعادة الناظر ... تعاقد و لمرة الاولي لستة اشهر مع اللاعب التونسي فخر الدين بن يوسف الثقفي  و بصراحة انا خبرتي علي قدي و اعرف ان التعاقد بيكون لنهاية الدوري او الموسم و ليس بالشهر و اليوم ... و الا دي افتكاسة  ما سمعناش عنها و لا في مجلة ميكي  .. بمعني انه لو حتي مفيش كورونا... نفترض كده و كان تعاقد التونسي الي يوم 20 يوليو و اخر ماتش يوم 21 يوليو ... التونسي يقول مش لاعب .. عقدي انتهي امبارح ... معلش يا حضرة صاحب التعاقد .. اديني عقلك امشي حافي 

سعادة الناظر .. انهي تعاقد اللاعب باتريك كادو -  و هو يعلم ان مفيش غير المسخوط  الناميبي شيلونجو .. اللي جاب جولين في سنة .. بناءا علي ايه و ان كان عقد التونسي باليوم و بالشهر .. هل عقد كادو بالشهر و الا بالمتر .. هو كمان

و ...... و ......... و ............ و لو عدنا من دلوقتي لبكرة نعدد مشاريع المخابيل و المساخيط و معاهم شوية شخاليل علي النت - كل مهامهم الشتيمة في اللاعبين و عايزين يبيعوا  باهر المحمدي و عبد الرحمن مجدي ... و يجيبوا احمد الشيخ 

 هو انا ليه ما باتكلمشي عن ماتش الاهلي .. عايزيني اتكلم عن ماتش الاهلي 

حاضر

بس قبل كده ... كلنا كنا طايرين و فرحانين بالفوز علي مصر باربعة اهداف و قلنا عودة الروح ... طيب ليه قلنا  بعد ماتش الاهلي .. عودة اللوح !

لان فريق مصر ... معندوش ادوات اللي تلعب عليها .. لكن الاهلي يقدر يلعب عليك ... لان عنده ادوات و مدرب و تدريب علي تلاقي اللاعبين بعضهم البعض و نسبة التشتيت علي الاهلي في المباراة لا تتعدي 0.5% - بمعني ان كل هجمة لللاهلي  نهايتها ايجابية.. بينما نسبة التشتيت عند الاسماعيلي 68% في المباراة ..نسبة من المستحيل المقارنة بينهما علي الاطلاق و بالتالي كل محاولات الاسماعيلي انك تعدي  خط الوسط شئ مستحيل  عايزين دليل ..حاضر

في اول دقيقة ثم دقيقتين بالشوط الثاني كانت السنتر من حق الاسماعيلي ... الاسماعيلي تناقل الكرة 22 مرة خلال 72 ثانية  كلها عرضيات و الي الخلف و لم يتخطي خط المرمي علي الاطلاق  ... و بمجرد ضغط الاهلي استلم الكرة  و من الدقيقة 47  الي 51 - الاهلي لم يفقد الكرة الا و يستعيدها و يعاود الضغط ثم  ضغط بكامل قوته و كانت بالدقيقة 51  الكرة في عارضة  محمد مجدي 

و حتي بعد تغييرات لاصلاح خطأ التشكيل العجيب بخروج مخلوف و الوحش و نزول مدبولي و همام طارق -  خروج اتنين ارتكاز مرة واحدة !!!! و لذلك ظل الاهلي ضاغط و 3 ركنيات و عدم تراجع  من خط 18 الاسماعيلي الي خط الوسط ..تحكم احمر 100% ... و تغييرات هجومية من فايلر و العجوز قعد و ارتاح و حمص طلع لسانه .. و 4 ركنيات للاحمر  ... ركزوا في الكرة بتاعة الهدف الثاني للاهلي اللي احرزه اليو باجي 

كرة ميته .. لكن بالاصرار و اللياقة حتي من الزقلة وليد سليمان ,,, تم الاستحواز علي الكرة الضائعة و تمريرة الي باجي و شوطة شوطة .. محمد مجدي  اغلب من الغلب في المرمي و لو كان سعفان اللي واقف جول ..كان جابها .... لكن من الشبكة  

و لازم محمد مجدي .. يحط التاتش بتاعه في الجول الثالث للاهلي ... علشان الدولي سعفان يفرح  و يزقطط كمان كمان 

و لو راجعت توقيتات اهداف الاهلي و تغييرات المدرب فايلر الهجومية ... لازم تقول الحمد لله  و الحمد لله كثيرا 

و في الناحية الاخري .. مهاجمنا اللوزعي شالينجو اللي كانوا حيغيره في وسط الموسم بغطاء حلة بلاستيك .. اصبح مفيش علي الحجر غيره و اضاع فرص و فرص و الشامي ضيع هدف بطريقة تاكلينج خالد الذكر ايمن رجب مدافع الاسماعيلي في الثمانينات ...  و خناقة بين العملاق شالينجو  و بين الشامي د 16       شي حا لونجو يضيع فرصة لا تضيع د 27 و ركلة جزاء للوحش ..جزاه الله كل خير و اخونا الشامي لعب حتي خرج بطريقة جلا جلا و لكن عذره انه احول و رجليه الاتنين شمال و يخرج عبد الرحمن مجدي الافضل ليه مش عارف و ينزل وسط مدافع د 73  و تغييرات هجومية للاهلي  لان العجوز قال يأمن خط النص احسن تبقي قضيحة بجلاجل و جرسة بحناجل

و كفاية كده ... لاني عارف يعني ايه اسماعيلي و يعني ايه دراويش و يعني ايه برازيل العرب و كان اسمهم في الاربعينات الكوماندوز  و الهكسوس في الستينات ....  دلوقتي بقي اسمهم الزغاليل الفرافير

 ده ليه

لان بيحكمهم جاب اللاعبين دول ... مجموعة من المخابيل و المساطيل و المساخيط

اعذروني لاني حأطق من جنابي     

 و علشان كده .. انتهي  الكلام خارج المقرر

جديد إس سي
image

رابط الإصدار الجديد لموقع اسماعيلي اس سي

تشكر ادارة موقع اسماعيلي اس سي كل متابعي الموقع و رواده ... و يعلن عن رابط الاصدارالجديد لموقع اسماعيلي اس سي , مع استمرار تواجد الأرشيف القديم , نظرا لما يحتويه عن تاريخ و كنوز الدراويش الذهبية

سيراميكا يرفض رحيل محمد حسن إلى الإسماعيلى

كشف مصدر مسئول بجهاز الكرة بنادى سيراميكا أن الجهاز الفني بقيادة هيثم شعبان يرفض رحيل محمد حسن إلى الإسماعيلى رغم محاولة مسئولي الدراويش ضم اللاعب
image

اجتماع مهم فى الإسماعيلى

الإسماعيلية - خالد لطفي: يعقد المسئولون بالإسماعيلي اجتماعًا مهمًا خلال أسبوع بعد غلق باب الترشح أمس لانتخاب مجلس للدورة الجديدة 2021 /2025 المقرر انعقادها 31

بورصة أخبار الإسماعيلى

طرد "العمدة"  شهدت مباراة الإسماعيلي وبلبيس الودية التي انتهت بالتعادل بهدف لمثله طرد عماد حمدي   نجم وسط الدراويش لدخوله في شجار مع لاعب منافس وصلت للاعتداء
image

استبعاد جديد للأفارقة في اختبارات الدراويش

   قرر الجهاز الفنى للإسماعيلي صرف النظر عن التعاقد مع المدافعين السنغاليين والمهاجم النيجيري بعد أن ثبت ضعف مستواهم مع اتاحة الفرصة لمحترفين أفارقة أخرين للخضوع

طلعت يوسف يعزل اللاعيبين عن اجواء الانتخابات

  قرر طلعت يوسف المدير الفنى للنادى الإسماعيلى عزل فريق الكرة عن أجواء الانتخابات التى تسيطر على المشهد داخل القلعة الصفراء، حيث يخوض الفريق تدريباته صباحا
image

القائمة الكاملة للمرشحين بانتخابات النادى الإسماعيلى

في تمام الساعة السابعة , أغلق باب التقدم لاوراق المرشحين لعضوية مجلس ادارة النادي الاسماعيلي في اجتماع الجمعية العمومية العاديةو المقرر إجراءها يوم 31 اكتوبر القادم و القائمة الكاملة مع حفظ الالقاب
image

الإسماعيلي يتعادل مع بلبيس وديا

تعادل الإسماعيلي مع فريق بلبيس أحد أندية القسم الثاني بهدف لكل منهما ،في المباراة الودية التي جمعتهما مساء اليوم ،على ملعب فندق ميركيور المطل على
image

بعد خرابها : عثمان العثمانين علي الحياد تماما من انتخابات النادي

صرح المهندس محمود عثمان ، بأن " العثمانين " على الحياد تماما في انتخابات مجلس إدارة النادي الإسماعيلي ، وأشار بأننا سنكون على مسافة واحدة
image

بيان من المهندس محمود عثمان

العثمانيين " على الحياد تماما في انتخابات النادي الإسماعيلي وعلى مسافه واحدة من جميع المرشحين  كتب : هشام زكريا  صرح المهندس محمود عثمان رئيس مجلس إدارة مجموعة
Powered by Vivvo CMS v4.1.5.1