إسماعيلي إس سي - i s m a i l y S C - بقلم ا.معتز الدراويشي

بقلم ا.معتز الدراويشي

حجم الخط Decrease font Enlarge font
image

ألتراس يلو دراجونز..طريق تغيير ثقافة المشجع الإسمعلاوي..أشكركم من قلبي لموقف ماتش الاسماعيلي والترجي


 

السلام عليكم ورحمة الله وبركاته

إنتهى ماتش الاسماعيلي والترجي التونسي الرياضي بخروج الدراويش من دوري أبطال العرب





إنتهى الماتش ... وبدأت معاه أحزان الاسمعلاوية في كل مكان !!


دا طبيعي !!


احنا بنعشق فريقنا عشق ملوش حدود ... أكيد لازم نفرح لما الفريق يفوز ويمتع ويبقى "بصحة" جيده... ونزعل لما الفريق يخسر وأداءه يبقى سئ أو يوم ما يبقى الفريق "مريض"!!



ولكن ...


رغم أن الخسارة المره دي كانت مصحوبه بالخروج من بطولة مما زاد الحزن والنار في القلب ... ورغم أن كانت أمنيتنا العظيمه أن نكون أول فريق مصري يحصل عليها كما فعلنا مع أول بطولة أفريقية على الإطلاق

إلا إن في أمور ايجابيه جميله جدا جدا شاهدناها في هذا الماتش !!


أمور ... كان صعب نشوفها في الماضي ... بسبب بعض السلبيات اللي موجوده في جمهورنا العظيم !!



جمهورنا ... جمهور ذواق ... بيفهم كوره ... على دراية كاملة بكل جزء من أجزاء الملعب ... يعلم تماما من أي جزء تكون خطورة الدراويش على فريق الخصم .. ومن أي جزء يكون نقطة الضعف ... لذلك تعودنا أن نسمع تحليلات من الجمهور كله قبل وأثناء وبعد كل مباراه بصرف النظر عن نتيجتها !!!


جمهورنا ... جمهور عاشق ... الاسماعيلي هو الماء والهواء بالنسبة للاسمعلاوي ... يسافر وراء الفريق في كل مكان .... وفي ستاد الاسماعيلية نجد الأطفال والنساء والناس الكبار حاضرين ليكونو بالقرب من هذا الكيان العظيم !!!

لذلك نجد من جمهورنا أنه دايما يضغط على اللعيبه من المدرجات إنهم يقدموا أحسن ما عندهم للفوز بالمباراه ورفع شأن النادي المعشوق

ورغم جمال هذا الجمهور ... ولكن نجد سلبيات تحرق القلب !! أركز على نقطة منها .... هذه النقطه بدأت تلفظ أنفاسها من ماتش الترجي !!!

ألا وهو الهجوم على اللعيبة وشتيمتهم قبيل إنتهاء ماتش وبعد انتهاءه في حاله لو الفريق خسران وأداءوه سئ !! خاصة لما يبقى ماتش بطولة أو ماتش مهم جدا مثل ماتشات الاهلي والزمالك والسويس!!

ولكن اللي شفناه امبارح ... حاجه تفرج القلب رغم الحزن الشديد والصدمه اللي كلنا ذقناه بعد خروج معشوقنا الاول وأمير عرش قلوبنا ... دراويش الكورة المصرية !!



الجمهور ... ولأول مره من زمااااان أوي ... لا اعلم من امتى .... نحيي لعيبتنا بعد انتهاء الضربات الترجيحيه وخروج الاسماعيلي من البطوله !!

مشهد مؤثر !!! أثر جامد في اللعيبه ... كلهم بكوا من هذا المشهد العظيم ... بعد ما كان فضل والسعيد فقط اللي بيعيطوا على اهدارهم لضربتي الجزاء !!

اللعيبه بكت وتأثرت .... لانها ولاول مره ... ترى الحب من الجمهور !!!

 
ايوا زي ما بقولكم كدا ... الحب ... الحب الحقيقي !!!




ألا ترون .... إنه بخس لحق اللعيبة "مهما عملوا فينا" ... إن نحييهم قبل كل ماتش ونهتف باسمهم وننادي عليهم ... ونيجي بعد الماتش نشتمهم ونهاجمهم ونسبهم باللي خلفوهم ؟؟؟

ألا ترون ... إنه ظلم كبير ... لما لاعب معين يعمل ماتش عالي اوي ويجيب الفوز ونهتف له ونحبه أوي أوي ونطلع به السما ... وبعدها بكام يوم نخسف به الأرض لان اداءه كان سئ ؟؟؟

ألا ترون ... إنها وحشه في حقنا ... يوم ما لاعب يجي يرد تحيه الجمهور ... وهو في نفسه بيقول "طالعين بيا السما النهارده ... وبكرا حيشتموني بالغاليين زي ما شتموني من كام يوم!!"

خسرنا الماتش ... وخرجنا من البطوله ... ولكن كسبنا "تغيير شامل" في رد فعل الجمهور تجاه الهزيمه الصعبه دي !!!

رد فعل ... من زمااااان واحنا نفسنا انها تكون موجوده !!! .... رد فعل "الحب الحقيقي"


ولكن ايه سبب التغيير الكبير دا ؟؟؟ بصراحه كنت متوقع إن الجمهور حيفتك باللعيبه لو خرجنا من البطوله ... ودا كان نفس شعور اللعيبه اللي وضح عليها التوتر والقلق والخوف من لعب ضربة الجزاء !!

خوفهم مكنش من ضياع البطوله على دا ما هو خوف من بطش الجمهور !!! لعيبتنا بتخاف مننا يا ناس لازم تفهموا كدا !!! لعيبتنا عارفه ان احنا ملاك النادي دا !! واحنا عشاقه الحقيقيين المخلصين ... وعارفين تماما السلبيه الوحشه فينا بالهجوم عليهم في خسارة ماتش ... ما بالك بئا بخسارة ماتش وخروج من بطوله ؟؟


أما السبب .... وهو في سبب غيرهم ؟؟؟

ولا هو في حد عرف يغير السلوك دا في جمهورنا العظيم غير مجموعة الشباب "المظلومين" دول ؟؟؟




ULTRAS .... THE YELLOW DRAGONS




من يوم ما ظهروا على الساحة ... والجميع بيحاربهم !!!

صمدوا كتير في وجه الظلم ووجه كتم صوت الحق ... وربنا عوض صبرهم خير والحمد لله رب العالمين!!!



 


شباب ألتراس يلو دراجنوز



 



هما أمل جمهور الاسماعيلي ... وكنت مصمم إنهم هما الأمل في التغيير ... تغيير السلبيات اللي حقا لو اختفت فينا ... حنبقى أحسن جمهور في الدنيا دي كلها !!!

والحمد لله ... كسبنا إمبارح تغيير كبير في نقطه من النقاط اللي كانت صعبه فينا ... حيينا اللعيبه رغم الخسارة والخروج من البطوله !!


وكان الفضل لله سبحانه وتعالى أولا .... ثم إرادة هؤلاء الشباب العظيم !!!




 

يا شباب الالتراس ... حقا إنتم فخر جمهورنا العظيم ... وفخري أنا شخصيا ... بتباهي بيكم وسط الاهلاوية اللي عايش معاهم هنا !!! طابع شعاركم وحاطه ادام مني طول الوقت في الشغل وبيكون أول شئ أشوفه لما أوصل المكتب



من يوم ما ظهرتم وأنا مكنش عندي شك إنكو حتنجحوا ... وحتصمدوا

أتذكر يوم ما عرفت بخبركم وأحكيها لكم



كان يوم ماتش للاسماعيلي ولكن مش متذكر أنهو ماتش بصراحه .. وكان في ستاد الاسماعيلية وانا قبل منها بيوم جيت من اسكندرية لحضور الماتش ... وأيامها كانت "رابطة محبي الاسماعيلي" اللي انا انتمى لها في عز قوتها وتألقها ... وكنا قد إنتقلنا من تالته شمال إلى تالته يمين اللي كانت ميته من يوم ما اتبنى الستاد دا واحيتها الرابطة ... وكنت قبل منها سمعت إن مجموعة شباب ناويين يعملو "مجموعه" مستقله ويبدأو الشغل من مدرج المعاشات بما ان شمال "للمشجعين" ويمين "للرابطة"


لغاية لما جه عضو الالتراس الجميل "ريكاردو" ... وقالي "يا معتز احنا ناويين نعمل رابطة جديدة وحيكون شادي جولد بوي فيها (شادي ايامها كان مهتم بتصوير كواليس الماتش من الملعب ولسه مكنش انتقل للمدرجات) ومودي وميرو وعبد الله وحمام وشباب تانيين "


انتظر ريكاردو رد فعلي ... وبعد ما قلت له رأيي حسيت من تعبيرات وجهه اني اول واحد يقول "كلمه كويسه" في حقهم !!



سألته "ليه يا ريكاردو؟؟؟ ايه سبب المجموعه الجديده دي؟؟ هل السبب تشجيع الاسماعيلي ومنافسة الرابطة بشرف؟؟ ولا ايه نيتكم؟؟"

طمني ان السبب فقط هو حب الدراويش ... وانهم نفسهم يعملو تشجيع من نوع أخر مش موجوده في الرابطه رغم تألقها !!


لما اطمنت إن "النوايا سليمه" في الشباب دول ... قلت له "يا ريكارد ... على بركة الله إبدأوا وانا معاكم في أي شئ عشان تظهروا وتنافسوا الرابطة في التشجيع !!!"

قلت له الكلام دا ... أيام لما كانت رابطة محبي الاسماعيلي ... اخدت لقب أحسن جمهور تلات مرات متتاليه في برنامج الاهلاوي شوبير !! رغم ان التلات ماتشات دول كان جمهور الاهلي كمان متألق في ماتشاته !! ولكن حقا الرابطة كانت مكتسحه الدنيا ... وخبرنا وصل للوطن العربي كله !!! والضوء مسلط عليهم


لكن هؤلاء الشباب "التراس يلو دراجونز" ... لما بدأو مجموعتهم الصغيرة ... كان مبدأهم إن مفيش شئ مستحيل ... وبالادارة و"بالنوايا الحسنه" حنوصل للمراد

وقد كان !!!


الالتراس وصلوا للي هما فيه دا ... عشان نيتهم كانت صافيه ... ورغبتهم كانت أكيده




إن كانت الرابطة عملت ثورة في التشجيع الاسمعلاوي ... والوصول بها لمصاف التشجيع العالمي إلى جانب إحياء مدرج الدرجة التالته "يمين" .... فإن الالتراس يلو دراجنوز كملوا المشوار في الارتقاء بالتشجيع ... وتغيير السلبيات الموجوده في جمهورنا واللي كانت عصيه علينا جميعا !!!



اكتبوها في تاريخكم يا ألتراس ... أنكم غيرتو فكر الجمهور ... في التعامل مع اللعيبه لما نتهزم ونخرج من بطوله !!!

اكتبوها في تاريخكم يا ألتراس ... أنكم أثبتم عشقكم "الخالص" لهذا الكيان العظيم



خليتو اللعيبه تبكي من التأثر ... وأنا على يقين ... إن معنوياتهم في مبارتنا القادمه في الدوري الممتاز حتبقى مرتفعه

ولما يتعودوا من جمهورنا تقبل الهزائم بصدر رحب وحب كبير ... ساعتها نقدر نرد على المتخلفين اللي بيرددوا كلمة خثبيته باطله مردوده


"ان جمهور الاسماعيلي هو سبب هزائم الفريق!!!"


 

لا والف لا !!!! احنا وقود هذا الفريق !!! واحنا اللي بنحرك الاسماعيلي!!! واحنا اللي بنحول اللعيبه الى وحوش في أرض الملعب!!!
هما مش واخدين بالهم ... إن امكانياتنا الماديه ضعيفه وغير مستقره ... واحنا في عصر الاحتراف وعصر الاغراء بالفلوس خاصة بعد ظهور أندية الجيش والبترول والشركات ... ورغم ذلك ننافس على الدوري !!!!!

هما مش وخدين بالهم ... إن رغم غيلان الفلوس والمتحكمين في لجنة الحكام وتغيير دفة المباريات لصالح فريق معين ... إلا ان الاسماعيلي صامد وسط الكبار ؟؟

هما مش وخدين بالهم ... إن الاسماعيلي بيكسر أنف الأهلي في الوقت اللي كل الفرق تسجد له طوعا أو كراهيه؟؟؟؟



المعادله صعبه يا ناس ... ولو حسبناها بشكل عقلي وبالحسابات ... المفروض إن الاسماعيلي يكون هبط درجة تانيه من موسمين أو تلاته فاتو !!!


ولكن أين الاسماعيلي ؟؟؟


الاسماعيلي في الدوري الممتاز ... وفي المقدمه ... ويهدد عرش صاحبة الجلاله .... ووقوده هو الجمهور العظيم !!!



 

كملوا طريقكم يا ألتراس .... كملوا طريقكم ... فأنتم وقود الجمهور ... والجمهور وقود الفريق ... واحنا محتاجين إن الوقود دا يكون جودته "عاليه"



ألف مبروك تغيير إحدى سلبيات الجمهور .... على يد شباب الألتراس الفخور

جديد إس سي
image

الفريق يعود للإسماعيلية بعد انتهاء معسكر العين السخنة

عادت بعثة فريق الكرة الأول بالإسماعيلى إلى المحافظة بعد خوض معسكر مغلق بالعين السخنة ضمن برنامج الاعداد لأستئناف المشوار بمسابقة الدوري الممتاز.
image

ابو جريشة يعمل بإخلاص ولن يقبل بإهانة رموز النادي

  أكد علاء وحيد، المتحدث الرسمى للنادى الإسماعيلى، أن على أبو جريشة رئيس اللجنة الفنية بالدراويش أحد رموز الكرة المصرية، ويعمل بإخلاص لخدمة قلعة الدراويش، وغير
image

هل يكرر ابراهيم عثمان خصم النقاط مثل قضية جون اويري

نفس الاسلوب و نفس المنهج الغريب لمجالس ادارات غريبة و عجيبة .. اصبح مكتوبا و مقررا علي جماهير النادي الاسماعيلي لمزيد من المعاناة و القلق و الترقب
image

الإسماعيلي : مسحة كورونا سبب قطعنا للمعسكر.. وسنفعل مثل الأندية

كشف عماد سليمان المشرف العام على الإسماعيلي، أن الفريق قطع معسكره المغلق، بسبب موعد المسحة الخاصة بمباراة وادي دجلة في الدوري.
image

الجبلاية لم تلغي المسحات الطبية قبل المباريات

كشف مصدر باتحاد الكرة، أنه قد علق مسحات كورونا الرسمية للأندية، لأن الأندية لم ترد على خطاباته بشأن تحملها لتكاليف المسحات وقال لم نلغ المسحات.
image

أشغال شاقة فى معسكر الإسماعيلي بالعين السخنة

رفع الجهاز الفنى للفريق الأول لكرة القدم بنادى الإسماعيلى ، بقيادة البوسنى يوفيتش حالة الطوارئ للقصوى داخل معسكر الفريق بالعين السخنة، استعدادا لمواجهة الأهلى 10 مارس المقبل بمنافسات الدوري الممتاز .
image

الانذار الثالث يهدد 4 لاعيبين بالغياب عن مواجهة الاحمر

يستعد الفريق الأول بالنادي الإسماعيلي لمواجهة وادي دجلة المقرر لها يوم الجمعة المقبل، على إستاد السلام بالقاهرة، ضمن منافسات الدوري العام المصري موسم 2020- 2021. ويملك
image

سيحه : الأهلي أهان تاريخ عبدالله السعيد

أكد محسن عبد المسيح نجم الإسماعيلي السابق، أن النادى الأهلى أهان تاريخ عبدالله السعيد عندما قرر عرضه للبيع. وقال محسن عبد المسيح فى حواره لصدى البلد:
image

سيحه : جيهان السادات وراء انتقالي للإسماعيلي

 وبعنا حجازي بالتصويت كشف محسن عبدالمسيح نجم النادى الإسماعيلي كواليس تدخل جيهان السادات قرينة الرئيس الراحل محمد أنور السادات لإنتقاله من نادى الشمس إلى قلعة الدراويش
image

سمير فرج: الإسماعيلى لم يستفد من صفقة الشريفى

 وعايزين أجانب زى القطبين أكد أحمد سمير فرج، نجم الإسماعيلى السابق، أن قلعة الدراويش تعانى من الكثير من المشاكل، مشيراً إلى أن وجود عدد من الرموز
Powered by Vivvo CMS v4.1.5.1