عشان خاطر رمضان هنلعب بخطة 3-4-3
احبائي المسلمين مشاهدينا في كل مكان اهلاً وسهلاً بكم في فرصة جديدة
قبل رمضان :
طبعا هيحاول الشيطان يعودك على المعاصي بحيث متبعدش عنها في رمضان مع شوية اعلانات عن شوية سيئات هتلعب في الهجوم ضدك وطبعا الكابتن في الفترة دي هيكون بعض القنوات في التلفزيون وكل دة بيشتغل عليك وعلى قلبك عشان كدة احنا هنلعب بـ3 جامدين اوي في خط الدفاع ( قبل رمضان ) وهما
1- النية الصادقة : ودي تعتمد على لياقتك وقدرتك على تعديد النوايا بشكل يربك ويتعب السيئات والشياطين اللي قدامك وكل ما تحط نوايا اكتر كل ما فرصتك ان شاء الله في دخول الجنة هتكتر.
2- الصحبة الصالحة : وطبعا مفيش احسن من اللعب التعاوني حاول تتعرف على صديق صالح مثلك او اكتر من صديق يعينك على الخير بحيث انكم تمرروا الخير لبعض مع بعض المهارات الفردية ان شاء الله تفوز برمضان ولازم طبعا تبعد عن صحاب السوء عشان هما بيلعبوا على الاصابات يعني يصيبك وربنا يستر الاصابة ممكن تكون خطيرة واخاف تكون اخرتها النار
3- الورقة : طبعا قصدي على الورقة الرابحة اللي ركنها على الخط من زمان وهي كل حاجة حلوة انت بعيد عنها (صدقة ، قرآن ، صلة رحم .... الخ) كل الحاجات دي لازم تتمرن عليها من دلوقتي عشان في رمضان تكون جاهز وكمان لازم تستخدم ورقة بيضاء تكتب فيها خطتك في رمضان يعني ( هقرا كام جزء - هصلي فين - هعتكف فين ...هتعزمني امتى ..الخ) كل دة لازم تكتبه في ورقة قبل رمضان عشان تدخل ملعب رمضان وانت عارف هتعمل ايه وتهجم من اول فترة جس النبض وخليك فاكر ان الجون اللي في اول رمضان هيريحك كتير
في رمضان :
طبعا الدفاع معاك زي ما هو وعاوز تزود عليه حاجات تنفعك زود الحمد لله القوانين بتسمحلك بكل اللي يدخلك الجنة ، اما في خط النص او في رمضان هيلعب معانا 4 تقال اوي ولازم تحافظ عليهم متسيبهمش لفريق تاني عشان تقدر تكمل الموسم للاخر وتفوز وهما:
1- القرآن : وطبعا مفيش كلام عليه يطمنك على قلبك ( ألا بذكر الله تطمئن القلوب ) ويزيدك حسنات زي ما انت عاوز وكفاية ان الحرف الواحد بيوصل ثوابه حوالي 700 حسنة او اكتر وطبعا لازم تحدد نيتك وشوف هتختم كام مرة وياسلام لو لعبت بحرفنة ومهارات شوية متمثلة في ( حفظ - دراسة تجويد - ترتيل - تدبر ) واحسن حاجة تحرك القلب وتخليه مستعد لصد اي هجمة اكيد القرآن
2: الصيام : خللي بالك في لاعيبة كتير بتصوم بس واحد بيصوم ومهاري وواحد بيصوم ويوجع بطنه بس يعني هتلعب بالصيام ، بس مش الصيام عن الاكل والشرب بس او صيام لحد المغرب ، لا هنهجم بالصيام بشكل مختلف بحيث ان اعضائي كلها تكون صايمة يعتي مثلا ( عيني مش هتشوف حاجة حرام ، رجللي مش هتروح لحاجة حرام ...الخ )
3- القيام : وطبعا انت عارف من الاول هتصلي فين وهتنزل الملعب مع مين من زمايلك وخللي بالك القيام ممكن يخلصلك على الذنوب كلها اللي بتلعب في الدوري ( من قام رمضان ايمانا واحتسابا غفر له ما تقدم من ذنبه ) وطبعا عندك في كمان الاعتكاف حاول تهجم بيه في العشرة الاواخر عشات تخلص رمضان وانت جاهز تواجه اي فريق من الشياطين وان شاء الله هتهزمه
4- صلة الارحام : وطبعا لازم تكون موجودة في الملعب عشان تضمن انك ان شاء الله هتفوز بالجنة ( لا يدخل الجنة قاطع ) اي قاطع للرحم
بعد رمضان :
خللي بالك في كل موسم الشياطين بتجهز نفسها تنزل في الوقت دة وبيلعب كل فريقهم في الهجوم عشان يحاول يعوض الخسارة اللي ان شاء الله هيخسرها منك في رمضان وكمان في كام لاعب محترف بيشتروه معاهم اشهرهم ( فلم العيد ولبس البنات الغريب الجديد) وطبعا بيدعم الصفقة دي بطل الذنوب المشهور( بعض قنوات التلفزيون ) وطبعا في حاجات تانية بس كل دة ان شاء الله هتتغلب عليه بطريقة لعب خطيرة جدا وهيكون بطلها :
1- الصحبة الصالحة : ودة كابتن الفريق واحسن حاجة فيه انك هتنزله قبل رمضان وفي رمضان وعشان تقدر تصد الهجوم الشرس للذنوب بعد رمضان بل وكمان تهاجم انت لازم يكون ليك صاحب صالح تعينه ويعينك على فعل الخير
2- الصيام : بس هنا هتهجم بـ 6 ايام من شوال عشان دفاع الذنوب يفقد ثقته في نفسه لانك هتكون ان شاء الله لك اجر صيام السنة كلها وبكدة فريق الذنوب هيدافع بعد ما كان بيهاجم
3- الهمة ( اللياقة ) : وطبعا كلما كانت لياقتك اكتر هتقدر تهاجم اكتر ولياقتك ممكن تزودها عن طريق موسم الطاعات الغير محدود في رمضان وكرهك انك تعود للذنوب تاني
وبكدة هيكون فريق الذنوب مات في الملعب واتهزم هزيمة فاضحة هتتكلم عنها اعمالك في كل مكان بعد رمضان وفي الاخرة ان شاء الله
خايف عليك بعد كل دة تكون خسران بس للاسف كمان هتكون خايب واخاف انك تخسر في الدنيا وكمان تخسر الجنة في الاخرة وممكن تموت قبل رمضان الجاي عشان كدة حاول تدخل رمضان السنة دي ناوي بجد على الجنة واوعى تكون ممن قال فيهم الرسول صلى الله عليه وسلم " (....... ورغم أنف رجل دخل عليه رمضان ثم انسلخ قبل أن يغفر له)
في النهاية كان لازم اقول اني احبكم في الله وبجد بجد في غيرنا كتير كان نفسهم يحضروا رمضان القادم ولكن القدر كان على غير ذلك لذا أسأل الله أولاً أن يبلغنا رمضان وعاوزين نكسب رمضان السنة دي إن شاء الله واسف جدا جدا على الاطالة بس الماتش صعب جدا واتمنى نفوز في الآخر
