Connect with us

كلام خارج المقرر

إلحقنا يا دكتور صبحي … المريض بيطلع في الروح 

كتب:daraweesh

نتفهم موقف معالي وزير الشباب و الرياضة اشرف صبحي ,,بعد قراره القوي و المحترم بطرد المرض و الكذب و الخداع  من النادي الاسماعيلي ( و بإقالة مجلس الهمبكة ) .. قرار محترم  بعدما شخص مرض  جسد الدراويش .. لكن الدكتور اللي يعرف الداء – و لا يصف الدواء .. يبقي دكتور تعبان و حولان و كتيان و هو شايف المريض .. هلكان و ناشفان و مش قادر ياخد نفسه ..و يسيب المريض  يطلع روحه …و الدكتور قاعد بيفكر و يدرس و يفكر و يدرس .. لحد ما المريض يفطس !!!!

لن اذهب الي تقليد بوستات و كلام بعض الجماهير علي مواقع التواصل الاجتماعي و اتفلسف و اتريق علي لاعبي الفريق و مين راح  و من جاء لسبب بسيط جدا جدا 

 ان الفريق كله كان عبيط و اهبل و عيان بالبواسير و بالدودة الشريطية كمان و اتشرد لمدة 7 سنوات اسود من قرن الخروبو قعر  حلة القلية …  و من الناظر الشملول الي الكوكو البهلول … ثنائي الخراب و الدمار و الالاطه و الهطل 

 يعملوا ايه في فريق واحد تعرض  لكل انواع السحل و التنكيل و لا سجن ابو غريب … الحمد لله علي انها جاءت علي كده

 بس هو سؤال ..حاول تجاوب عليه و تعرف احنا في مصيبة ليه 

 حنقول عدد لاعبي الفريق 30 ..ماشي  و من الموسم الماضي كمان

 منهم  5 لاعبين هاربين .. بن خماسة و كارميللو  و دييجو و الزاموري و خالد النبريص

و خمسة لاعبين موقوفين … صالح جمعة و احمد محسن و باسم مرسي و حمدي النقاز و عادل عبد المنعم  

و لاعب مصاب : عبد القادر كوليبالي 

و لاعب مش فاهمين فيه ايه : عبد الرحمن مجدي 

و لاعب راح اعارة كمان : حازم مرسي

و لاعب مين و فين و ليه : محمد خليفة 

 يعني 14 لاعب ..ضاربهم السلك … و الباقي مخهم لاسع و مفرقع  … فيه في الدنيا فريق كده .و بيحصل فيه كده

و ده غير 9 لاعبين    … مقدمين طلب فسخ تعاقد !!!

و عايز الفريق يكون له شكل و طعم و رائحة ..ده فريق ماسخ بايخ شايخ قبل اوانه ..و البركة في الهمبكة و طراطير الهمبكة

و كمان الكوكو الهمبوك المرعب عمل كل مصائبه و كوارثة و اختتمها بتعيين الكابتن احمد حسام ميدو المذيع في التليفزيون في برنامج ريمونتادا … و هو مش عارف ريمونتادا مع الدراويش اصلا .. الكابتن ميدو كويس و محترم و كل حاجة .. و عايز  يعمل حاجة … لكن مش عارف يعمل حاجة  لانه مش مركز في اي حاجة 

 فقط نفكر الدكتور اشرف صبحي ..متبقي فقط 12 يوم  علي انتقالات يناير..و مفيش مجلس ادارة  ليه يا دكتور

هو احنا كنا بنصالح فخر الدين بن يوسف .. علشان القيد يفتح ..و الا كان صدقة عن عافيتنا مثلا 

و ليه التاخير يا دكتور اشرف صبحي .. مفيش قرار ..و ليه التاخير الغير مبرر و غير مفهوم 

الفريق في الضياع نفسيا و فنياو ماليا و بطيخيا  ..و شوفها و احسبها بنفسك 

الاسباني خوان جاريدو.ز حصل علي نقطتين  ٢ من ١٥
ايمن الجمل حصل علي اربع نقاط  من ١٢
احمد حسام ميدو حصل علي نقطتين  من ١٥  يعني لعب  5 مباريات و 3 هزائم و تعادلين و لا فوز و احرز 3 اهداف و استقبل 9 اهداف

يبقي لابد من التغيير للجهاز الفني او تعديله و طبعا موظفين المديرية … مالهمشي في كده 

موظفي مديرية الشباب و الرياضة … موظفين اي كلام كوبيا او دوبيا و روتين ابن روتين

و الموظفين اليوم لم يفكروا اصلا بالذهاب الي استاد الرياضة العسكري و لا ارسلوا العلاقات العامة  من الاصل و لا اصلا يعرفوا الاستاد فين و لا ان الاسماعيلي بيلعب اصلا 

 دول موظفين علي باب الله و لا لهم قرار من الاصل و فقط غلابة زي حالاتنا  ..اول الشهر عيد عندهم زي عندنا

و لو الكومي موجود – بكل ما فيه – كان شاط ميدو بره الثلاث خشبات ..يعني حتي المجنون ..كان اتصرف غلط و لكن صح  

و الكومي ..جاب لنا  مذيع بنص عقل و مدرب بنص عقل  ..و الخراب ماشي ماشي

و الامور بتدخل في المنطقة السودة الكحل .. بعدما عدى من المنطقة الحمرء ..و محتاج لجنة محترمة 

لجنة محترمة و معها لجنة فنية و   لها اتصالات تجميع نقاط و لاعبين و فلوس 

و ابعدوا الاستاذ – اللي بلا صفة – اللي بيكلم و يكره و يطفش الكبار و بيلبسهم طاسة الخضة 

سعادة الوزير اشرف صبحي .. لابد من سرعة التحرك و تعيين اللجنة الادارية و اللجنة الفنية 

و الا المريض اللي نايم سيدخل في غيبوبة – و لا حتنفع معاه قبلة التنفس و لا الصدمات الكهربائية 

ساعاتها اهل الميت .. مش حيعملوا عزاء .. الا لما ياخدوا بالتار ..و زمان قالوا .. التار و لا العار 

و فقط تالق الحارس محمد فوزي و صد ضربة جزاء بالدقيقة 77 .. هدى الامور كثيرا ..و الباقي عليك يا معالي الوزير 

تستغل حالة الهدوء في تخليص الاسماعيلي من حالة – اللادارة و اللافلوس و اللاقرار 

لان المرحلة القادمة لا فيها .. صبر …و لا انتظار و لا هزار 

و انتهى الكلام خارج المقرر

بقلم الدراويش