منتدي إسماعيلي إس سي

منتدي إسماعيلي إس سي (http://www.ismaily-sc.com/vb/index.php)
-   مجلة الأصفريكا ِAl Asfrica Magazine (http://www.ismaily-sc.com/vb/forumdisplay.php?f=74)
-   -   فانتازيا درويشية (http://www.ismaily-sc.com/vb/showthread.php?t=34952)

darwishing 10-03-2019 22:05

فانتازيا درويشية
 

المشهد : صالة الاجتماعات
الوقت : بعد صلاة المغرب مباشرة
اصوات همهمة و مضغ و شرب و شفط شوربة ساخنة
يمشي الباشمهندس اسفاريم عتمان في الممر المؤدي في الممر المؤدي الي صالة الاجتماعت و حوله مجموعة من الجماعة اياهم و في ايديهم اوراق للتوقيع و الاعتماد من الباشمهندس اسفاريم عتمان و الذي يستجيب علي ذلك عن طريق احتفاظه بالختم و الختامة
يتوقف الهندسة اسفاريم علي بعد خطوات من صالة الاجتماعات و يطلب من من حوله الانصراف
اسفاريم : اشوفكم بقي الاسبوع الجاي .. الدنيا مش حتطير
واحد : يا ريس ... فيه اوراق تانية كتير عايزه توقيع و كده في تاخير من ساعة المهندس عائد شرو ... ما ساب المجلس و الدنيا واقفة خالص
اسفاريم : ما تقف و الا تقعد ..حتوجع دماغي ليه ..يعني كان المهندس شرو ... بيعمل حاجة ... روحوا بقي
.........................
يتوقف مرة ثانية المهندس اسفاريم عند باب صالة الاجتماعات و يستمع الي اصوات مريبة من همهمة مخلوطة بايقاع البلع و المضغ .... و صوت يقول ::: يوووووووووف دي سخنة قوي قوي
هاجم الشك و الريبة المهندس اسفاريم عن ما يحدث داخل صالة الاجتماعات
فما كان منه الا ان يقبض علي اكرة الباب بهدوء و ينطلق الي داخل الصالة بكل سرعة ليعرف ما يحدث
.....................................
و فجاءة وجد المهندس اسفاريم ..مجموعة من اعضاء المجلس و هم الدكتور برادن قارس و الاستاذ مهند الكبدية و الحاج عفتيتو و المهندس الصيد اصلان .. يجلسون علي الارض حول حلقة مفروشة من الجرايد و الصحف .. و الكل مشمر و هات يا هري في الاكل في عزومة دسمة فاخرة
للحظات مرت دهر علي الجميع و علي المهندس اسفاريم نفسه – حتي يستوعب الجميع ما حدث و خاصة ان هناك تعليمات من الدكتور بارديم قارص و هو المسئول عن الاعلام ..انه لا احد يقتحم صالة الاجتماعات علي الاجتماع الساخن ..باي حال من الاحوال
التفت الدكتور بارديم قارس الي المهندس اسفاريم : بسم الله يا باشمهندس ... تعال رم عضمك .. و اشرب لك شوربة كوارع سخنة ..كلها بهريز و النبي بهريز
اسفاريم : بتعملوا ايه يا مقاطيع و ايه الاكل ده كله ..ما استنتونيش ليه
مهند الكبدية : ياريس انت اتاخرت قوي ..ميعادنا كان الساعة 1 و الساعة دلوقتي 6 .. و كنا حنموت من الجوع و بعدين كتر خيره الحاج عفتيتو..عامل الواجب و قزح ... و جاب لنا اكلة ما اؤلكشي
اسفاريم : اومال فين الاستاد موسند شرف
مهند الكبدية : راح يجيب لنا شورية تاني ... تخيل اول مرة كان جايب لنا شورية في كيس و شفاطة .. زي عصير القصب
اسفاريم : في السعودية بيجيبوها كده .. ده 20 سنة خبرة في الحجاز
عفتيتو و هو ماسك ماسورة بكامل كف يده و يدق عليها باليد الاخري : عايزين نشوف حكاية قلة النخاع دي في المواسير العجالي دي يا ريس
اسفاريم : و انا مالي و مال النخاع
عفتيتو : نطلع بيان سريع نطالب الموردين بالحفاظ علي النخاع ..حاجة كده زي البيان السريع اللي طلع للرد علي اللاعب التونسي لاصمد الجريزي
اسفاريم : اسمه الجزيري يا عفتيتو
عفتيتو : و ماله يا ريس ..ما كل الاسماء في المشهد ده مخلبطة من الاول
اسفاريم و قد جلس علي اقرب مقعد منه : خليك في في اللي انت فيه يا عفتيتو .. ما جبتوش أكلة سمين بس ليه
الجامعة : اسمها تقاطيع يا ريس .. انت بس قعدتك في الدقي نستك الاسماء بتاعتنا
اسفاريم : المهم انا جمعتكم النهاردة لسبب مهم جدا جدا
الصيد اصلان و هو يدب يده بكاملة في سلطانية مملؤة بالسمن البلدي ليصل الي الكبدة و لدرجة ان السمن يبلل اسورة القميص : خير يا ريس
الدكتور بارديم قارس و هو يقطم صباع بمبار مقرمش : يا ريت يكون اخبار حلوة
اسفاريم : لا حلوة و لا خير ..كنا عايزين نختار مين اللي حيطلع مع مهند الكبدية في رئاسة بعثة تونس ..انا عندي اقتراحين : الاقتراح الاول هو رئاسة البعثة لمهند الكبدية و معاه موسند شرف نائب
و الاقتراح الثاني هو رئاسة البعثة لمهند الكبدية و معاه موسند شرف نائب.. ايه رائيكم
الصيد اصلان : انا شايف الاقتراح الاول اصح يا ريس و اقرب الي الصحة
عفتيتو : انا شايف ان الاقتراح التاني اوقع و اقرب الي الواقع الواقع يا ريس
اسفاريم : ايه رائيك يا دكتور بارديم قارص ....سيب اللي ايدك ده و رد عليه
بارديم : معلش يا ريس اصلي لسه قطم قرن فلفل اخضر ملهلبني ..معاك يا ريس
اسفاريم : تختار الاقتراح الاول و الا الاقتراح التاني
بارديم : انا عندي اقتراح ثالث يا ريس و اتكلمنا فيه ..قبل ما فخامتك تيجي و تهل علينا بطلعتك البهية
اسفاريم : ما شاء الله.... بقيتوا تقولوا اقتراحات كمان ..دي المعزة اكلت ولادها
بارديم قارص : لا معزة و لا حاجة ياريس ... بس طول بالك ... و هدي اعصابك.. و النبي يا شيخ لا تدوق حتة المبمبار دي و تغمسها في مرقة العكاوي دي .. نار يا حبيبي نار
اسفاريم و قد احمر وجهه و اكفهرت ملامحه :مش عايز .. ايه هو الاقتراح الثالث ... قولوا
السيد اصلان و هو يعصر ليمونة عالسلطة الخضراء : الاقتراح الثالث هو
عفتيتو و هو يتعامل بقسوة بالاسنان مع بصلة خضراء : الاقتراح الثالث هو
بارديم قارص و هو يمسح و يفرك يده بنص رغيف بلدي : الاقتراح الثالث هو
اسفاريم : ما تقولوا جري لكم ايه ... هو الاكل ..كبس علي نفسكم
الجميع بصوت واحد : الاقتراح الثالث هو ه هوه هوه ... رئاسة البعثة لمهند الكبدية و معاه موسند شرف نائب
هيهيهي هههههههههه...نياههههه ههههههههههه .. هعهعهع ههههههههههههه .. كهكه هههههههههه
.............................
و تطفئ الامور .. و ينتهي المشهد

نصر ابراهيم يوسف 10-03-2019 22:35

ههههههههههههههههههههه
شر البلية ما يٌضحك
.
نشكرك يا دكتور على هذه المسرحية الكوميدية المُتقنة
لانك اضحكتنا على الهم الذى وصلنا له بدلا من ان نبكى على حالنا ☻
.
طبعا هذه المسرحية من وحى الخيال و اى تشابه بين الشخصيات و الاسماء الموجودة بالمسرحية و اسماء و شخصيات حقيقية هو من قبيل المصادفة ☺


الساعة الآن: 07:54

Powered by vBulletin ®

Security byi.s.s.w