بالرغم من خلف الناظر.. فزنا علي أسوان
هو ايه اللي جاب سيرة ا.محمد خلف , دلوقتي و احنا فايزين الفوز الاول و لثلاث
نفاط جايبين و لستة بونط مجمعين و فرحانين و مزأططين .. حاقول لكم
الواضح كده .. ان الفريق فيه إمكانيات..ممكن يجيي منها .. و لكن اللاعبين عيونهم مدغششة و اعصابهم مفككة و رُكبهم مخلخلة ... ركزوا كده في اي لاعب بيستلم الكرة..تحس انه زي الكتكتوت المبلول في يناير
الفريق نفسيته ضايعة .. و دماغه فل الفل خالص ... ليه يا تري يا هل تري
بسبب وجود الناظر و تابعه خلف في النادي
ارجو ان ترسلوا الناظر و خلف لتولي شئون نادي برشلونة ... حيصبح فريق أم سحلول الكتالونية
و بصفتي مؤلف كتاب ( تشكيلات الاسماعيلي من سنة 1948) .. و كل تشكيل موسم ما كان نصف صفحة ... و مع الادارة السابقة ( مجلس المغارة ) بقي صفحة الا ربع ... و لما وصلت الي الايام السودة مع الناظر و تابعه (قفة ) و ( مجلس السلاحف ) .. تحولت النصف صفحة الي صفحة و نصف من العك و القص و اللزق و الشخبطة و اللخبطة .. مين راح و مين جه و مين و فين و اشمعني و بكام
حمل الكتاب .. و احكم بنفسك
صفحات التشكيل مع سعادة الناظر ... حاجة كده زي بيت جحا مع الناظر و تابعه خلف
و علشان كده - ان من يتابع ( العبد لله ) ستجده لا يوجه اللوم الي اي لاعب علي الاطلاق و اي لاعب هو مسئول عن نفسه و ليس مسئول عن من أتي به الي الاسماعيلي .. بمعني هي كده ..مين عمل كده من الاصل غير سعادة الناظر و تابعه قفة
و اللوم ايضا ليس علي ا. محمد خلف .. لان من أتي به هو الناظر و لو ما كانش هناك محمد خلف .. سيكون هناك مصطفي خلف او شكري خلف او محمود خلف او منصور خلف ... و المهم هو الناظر اولا... و اخيرا
و لو ركزنا في طريقة اداء الفريق اليوم امام اسوان سنجد ملاحظات كثير بين انعدام الثقة و الانانية المطلقة من المهاجمين و عدم وجود منهج محدد للاداء و ستجد ثغران في كل مربعات الملعب و سوء انتشار و عدم تنسيق اداء الخطوط
يرجع كل ذلك الي عبارة واحدة ... و هي عدم التركيز
و كيف نطالب الفريق و اللاعبين بالتركيز .. و اصلا اللاعبين راكبين مرجيحة من مراجيح مولد الشيخ ابو المطامير .. مرجيحة شوية فوق و شوية تحت ... و من تحت لفوق و من فوق لتحت
صدقوني اسلوب ادارة الناظر و اللي معاه شوية شخاليل وبهاليل و شخاشيخ و مستولي علي كل شئ هو الاستاذ خلف ... كل ده بيجعل افضل لاعب في العالم .. سيكون مثل بح بح ... و يحول ( بيج رامي ) الي ( رامي السفروت ) .. ادارة الفرق الرياضية علم خاص جدا جدا و محتاج خبرات عالية جدا و لا يملك منه الناظر قيد أنملة ( حلوة قيد أنملة دي ) و هما كلهم في الطراوة
و تعالوا نركز في د 23 و اوفسايد شيلونجو و محاولة مدبولي د 28 و محاولة محمد عادل د 17 و تسدية شكري د 66 و طرقعة فخر الدين د 71 و هدف محمد صادق د 80 .. ستجد خليط من الذهب و الصفيح و من الجمال و الهباب في وقت واحد و هو لا يعني الا شئ واحد
و هو عدم الاستقرار الفني و الاعداد النفسي و اسلوب اللعب و كل ذلك راجع الي عدم الاستقرار علي مدير فني فاهم و واعد و محترم
و مين بيعمل المصايب دي كلها الا سعادة الناظر و تابعه الامين المحبوب
القصةكلها من خارج المستطيل الاخضر و ما نراه داخل المستطيل الاخضر الا هو نتاج للعك في اسوء معانيه من ادارة و الاشراف علي الكرة في النادي الاسماعيلي
عموما الف الف مبروك و الثلاث نقاط طعمهم شربات مهما كان .. و لعلنا نخرج منالحالة المرجيحية اللي الفريق فيها
و مش حنخرج منها الا برحيل الناظر و تابعه و مجلس السلاحف الخرساء ... صدقوني ده الطريق الوحيد لعودة الدراويش
و انتهي الكلام خارج المقرر
