اقول لك تعمل ايه يا كومي … إرحل

كتب:daraweesh

قعدنا كام يوم مستريحين واعصابنا هادئة واعصاب الفريق مرتاحة علشان المهندس يحيي الكومي .. كان بعيد عن التصاريح والكلام اللي من غير معني ولا هدف 

وظهر كل اعضاء مجلس الهمبكة … مكتومين زي كتمة الفول المدمس .. وبمجرد ان فريق 2008 ..كسب بطولة الجمهورية .. خرجت التعابين والهمابيك من جحورها وهات يا بوستات وتصريحات … واخرها ظهر رئيس الكل ..طلع اتمطع وتفلسف و تطلع علي قناة الحياة و قعد يقول : اعمل ايه .. اعمل ايه  اعمل ايه ... !!

واخونا اللي مش عارف يعمل ايه .. لم ينسي ان يقول فزنا ببطولة الجمهورية للناشئين 2008 …. طيب اسكت احسن لك والا اقول لك علي فضيحة ( الترنجات ) … !!! والا اخونا اللي صلي الجمعة وخرج من باب نادي الصيد التاني .. علشان ما يجيبشي ميه معدنية …!!!  لا مش حنقول ..  والله حليم ستار … بلاش فضائح 

 المهم اخونا الكومي …. قاعد يقول اعمل ايه .. اعمل ايه .. اعمل ايه 

 نقول لك يا مهندس الكومي .. تعمل ايه.. إرحل 

 اول حاجة عايزين نعرف ايه سر التوقيت الغريب والعجيب.. ساكت بقي لك اسبوعين وطالع ليلة مباراة الفريق المتوتر والقلقان مع فريق فاركو .. وتقول الفريق متدمر و …. و …. و … وحالته كرب

توقيت غريب وعجيب ومريب , ولا معني له انك لا تعرف الف باء ادارة شئون الكرة علي الاطلاق وقاعد تقول انا جبت 11 لعيب والمدير الفني مش عارف ما بيلعبهمشي ليه وانك قعدت مع الكابتن حمد ويا تري قال لك ايه .. لانك ما قلتش

ورايح تقول ان علي ابو جريشة وعماد سليمان .. سبب تدمير الفريق وانهم تركوا شكري نجيب من غير تجديد وصادق تعبان وشيلونجو هرب .. وناقص تقول كمان واوكرانيا بتتضرب بسبب ابو جريشة وسليمان  

يا مهندس يحيي الكومي ..لولا ترك شكري نجيب من غيرتجديد وصادق التعبان . ما كانشي حيكون معاك 11 مليون تشتري بيهم شروة اللاعبين الكسر اصلا 

وكمان نسي المهندس الكومي ان الكابتن علي ابو جريشة وعماد سليمان كان معاهم لاعب اسمه محمد حسن .. انت لم تستطع ان تحضره رغم كان المطلوب فيه 7 مليون وانت صرفت 350 الف دولار علشان البوليفي كارميللو للشراء ومقدم لللاعب عقده اجمالي  350 الف دولار ومابيلعبشي … يعني كام ؟  يعني يساوي 6 مليون جنيه  …  هل ده معقول

 طيب بتقول ان الحارس احمد عادل بخمسة مليون وده غلط لان عقده 3.5 مليون جنيه وحاصل علي 2 مليون ويعني انت عليك 1.5 مليون جنيه فقط .. بينما جبت اللاعب الارجنتيني لوحده 350 الف دولار وجان موريل350 الف ( الايفواري يا كومي ) + 300 الف دولار يعني = مليون دولار = 16 مليون جنيه … ده غير مروان حمدي 700 الف وشادى ماهر نادي دكرنس 800 الف وابو بكر حمزة 300 الف و سايكوو 900 الف و 80الف دولار راتب .. وحلواني اعارة بمليون جنيه  … تعرف تحسب لحد كام يا عمنا الكبير ..  علشان تعرف تقول 5 مليون جنيه في حارس مرمي احمد عادل عبد المنعم وانت بنفسك بتقول صرفت اكتر من 40 مليون وجاي تتكلم في خمسة مليون وغلط كمان …. والله عجايب !!!!!

 يعني لما تتكلم عن الكابتن علي ابو جريشة والكابتن عماد سليمان وهما بيشتغلوا تحت انف ابراهيم عثمان المجمد بالتوقيع .. تعرف انت بتقول ايه 

 سيبك من الفلوس خالص ..تعال نتكلم عن الارقام و احصائيات اللاعبين 

 اللاعبين اللي كانوا مع ابو جريشة وعماد سليمان فيهم عمر رضوان .. اللي مش عارفين نشتريه وان شاء الله يكون في المنتخب و كان فيهم حسين السيد وفخر الدين بن يوسف ومحمد حسن ولعبوا  كل المباريات الا وقت الاصابة والايقاف .. انت بقي جبت لاعب اساسي ميييين ؟؟؟ وصرفت كااااام ..وقبل القيد الشتوي ما يقفل بساعات .. بدون معني او فهم .. جبت ابو بكر حمزة  ليكون سعره مع مروان حمدي بمليون جنيه .. وهما اصلا لا يلعبوا في ناشئين القناة من الاصل ومدرب القناة تعجب من المبلغ اللي اتدفع فيهم من البداية ..مع ان مفيش حد من الجمهور قال : ابو بكر مطلب جماهيري او عصافيري .. او .. ابو بكر يا كووووومي  !!!!!!!

طيب مشيت عبد الله جمعة ليه علشان الحلواني اللي لعب اليوم فقط امام فاركو وبعد انهيار مستوي عصام صبحي …  وكمان مشيت المدافع مروان صحراوي ليه ( وجبت مكانه جزائري خط نص ما بيلعبشي ) وهما بدلاء ممتازين وكان ممكن باهر يلعب مكانه مدافع ايمن اللي لعب اليوم محمد بيومي وكان نقطة توتر وضعف وخوف .. وحتي لعب مكانه احمد مصطفي باك يمين !!!! بعد ما لفتوا نظره !!!!!

 عارف ده كله ليه .. اقول لك 

 ببساطة علشان ما عندكشي فكرة يا سيادة الرئيس ولو واحد في المئة من ادارة شئون كرة القدم و واخدها همبكة وزفلطة وانتكة .. وروحت عينت لجنة فنية قبلها ومعاها لجنة تعاقدات وتركتهم يضربوا في بعض وانت قعدت تتفرج .. لكن من البداية لم تحدد مهام لا اللجنة الفنية ولا لجنة التعاقدات وفيهم شخصيات محترمة عندها خبرات متراكمة وبيفهموا بشكل عملي وعلمي … وكان ممكن ان يكون التعاقدات افضل من كده الف مرة … لكن انت طلعت فضحت واحد من لجنة التعاقدات بشكل لا يليق وهو ما جعل الباقيين يصمتوا تماما علشان خاطر نائب رئيس المجلس .. وخرجت فترة القيد كما رأيتها ونراها والفريق في النفق المظلم والصعب الخروج منه.. طالما اسلوب الهمبكة والفهلوة والسرسرة موجود ومسيطر والمنافقين شغالين الله ينور 

وكمان المهندس يحيي الكومي قال  : ليس من الضروري أن يتواجد في المجلس أشخاص لديهم خبرة في الكرة، هل خوان لابورتا ورومان أبراموفيتش بيفهموا في الكورة؟”.ويترأس خوان لابورتا رئاسة نادي برشلونة، في المقابل يمتلك الروسي رومان أبراموفيتش ملكية نادي تشيلسي والذي قام بعرض النادي اللندني للبيع في الفترة الأخيرة.

ويمكن نتفق مع المهندس الكومي في ذلك ولكن ………. هناك جيش جرار يتولي المسئولية الفنية داخل تلك الاندية ورئيس النادي لا يتدخل في الكرة نهائيا ولا من قريب او من بعيد ... لكن فضحك الارجنتيني خوان براون ان الذين تعاقد معهم النادي 11 لاعب .. لا يعرف منهم الا 3 فقط .. والدليل نفسه قال له الكومي انه حيعين شخصية كبيرة مستشار فني لمجلس الادارة ..هو اللي قال كده … طيب مين و ازاي ووظيفته ايه .. لابد ان يكون غير عصبي .. علشان الكومي لا يبتعد عن السيطرة والاضواء .. اللي يعشقها كل العشق 

 لكن ازاي والخراب وصل مالطا والروس علي ابواب كييف … والفريق دخل في النفق المظلم وكل خطوة الدنيا بتضلم اكتر واكتر

ولا احد يدري .. ايه اللي حيحصل وكيف يخرج الاسماعيلي من النفق المظلم 

وهل يا تري سيتم الاطاحة بالكابتن حمد ابراهيم لانه لم يفز في 3 مباريات زي اخونا براون الارجنتيني … اللي لاعب اليوم تشكيل امام فاركو .. وبيقول لهم تعالوا اغلبونا .. مش فاركو معايا !!! 

 الكومي اصدر قرار بتعيين الكابتن محسن عبد المسيح  مشرفا فنيا على فريق الكرة وقطاع الناشئين بالنادى الإسماعيلى ومستشارا لمجلس الإدارة. ده من باب امتصاص الغضب بعد التعادل مع فاركو  ووصول الفريق الي النقطة 5 من 36 نقطة ولا هدف علي استاد الاسماعيلية … يبقي كده ضمنا ان يلعب الكابتن محسن عبد المسيح راس حربة والا ايه .. لان حسني عبد ربه ..مدافع مقهور ولا يحرز اهداف .. هو فيه ايه بالظبط !!!!!!

وحسبنا الله ونعم الوكيل واللهم استرها معانا 

وانتهي الكلام خارج المقرر