مربعات
شعر جديد .. للفنان ميمي عوض
عجبي علي النبضات ** زادت بشكر خطير
تقولش دي مظاهرات ** وسط ميدان التحرير
****
(2)
ياقلبي يامجروح ** جرحك لإمتي يطول
قاللي ياعم روح ** هو انت كنت تطول
****
(3)
ورد المحبة دبل ** من قلة العشـــاق
الناس همومها جبل ** لا مشاعر ولا اشواق
****
(4)
الناس كتير أصناف ** تقدر تقول ملايين
لا بشكل ولا أوصاف ** لكنهم عايشين
****
(5)
بسأل ليه النجمة ** نورها ضعيف مكنون
قالولي دي حكمة ** دبرها رب الكون
****
(6)
شوفتوا اللي باع أرضه ** بيقولك دي وراثة
زي اللي باع عرضه ** علي إنها سياسة
****
(7)
سألوني برجك إيه ** علشان نشوف بختك
قولت ياخويا علي ايه ** مهو بختي من بختك
****
(8)
دور علي الاحباب ** وإوصل أراضيهم
من غير ملام وعتاب ** طبطب وراضيهم
****
(9)
عجبي علي الإمعة ** واللي ركب موجة
لاهو ضد ولا هو مع ** لكنها هوجة
****
(10)
يا أمي إدعيلي ** علشان يروق الحال
ونشوف الاسماعيلي ** في الموسم ده أبطال
****
