إسماعيلي إس سي - i s m a i l y S C - هي فين الميزانية.. بيب بيب طييييت أعواااا عا

هي فين الميزانية.. بيب بيب طييييت أعواااا عا

حجم الخط Decrease font Enlarge font
image

و لا تزال اجتماعات الجمعية العمومية للنادي الاسماعيلي ,,هي سبة في تاريخ النادي و علامة سيئة في شكل و منهج و كيان القائمين علي النادي و خاصة المجلس الحالي

و دعونا الأول نشاهد الأرقام تتحدث
عدد المسددين للاشتراكات الذين يحق لهم حضور الاجتماع 4544 عضو و كانت تحتاج إلى 910 صوتا على الأقل لكى يكتمل النصب ( قصدي النصاب )
عدد الحضور ( قالو لوه ) 2433  عضو
بلغت عدد الأصوات الصحيحة 2380 صوتا
بواقع 1959 موافق بالاستفتاء علي الميزانية
و بواقع 421 غير موافق
بلغت عدد الأصوات الباطلة 53 صوت
الاول نركز في الموافقين علي الميزانية و نقارنها مع السادة الموافقين في الجمعيات السابقة
عدد الموافقين 1959 صوت من اجمالي الاصوات  2380 في 27 اكتوبر 2020
أي بنسبة 82%
عدد الموافقين 1578  علي اختيار عضو تحت السن محمد فياللي  من اجمالي الاصوات 1814 حضور في 22 اكتوبر  2019
أي بنسبة 86%
و لو حضرتك يا عزيزي القارئ بحثت في نسبة الموافقين علي انتخاب ابراهيم عثمان  في 2017 و الموافقين علي اللائحة الاساسية في 2017 و كل الموافقات مع جمعيات ابراهيم عثمان ستجدها
من 82% : 86% .... كده زي ورقة البوستة
الثبات علي المبدأ حلو .. مفيش كلام
المهم نبدأ القصة من اولها
الكل في الاسماعيلية كان بيتحدث عن ان مفيش منصة  في الاجتماع
و التاني قال حيعملوا فيديو كونفرانس ... عبر شاشة كبيييييرة  و يتحفنا ابراهيم عثمان بطلعته البهية و الياسين
و الثالث قال : لا يا جماعة الاستاذ علاء وحيد  قال حاجة تانية  خالص ... ان العضو  سيذهب للنادي .. و يذهب للاستفتاء علي الميزانية و يخرج من برة ... لبرة .. و الكلام ده علشان الكورونا
المهم الكل توقع حاجة منيلة بنيلة
لكن بصراحة ... ما كانش حد توقع اللي شفناه  امام النادي الاسماعيلي
طوابير طولها اكثر من 200 متر في عز الشمس و الكل ملزق في بعضه ..تلزيقا مباركا ... علشان الكورونا و الكل مفيش كمامات ..علشان الكورونا برضه
و عندما تقترب من البوابة .. يصبح التلزيق ضغطا و كبسا  مثل (  قفة بلح العجوة ) .. لا يوجد فراغات او هواء  يسمح لك ان تعطس الا في قفا اللي قدامك .. ولو حاولت تجيب حاجة من جيبك ... لازم اللي قدامك يفهمك غلط  !!!
و الضغط بيولد زهق و زعيق
و الكل اصبح قالب عجوة ... الشاب و الكهل و التخين والرفيع و الطويل و القصير ..كله اصبح كتلة واحدة
و الضباط الواقفين .. الله يكون في عونهم ..واحد منهم نقيب و التاني مقدم ... اصبح شوربة من العرق و النرفزة و محاولة حفظ النظام
اما العميد كان قاعد في ظل عربية مدرعة و سايب النقيب و المقدم .. صوتهم يروح من الزعيق .. و كان العميد بيفطر ساندوتش  ( تقريبا فول ..لم انجح بالتأكد من نوعية الحشو ) ... لكن الأكيد ان فيه طحينة ... تركت اثرا عزيزا علي قميصه الابيض و مع محاولة يائسة لازالة الطحينة من منديل كلينكس مفتل ... و زادت المحاولة البقعة اتساعا و تأثيرا... ما علينا .. صحة و عافية علي بدن سيادة العميد ..سواء كان فول او فلافل  و المهم الطحينة
استمر الوضع سئ للغاية  و بيزيد سوء كل ما اتوبيس من المزرعة  العثمانية ... يحضر و يهلوا علينا  و لم تنقشع المأٍساة الا بعد الساعة الواحدة .. شوية شوية
 لكن قبل الساعة الواحدة و في حوالي الساعة 11 و 22 دقيقة و 39 ثانية  بتوقيت حي ثان
اشتغلت صفارات الانذار و سارينة نجدة و ابواق إشعال الحرب العالمية الثانية
فيه يا جماعة ... ابدا مفيش
 دي عربية مدرعة من قوات مكافحة الشغب  و فيها واحد عسكري فوق ماسك رشاش 39 مللي من بتوع سلفستر استالوني رامبو الجزء الثالث
و ده شئ عادي اتعودنا عليه من ثورة يناير .. عربية تخض و تخوف بصراحة
لكن الغريب ان أمام العربية المدرعة عربية فور وويل درايف ( اظنها رانج روفر )  و امام العربيتين عربية شرطة تطلق السارينة  بقوة و تحدي...  و وسع رجلك يا للي علي الرصيف
لقينا الثلاث عربيات بسرعة و مناورة السواق شوماخر الالماني ... ... لفوا و دخلوا في وسط  التحام و كبس ( قفة بلح العجوة )  و لصقوا الثلاث عربيات مع بعض و اقتربوا جدا جدا من سور النادي و من نفس البوابة اللي قدامها العجوة
و بمجرد – ضرب سارينة من نوع (بي بي بي  تيييييت تييييت اعوووو عا ) ... خرج اربعة ديناصورات يرتدون اربعة بدل سودة و كارفتات سودة و لا بتوع القهوة في سرادق العزاء ... و عملوا شغل صليبي دفاعي امام 3 اشخاص خرجوا  من البوابة ... ما كانشي واضح منهم الا المهندس محمود عثمان ... و بأسرع من هرولة ( الصفا و لمروة ) ركب المهندس الكبير العربية الفور ويل يا جدع .. او اظنها ذلك .. و اطلق صاحب العربية الامامية سرينة تقول ( وي وي وي وي  اعوا اعوا طيت طييييت ) يعني خلاص المهمة خلصت يا رجالة و عبرنا الهزيمة يا مصر يا عظيمة
لكن لابد التوقف هنا ... عندما فشل الاربعة ديناصورات في تغطية  جسم اللي بيخطفوة من النادي و اتعرف انه المهندس الكبير ...شقيق المهندس رئيس النادي  المعشوق و المحبوب من جماهير الاسماعيلي و خاصة من الذين مازال بينهم و بين  منطقة ( كبس العجوة ) ما يزيد عن 100 متر
و تلقي المهندس رئيس النادي ( في شخص شقيقه محمود )  هتافات التأييد و الدعاء من حناجر ... و أنوف جماهير الدراويش و كان اكثر الهتافات تميزا هو : النادي ضاع النادي ضاع ............. ! و هناك من أصر علي الحديث عن النظافة و عكسها بشكل شخصي !!! .. و نعتذر عن ذكر باقي الاهازيج ... لاننا موقع يخجل منها و لكنها هتافات من المنقي خيار و أتة .. كمان .. لان الخيار بقي بستة ... و رجعتنا تلك الاهازيج  الي هتافات الجماهير ضد الحكام و الباكو علي باكو
!!!!!!!!!!!
شوية و قالوا  .. اللي فوق الستين يمكن يدخلوا مباشر
قولت بركة يا جامع .. لان العبد لله فوق الستين و بيحضر جمعيات عمومية من ايام ما كان عددها يساوي 3 اتوبيسات المزرعة
 ما علينا
اسهل ما يمكن دخلت الي ما بعد البوابة  و لقيت ( هوو )  .. كل اللجان فاضية الا اللجنة رقم 7 .. معظمهم  عمال بروليتاريا كادحة في مزارع عثمان و طابور طوله 35 متر .. و كلهم مستعدين يرجعوا الاتوبيس  لان الوجبة بعد التصويت
و لاني برجوازي متسلط متحكم كنت في لجنة 2 عقبال عندكم ... و في اقل من دقيقة كنت خارج لان اربعة ديناصورات هما اللي بيخرجوا الموجود اما اللجان و تخرج من الناحية التانية .. و تروح تلاقي ( كبس العجوة شغال ) و اول مرة اعرف ان مواليد 1957 .. لهم ميزة
المهم
الساعة الساعة واحدة .... فجأة ..مع موسيقي تصويرية بصوت سيد زيان الله يرحمه
مفيش و لا سريخ ابن يومين و لا طابور و لا أي حاجة  أمام النادي أصلا
و أصبح الذي يجيي للمغامرة ... يدخل علي طول ( يدلو ) بصوته
ليه و بقينا في عجب علشان مش عارفين السبب ... و لما عرفنا السبب ...
 زال العجب
كل الاتوبيسات اللي جاية من المزرعة .. خلصت و مشيت من شارع شبين و شارع رضا و الشوارع المحيطة
و رجعت الارض الكريمة  الطيبة لإيدين صاحبها  .... علي رأي عبد العندليب
لا طوابير و لا عجوة و لا عجمية و لا حتي ظباط واقفين علي البوابة
اللي يجيي ... ناقص الموظفين يقوموا يبوسوه من بقه .. علشان يدخل يصوت
و قبل الساعة 2 ,,,كل شئ اتلم و خلص الا من بعض الاعضاء اللي علموا من مصادر موثوقة ان الدنيا فل الفل
و انتهي اليوم
و انتهت الجمعية العمومية للنادي الاسماعيلي .. وقالوا نعم للميزانية و قالوا لا
لا اللي قالوا ( نعم  ) شافوا الميزانية ولا اللي قالوا ( لا ) لمحوها
و كل جمعية عمومية و الاسماعلاوية بخير و طيبين
 
و انتهي الكلام المباح .. لكن غير الكلام الغير مباح ... لا يسجل و لا يقال

و دقي يا مزيكا 

جمعيتنا ..عموميتنا ..حماها الله ... الله الله  

جديد إس سي
image

مران الدراويش .. اجتماع مع خمسة لاعبين وتدريبات إضافية لشريفى

شهد مران الفريق الأول لكرة القدم بالإسماعيلى اجتماع بين أحمد العجوز مدير الكرة والخماسى محمد هاشم وعماد حمدى ومحمد مخلوف وشكرى نجيب وأحمد مدبولى.
image

جدول مسابقات الناشئين بالنادى الاسماعيلى

كتب مؤمن مجدي ... تم تحديد موعد مباريات مسابقة لمواليد ٩٩ و ٢٠٠١ و ٢٠٠٣ و ٢٠٠7 و هي كالتالي
image

تقسيمة مطولة وتدريبات خاصة لصادق ومصطفى وبيومى

اشتمل مران الفريق الأول لكرة القدم بالإسماعيلى على تقسيمة مطولة تم إيقافها عدة مرات من أجل إصلاح الأخطاء والوقوف على مدى استيعاب اللاعبين للخطط الفنية المطبقة.
image

لم يتم تحديد موعد مباراة الاياب بالبطولة العربية

ردا علي الاقاويل التي تحدد يوم 30 ديسمبر القادم لمباراة الاياب للدور قبل النهائى بين الرجاء والاسماعيلى والتى ستقام بالمغرب
image

شريفي يخفض وزنه و ابو اليزيد يعالج ركبته بالقاهرة

يخضع  الجزائري رضوان شريفي مدافع النادي الإسماعيلي الجديد لبرنامج تخسيس  في احد المراكز المتخصصة بالقاهرة و  يجري عملية تخفيض الوزن بمتابعة الجهاز الطبي للاسماعيلي بينما يجري
image

خلف يعود أقوي من الأول ... و يصيب الجميع بالهسهس

لم يكن إعلان المهندس رئيس النادي الاسماعيلي و المشرف علي ملف كرة القدم .. بتشكيل لجنة فنية تتولي شئون التعاقدات للموسم الجديد إلا ذو معني واحد و هو إبعاد الأستاذ محمد خلف عن ملف التعاقدات
image

وديا .. الاسماعيلى يهزم اطلائع الجيش بثنائية

كتب : محمد حنيدق.. فازالإسماعيلى على طلائع الجيش بهدفين مقابل هدف فى الودية التى جمعتهما باستاد جهاز الرياضة العسكرى ، ضمن الاستعداد لخوض مسابقة الدورى
image

وديا .... اسماعيلى ٢٠٠٣ يخسر من الزمالك

كتب مؤمن مجدي ... خسر فريق الاسماعيلى مواليد ٢٠٠٣ من فريق الزمالك بهدف نظيف  فى المباراة التى جمعت الفريقين عصر اليوم على ملعب الاخير بالقاهرة   تاتى
image

يا قاعدين يكفيكوا شر الجايين .. و لا ينقصنا رؤياك

رن جرس التليفون في بيتي أكثر من مرة خلال ساعة زمن .. و لأني لم أكن موجود بالبيت فقد كان وسام ابني الأكبر هو الذي يتلقي المكالمة الواردة من ( القاهرة ) ! و يرد : بابا غير موجود الآن .. أقول له مين حضرتك ! تأتي الإجابة سريعة قصيرة ..شكرا سأتصل به مرة أخري
image

الاسماعيلي يواصل المران و يلتقي الجيش غدا

و اصل الفريق لأول بالنادي الاسماعيلي مرانه اليومي  ليوم الاثنين و يلتقي عصر الغد مع نادي طلائع الجيش بملعب جهاز الرياضة العسكري بكوبري القبة  و خلال مران
Powered by Vivvo CMS v4.1.5.1