الاراجوز اللوز اللوز و البنت كشكليوز و حباطا النطاطا

كتب:daraweesh

هاتوا حسام حسن ..لا هاتوا محمد وهبة .. لا هاتوا ايهاب جلال …. لا هاتوا حمزة الجمل … لا  هاتوا لبن العصفور من جوه الزغلول ومعاهم ارنبة والدة لونها احمر مزنهر وحمامة بيضة يتيمة او واحدة خضراء لئيمة

 و اهبد ..زي ما انت عايز و قول زي ما انت عايز .. اصل الكلام ما علهوش جمرك و طلع المدير الفني الجاهل اللي جوالك .. و زود الطين ’’ بلة و طين كمان .. ما هي عوزاك و ناقصاك انت كمان

الكلام موجهة للذين ودوا النادي في داهية و قالوا و عادوا و منها : الايفواري يا كومي ..و عملوا قرشين حلويين وطعمين و بالدولارات متنعمين و متغندرين

 لكن اللي بيفهم  بيريح و بيقول : لو جبت مدرب مين  و في النادي الاسماعيلي قاعد و متربع ومستربع  كل من :  الاراجوز اللوز اللوز و البنت كشكليوز و حباطا النطاطا

و ترجمتها باللغة العربية

يعني العيب مش في المدير الفني و لا في اللاعبين  و لا في اي كان … العيب في لادارة العليا  التي حولت النادي الي مستشفي عاهات و الفريق الي كرخانا واللاعبين الي عاهات ..محدش عارف كوعه من بوعه  

النادي اصلا بيدار بطريقة البالالالم و للتفسير هي  طريقة مهلبية ملوخية انشكاحية انتقائية انتقامية … رئيسها التنظيمي اراجوزي الهوي و بهلولي الفكر و بوللي العقيدة وأغا المنهج و الفهم  

و مع الرئيس الاراجوزي و البنت اللي اسمها كشكليوز و  واقف وراهم حباطا النطاطا.. و كل معاهم كشكليوز هو الطبطبة و الماساج و مساج الخير و الرضا و السعادة .. اما باقي المجلس المدلس فدورهم زي حباطا النطاطا .. كل واحد منهم .. اخد قرصة عجوة و لفة مشبوهة وسرحان في الملكوت وتشجع وطلع من مناخيرك و ليلتنا انس يا عم الاراجوز الكبير و الحبر الاكبر و الجوشن الاعظم و كل حباطا و حباطا منتظر فقط .. فترة القيد .. يطلع منها بسبوبة و نحتاية و سوبيج اناناس … ويولع النادي والفريق 

و علشان الصورة  تتقندل و تطين كمان و كمان …  الناس الحلوين المقطقطين بتوع : الايفواري يا كومي و محمد حسن شارينا  …. دلوقتي نازلين تقطيع في اللاعبين و عايزين يبيعوهم بالكيلو و شروة واحدة  …. ليه علشا : الايفواري يا كومي ..من جديد و نطلع بنحتاية حلوة و الدولار بقي بخمسو عشرين بلبل .. يعني نحتاية واحدة .. نبقي زي اللي سبقونا مع ادارة المغارة و ادارة السلاحف وتبقي : هوب  توء سوء بوء توك … بصوت علي بيه مظهر الفنان محمد صبحي 

الفاهم و الواعي يعرف ان بالفريق ممكن تشكيل قوام محترم من اللاعبين المتواجدين بالوقت الحالي و بتاريخ اليوم 8 ديسمبر 2022 .. لكن بشرط واحد هو ابعاد الاراجوز اللوز اللوز و البنت كشكليوز و حباطا النطاطا من النادي و الذهاب بهم الي اقصي عمق في بحيرة التمساح و ربطهم جميعا بثقل وزنة الف طن ..و نرميهم ..بلا رجعة 

لكن من يشاهد مباراة اليوم للفريق ضد فرق سيراميكا القيشاني … احسبوا كم كرة قطعت من عبد الرحمن مجدي بالشوط الاول 9 من عشرة و العاشرة شاطها مباشر علي المرمي و انقذها حارس القيشاني … باسم مرسي اكثر من 6 مرات افساد فرص و هناك لعبتين للشامي د 26 و 30  تجعل الانسان لابد ان يجدد ايمانه بعدهما ..و يمكن ان نعدد كل الاخطاء من الالف الي الياء بالنسبة للاعبين و معناه و ترجمته هي التركيز مفيش و توهان مقصود او غير مقصود و لاعبين بيحصلوا علي خمسة و ستة ملايين و لا يقدموا ما يساوي  ثلاث تعريفه 

 لكن ليس معني هذا ان المدرب الاسباني جاريدو مش غلطان .. لا غلطان و مشطب كمان و مش فاهم يتعامل مع ادارة النادي ازاي و ورطوه و خلوه يجيب اسرته و يدخل بنته في التجمع الخامس علشان يسمع الكلام و ينفذ التعليمات ..و لما يمشي ..يمشي بكارثة و نقطتين من 15 نقطة و دقي يا مزيكا 

 الخلاصة ان الخراب الكامل مؤجل  والكل مهتم بمصير جاريدو و مين المدرب اللي جاي .. واهي حقنة بنج في العضل – لا مؤاخذة … و يؤجل الكلام الي ما بعد المباراة الماضية !!!!!

و الصبر من عندك يا رحمن يا رحيم

و انتهي الكلام خارج المقرر