إسماعيلي إس سي - i s m a i l y S C - بودي إتعادل علشان خاطر أحمد عثمان

بودي إتعادل علشان خاطر أحمد عثمان

حجم الخط Decrease font Enlarge font
image

انا شخصيا بأعتبر لوم اي لاعب في الاسماعيلي

 نقصان من العقل .. وحتي لوم البرازيلي ريكاردو هو نوع من الظلم .. لانه سادس مدير فني يحضر للاسماعيلي علشان يعك و يذك و لا يمكن ان يكون العيب في 6 مديرين فنيين و احونا ابراهيم عثمان برئ زي الذئب من دم الاسماعيلي
 

يا عزيزي القارئ - سيب المدير الفني اللي جواك ينام شوية وفكر بعقلك ... ايه اللي حصل للفريق في عهد 6  مدربين فنيين ومنهم اصحاب نجاحات خارج الاسماعيلي.. لكن في الاسماعيلي لازم يفشلوا ..  نقول علي ميودراج طورشجي وعلي يستش بودرجي وعلي جوميز جزمجي .. وقبلهم نور الدين مضوي ... كفتجي ... كلهم كلهم علي وزن ..أجي ... لكن ابراهيم عثمان هو اللي صباية موز ومن ابو نقطة كمان

 مدرب يجيي الاسماعيلي ... يعتمد علي وجيه وفقوسة ونانوسة .. مدرب يجيي بعدها يعتمد علي شالينجو وعفركوش ومدرب تاني يجي يعتمد علي حمدي سخسوخ وبرعي بطروخ ... كله عك في عك في عك ... المشكلة كلها في دماغ اخونا ابراهيم عثمان والله و الله .. ما في لوم علي لاعب  او مدير فني و لو جبت محلل فني يقيم ما جري للفريق - حيجيله تخلف عقلي وعبط و حيلبس طرطور احمر  

اللعيبة مش عارفه تنقل نقله الي الامام ولا عارفه مين بيلعب اساسي وهو لازم يتغير اول الشوط التاني وينزل اللي بيلعبوا اساسيين ويخرج اللي مش اساسي ... اللي لعب اساسي و ينزل الاساسي اللي ما كانشي اساسي من بداية الماتش ... عك عكوك عكك  بيتلكك الواد البرازيلي علشان يكون له بصمات و بلح  زغلول و بلح إمهات

 الفريق في الشوط الاول نسبة استحواذه 57 % للاسماعيلي و سموحة 43% و مفيش لعبة خطرة للاسماعيلي علي الجول الا لعبة نص نص د 38  و اول هجمة  لسموحة د 25 ومع ذلك لا ريكاردو فاهم ولا العجوز فاهم ولا ابو طالب فاهم ...هما بيعملوا ايه .. انا قلت مفيش لوم علي اللاعبين ... طيب محمد حمدي زكي بيلعب جناح و الا ورك و الا صدر ..محدش فاهم حاجة .. فريق عاجز علي تهديد مرمي الخصم علي الاطلاق وفي الدقيقة 45+2 يحرز رجب نبيل هدف التقدم لسموحة ... عدالة بصراحة بسبب محمد فوزي طلع معووج ومقموص .. لكن محمد فوزي ينقذ الاسماعيلي من ضربة جزاء ببراعة  د 82  ومن الدقيقة 47 الي الدقيقة 82 ... مفيش اي حاجة علي مرمي سموحة وحارسها الإيج ( بالانجليزي ) ... و يقترب الوقت الاصلي من النفاذ و الهزيمة 14 في الطريق ومفيش بقي حاجة نبكي عليها وكل لاعب بطربوش ابوه ..هنا وهناك في فريق سموحة او فريق اللي كانوا دراويش

طيب ليه انا حاطط صورة المهندس احمد عثمان ... نقول بعد شوية

 يبقي مفيش حل غير الشغل الفردي ..زي امام طلائع الجيش وشوطة مدبولي .. يبقي شوطة عبد الرحمن مجدي هي الحل وفي الدقيقة الاخيرة بالوقت بدل الضائع

بس هي نقطة يا عزيزي القارئ الهُمام .. لو لقيت واحد تاني علي الفيس بوك بيشتم عبد الرحمن مجدي ... حط صباعك في عين اي واحد يتطاول علي اي لاعب يرتدي الفانلة الصفراء ... ولو عايز تمسح بيه الارض ..انت حر ... و كفاية اللي عملوه خبراء الغبرة في ابراهيم حسن نمرة 7

المهم اتعادلنا والحمد لله و نقطة احسن من مفيش والمهم نبقي في المربع من 12 الي 15 وتعدي السنة العثمانية دي علي خير وساعتها يبقي لكل حدث حديث  

نيحي بقي لصورة المهندس احمد عثمان وعبد الرحمن مجدي اتعادل علشان خاطره ليه

الاول لازم نعرف ان المهندس احمد عثمان رجل ناجح ومحترم  و رئيس غرفة تجارية باقتدار ووكيل نقابة الهندسين باحترام ... لكن جيت ليه يا باشمهندس احمد عثمان مع اخوك الجميل ابراهيم عثمان في زيارة وتحفيز اللاعبين

طيب ما الفريق متنيل بستين نيلة من سنتين وتلات مواسم .. ما جيتشي تحفزهم ليه... طيب ما نصحتش اخوك ليه وحفزته انه يحفز الفريق بكام احفوزة من التعاقدات الصح ام فلوس وان لا يبيع اي لاعب احفوز تاني

يا مهندس احمد عثمان .. انت جيت تظهر في الصورة علشان الانتخابات وان شاء الله حتفوز حتفوز ..ما كانشي لها لازمة انك تهبط نفسية اللاعبين لانهم لعيبة ولاد بلد وفاهمين الفولة.. والنكت طلعت من اللاعبين والجهاز الفني و حتي من عمال النادي بالكيلو لزيارتك الميمونة والمفقوسة .. والتي اتلفت ما قام به قدامي اللاعبين من دعم الفريق نفسيا ومن داخل الاسماعيلية ومن خارجها لمئات الكيلومترات وحتي لم يستقبلهم اخوك الجميل ويجلس معهم او يستمع اليهم ... لانه عارف انه كان يسمع من المنقي خيار اللوبيا

حتي الهر الساحر علي ابو جريشة والفاكهة محمد صلاح ابو جريشة ذهبوا الي معسكر الفريق في القاهرة لانهم عارفين كويس ان اخوك الجميل ولا كان حيعبرهم لو كانوا راحوا الاسماعيلي ونزل بيان بيشكر اللاعبين تجاوزا للخلافات .. خلافات ايه بس ..ما تخلينا ساكتين احسن

وطبعا ممكن تزعل من كلامي يا مهندس احمد عثمان ولكن الصراحة افضل من من ينافقك وانا عارف قيمتك كويس وخاصة ان امامك سنة كمان حيكون شقيقك الجميل رئيس الاسماعيلي وموسم كمان . الله اعلم به , انصح اخوك وعقله كويس وفهمه ان خلاص السنة دي لو عدت علي خير وعلي الحركرك  .. الموسم اللي جاي مش حيرحمنا .. وان لم ينصلح الحال .. الطوفان قادم .. صدقني الطوفان قادم ... والله الطوفان قادم.. لان الفرق الجماهيرية لا تهبط من اول موسم تتعرض فيه الي الهبوط ..التاريخ بيقول كده

 

وكل الشكرو التقدير للاعب المحترم الذي يرتدي الاصفر عبد الرحمن مجدي ..لانه انقذ الزيارة وما خلاش وشها وحش

مش كده و الا ايه   

 

 وانتهي الكلام خارج المقرر

 

 

 

 

جديد إس سي
image

ريكاردو: الإسماعيلي سيدفع بالناشئين أمام الزمالك

أكد البرازيلى هيرون ريكاردو المدير الفنى لفريق الكرة الأول بالإسماعيلى أن الفريق يستعد بكل جدية لمواجهة الزمالك رغم ضيق الوقت. ويلتقى الإسماعيلى مع الزمالك فى مواجهة
image

مران الدراويش .. الارتداد السريع والتسديدات وتعليمات ريكاردو

واصل فريق الكرة الأول بالإسماعيلى الاستعداد لمواجهة الزمالك يوم الأثنين المقبل ،فى إطار الجولة الختامية من عمر مسابقة الدورى المحلى.
image

الاسماعيلى (ما بين الاستثمار والاستغلال) ... الجزء الرابع

- بقلم ا. نهاد حجاج ..بداية قبل قراءة الجزء الرابع يجب الاطلاع جيداً علي الأجزاء الثلاثة السابق عرضهم علي صفحتي الرسمية كي يتبلور المشروع لدى
image

الاسماعيلي يعود للمران لمواجهة الزمالك 26 اكتوبر

بدأ فريق الإسماعيلى الاستعداد لمواجهة الزمالك في الأسبوع الــ34 و الاخير من الموسم الحالي 2019/2020
image

الإسماعيلى فى اجتماع مع الزمالك لتحديد موعد المواجهة

توجه طارق أبوالليل المدير الإدارى لفريق الكرة الأول بالإسماعيلى اليوم لمقر اتحاد الكرة لحضور الاجتماع ممثلا عن النادى بجانب ممثل عن نادى الزمالك إضافة لمحمد
image

إنجاز جديد .. فرسان الدراويش يحصدون برونزية الصالات

حصد لاعبو الإسماعيلى لكرة الصالات المركز الثالث ببطولة دورى الصالات ، بعد الفوز على الإعلاميين بضربات الجزاء الترجيحية بنتيجة 6 ركلات مقابل 5.
image

الإسماعيلى يحصل على توقيع أحمد مصطفى

وقع اللاعب  أحمد مصطفى على عقد مدته 4 مواسم مقبلة مع النادي الاسماعيلي حسب الاتفاق المالي و التعاقدي مع مسئولي لجنة التعاقدات   والتى تضم الرباعى خالد
image

صالات الاسماعيلي يخسر 2-1 من المقاصة

تلقى فريق الإسماعيلى لكرة الصالات خسارة أمام مصر المقاصة بهدفين مقابل هدف فى المباراة التى جمعتهما ضمن منافسات الدور نصف النهائى بالدورة المجمعة.
image

مجدي و ايمن و البدري و صادق بالمنتخب الاوليمبي

قرر الكابتن شوقي غريب المدير الفني لللمنتخب الاوليمبي عمل قائمة المنتخب  40 لاعبا كهيكل مبدئي للفريق استعدادا للمعسكر القادم الذي سينطلق اول نوفمبر المقبل والسفر الي
Powered by Vivvo CMS v4.1.5.1