يا فرحة ( أم مريم ) بيك.. يا ريكاردو
هما لقطتين ..يلخصوا المباراة .... و اللقطتين مش أهداف و لكن فيهم الخلاصة
اللقطة الاولي كانت في الدقيقة 30 و بعد التعادل 1-1 .. توغل و أبدع و راوغ و مرر عبد الرحمن مجدي و هدف يضيع من فخر الدين بن يوسف و مدحت فقوسة.. و يا سلام لما عبد الرحمن مجدي يلعلع زي بشير عبد الصمد و لكن مفيش محمد صلاح ابو جريشة و لا ياسر عزت و لا علي ابو جريشة الكبيرو لا حتي عوض عبد الرحمن .. كان الكرة زمانها في الشبكة و هدف هدفا جميلا
اللقطة الثانية و هي بالدقيقة 96 و في الثانيةالاخيرة الاخيرة جدا من اللقاء و الكرة ترتطم باسفل القائم لحارس مرمي الانتاج الحربي من تسديدة عبد الرحمن مجدي و الحكم محمود البنا يصفر بانتهاء المباراة و حارس الانتاج احمد فتحي قعد ييصرخ بعدها و احنا صرخنا كلنا و قلنا : علي قدر نياتكم يا مجلس السلاحف ترزقون
اومال فين المشكلة اللي خلت ( أم مريم ) تزعل و تقفل التليفون و لا ترد علي ابراهيم عثمان.. تاني
المشكلة هي دماغ البرازيلي هيرون ريكاردو ة شادر البطيخ اللي معاه علي الدكة
ازاي .. اقول لكم
النهاردة شفنا جمل تكتيكية بتتعمل في الملعب .. و شفنا اصرار علي الفوز و اهداف بالجملة من الاسماعيلي و شفنا عودة اللي اللقاء مرة و مرتين فوز .. و تألق فوق العادة من الحارس محمد فوزي و انقذ اكثر من هدفين انفراد كمان
اومال فين المشكلة
لعب ريكاردو مبارة المصري بتشكيل و التغييرات التالية
محمد فوزي - محمد بيومى - محمد هاشم - مروان الصحراوي - محمود البدرى و عماد حمدي- محمود دونجا - محمد عادل ( شكري نجيب د 76 ) و أمامهم الثنائي - أحمد مدبولى ( عبد الرحمن مجدي د 46) - آري بابل ( مدحت فقوسة د 76) - فخر الدين بن يوسف ( محمد الشامي 67 )
اما مباراة الانتاج الحربي لعب ريكاردو و شادر البطيخ بالتشكيل و التغييرات التالية
لعب الاسماعيلي بتشكيل مكون من محمد فوزي و رضوان الشريفي و محمود دونجا و مروان الصحراوي و نادر رمضان و عماد حمدي ( محمد هاشم 38) و مدحت فقوسة ( محمد عادل 61 ) و عمر الوحش ( محمد صادق 6) و عبد الرحمن مجدي و فخر الدين بن يوسف ( شكري نجيب 77 ) و اري بابل ( محمد الشامي د 61 )
طبعا كل لون له معني يعرفها من تابع المباراتين ..سواء من لعب اساسي او بديل و في أماكن في منتهي الحساسية ... بمعني هدم اي استقرار او انسجام من بداية التشكيل .. و طبعا حصل اصابة للكابتن عماد حمدي ( مفيش مشكلة مع تغيير اضطراري ) .. لكن مع العك و تغييرت ثلاثة في الدقيقة 61 و من بعدها فرط الملعب و الفريق فك و هدفين للفريق الضيف د 80 و 85 .. يوضح شكل المكرونة بالبشاميل اللي عملها ريكاردو و شادر البطيخ علي الخط و بص شوف دونجا يلعب مساك و العبد لله بيكتب التشكيل .. تصورات ان التشكيل مرسل لي غلط و سالت : بتقول ايه دونجا مساك .. متأكد ؟؟ دونجا بتاعنا مساك !!! و لكن ظهر ان الاخ ريكاردو مش هامه حاجة طالما موضوع ( ام مريم ) طلع فايك و فايك علي فايك .. ما يروللش
و اهم نقطة هو لعب عمر الوحش من الدار الي النار و محضرشي العشا اللي عزم فيه رئيس النادي اللاعبين و حلف - بتمثال ابوه- ما حيشمها الوحش الا لو تنازل و جدد ... الوحش جدد و تنازل و تنازل و جدد ... فلعب اساسي و هو ظلم للاعب و قدراته قبل ان يكون ظلم للفريق
و ارجعوا الي الدقيقة 46 و الجول مفتوح و النقاط العامية لحارس مرمي الانتاج كثيرة للزحمة من المدافعين و لكن عمر الوحش فاقد التركيز و اللياقة الذهنية و سدد كرة ضعيفة جدا جدا جدا و ضاع هدف من تخصص عمرالوحش ... قارنوا ذلك مع كرة و هدف محمد صادق .. من نفس النقطة و المسافة تقريبا .. لتعرفوا جيدا الفارق في الامكانيات و اللياقة الذهنية اللي افتقدها عمر الوحش بسبب ما تعرض له اخر اسبوع مع ان الوقت كان طويل جدا لانهاء مشاكله و تنازله و تجديده قبل بداية الموسم بفترة ... يا سلاحف الغبرة
ايضا نادر رمضان ما شمهاش الماتش اللي فات ... العب اساسي يا نادر و شيل الطين و شيلنا يا نادر.. و ادي دقني لوشفنا نادر تاني الا نادر و حتي رمضان القادم و لا العيد الكبير كمان و هو المدافع الايمن صعب كده و مختاج ايه غير ذمة و اخلاق يا سلاحف
احمد مدبولي كان قليل الماتش اللي فات ... اطلع بره يا مدبولي .. و مش عايزين صانع العاب و سيب منطقة ما بين دائرة الوسط حتي منطقة المناورات ..ما فيهاش سريخ ابن يومين و العب و هيص يا عم مختار مختار .. و منها اعمل ثروهات يا انتاج و هدف و كمان و كمان
و من الدقيقة 8 الي الدقيقة 16 تراجع للاسماعيلي و هدف للانتاج و من الدقيقة 70 الي الدقيقة 80 تراجع للاسماعيلي و هدف للانتاج و كل ده و شادر البطيخ .. قاعد علي الرمل و مستني الزبون و الهدف الثالث للانتاج ... انت عامل ايه يا ريكاردو دلوقتي
المشوار لسه طويل طويل يا ولدي و باين اننا حنشوف ايام اسود من قرن الخروب مع الفريق و الجهاز الفني و شادر البطيخ في التوهان و اي مطالبات في تدعيم الفريق في يناير القادم .. حيضيع في الهوا .. طالما فيها عوض و عليه العوض و منه العوض
يا عدوي
و انتهي الكلام خارج المقرر
