الحل اننا نغلب السنغال .. و يلغوا الدوري

كتب:daraweesh

لو قلت لواحد اسماعلاوي فاهم … الاسماعيلي حيجيب جولين في الشوط الاول .. حيقول لك ايه هو ايه انت بتحلم 

لو قلت لواحد اسماعلاوي فاهم .. ان محمد الصباحي و ابراهيم نور الدين .. يحسبوا للاسماعيلي الهدف الثاني بعد مراجعة الفار …

كان حيقول لك  ايه هو ايه انت بتحلم 

لو قلت لواحد اسماعلاوي فاهم .. ان محمد الصباحي و ابراهيم نور الدين .. يحسبوا للاسماعيلي ضربتين جزاء منهم واحه في الدقيقة 87  .. كان حيقول لك  ايه هو ايه انت بتحلم 

 لكن كل ده حصل … و لكن الحلم تحول الي كابوس و تعادل الاسماعيلي 2-2 مع مصر المقاصة  و فشل الاسماعيلي في تحقيق فوز واحد  طوال 11 مباراة .. و يا خوفي من اللي جاي 

و اصبح الاسماعيلي في المركز 18  و الاخير بجدارة و حتي فريق ايسترن كومباني .. سبق الدراويش بنقطتين كمان .. و يا خوفي من اللي جاي 

سعادة الجهاز الفني المحترم بقيادة الكابتن حمد ابراهيم عثمان .. جاي يضع تشكيلات غير مفهومة .. و يستمر في الالغاز و اللوغريتمات … و يستمر الاعتماد علي  مخلوف و احمد مصطفي و عصام و دسوقي .. بناءا علي مكالمة هاتفية مع نادي بيراميدز  و رغم ان كل من له عيون شايف مخلوف .. ضايع من اول لمسة له  ..حتي خرج بالدقيقة 67 .. وبعد ميس باص و مخالفات بنسبة 8 من 13   و مين اللي قال مخلوف يلعب علي عماد حمدي

و كذلك دسوقي و عصام ..هما مش هنا خالص و اللعب كله علي سيستم واحد حتي خلص بنزين و سولار للاعب احمد مدبولي …  و هرجلة و لخبطة بعدما وقع نص الملعب تماما من بعد هدف الاسماعيلي الاول د 14  و ارتباك في كل شئ و خاصة من الدقيقة 22  بعد الغاء هدف لاحمد مصطفي …. و لولا خطأ من حارس المقاصة المغلول محمد مجدي و استطاع  مدبولي ان يحرز هدف الاسماعيلي الثاني د 35  و دييجو يضيه هدف لا يضيعه و لا مخلوف نفسه د 42 .. كده الماتش خلص مع الاسماعيلي مع نهاية الشوط الاول .. خلص الماتش تماما تماما بالنسبة للجهاز الفني و لاعبي الفريق الفراكيك المزاليك 

 الجهاز الفني … اتفاجأ بهدفين من مصر المقاصة في اول دقيقة من الشوط الثاني و لا مدير فني هنا و لا مساعد اكاديمي هنا و لا مدرب فرج هنا .. كله راح يشرب شاي علي القهوة … و لا واحد من الاجاويد دول وقف ينظم الدفاع المتكهرب من اول الماتش … و بعد عشر دقائق جاء الهدف الثاني للمقاصة … و الهدفين واضح انهما سوء تمركز من قبل كرة الهدف نفسها .. لكن تقول لمين … جبنا حمد ابراهيم يجرب ..ماشي .. لكن ليه نجرب معاه مدرب مساعد و مدرب علي الزيرو …. مين يستحمل كل ده 

بالمناسبة هو الاخ عصومه صبوحة  اللي شاط ضربة الجزاء الاولي د 59 .. كان قصده ايه و بترجم ايه و مين المخبول اللي قال انه احسن واحد .. طبعا حتقولوا ان عبد الرحمن مجدي اضاع التانية ..  اقول ايه … و حسبنا الله و نعم الوكيل 

 يعني كل احلام الجماهير تحققت و خوف الجماهير من الحكم  كان خوف بلا مبرر و لا من الفار  .. لكن الجهاز الفني حول كل شئ الي كوابيس .. و تعادلنا مع فريق ضعيف المقاصة  و اتغلبنا قبل كده مع الفريق الاضعف الجونة .. و الفريق ماشي بخطى ثابتة في النفق المظلم … و كل خطوة بتظلم اكتر و اكتر  و كل ده بسبب قرارات مجلس الهمبكة و تعاقدات الشتاء  و كان اخرها الساعة الاخيرة مع لاعب اسمه ابو بكر حمزة الجمل .. علشان نكمل 11  تعاقد كلهم فاشلين بلا اي استثناء سواء من تم تجربتهم او لم يتم ذلك .. ان شغل الهمبكة لا ينفع و لا يفيد مع فريق معرض للهبوط .. لكن علشان رئيس الهمبكة و اتباعه ..يخرجوا يقولوا  اقوي صفقات في تاريخ النادي الاسماعيلي.. و يزيطوا التابعين و المحللين بتوع الجزرو اللفت … و يعلقوا صورة رئيس النادي في بيوتهم 

طيب هو فيه ايه …. فيه حاجة غلط و غضب علي الفريق و النادي !

يجوز جدا …لان الهمبكة شغالة دربكة و تفتق ذهنهم في رفد موظفين و قالوا نعمل لهم اختبار مخدرات – توفيرا للنفقات و مع ان التحليليكلف خزينة النادي من الألوف خمسين … و مفيس فلوس اصلا  .. الا بعد فلوس ممارسة بيع الخردة بالنادي و تخش الخزينة فلوس و رمضان علي الابواب و كتير من الموظفين رفعوا اكفهم للدعاء علي من ضحك عليهم و قال اقل راتب لعامل قص النجيلة حيكون 3000 جنيه … فيه حاجة غلط و ظلم لناس كتير و اللي يقرب من رئيس الهمبكة . ياكل ملبن .. و اللي يقرب من نائب رئيس الهمبكة ياكل ملبن . و البعيد عنهما … يرفس و يعض في الارض و يدعي عليهم و يقول .. الهي ما تكسبوا  و لا تفرحوا عمركم 

 بالمناسبة ..تم فسخ التعاقد مع المدافع التونسي مروان الصحراوي .. علشان يجيبوا لاعب جزائري اسمه محمد بن خماسة ..ما بيلعبشي اصلا و اي لاعب في خط الوسط افضل منه او اجهز منه علي الاقل . يبقي ليه كان الهمبكة في التعاقدات من اجل الكل في الهمبكة يكون مرضي و سعيد …. طيب لاعب في الدرجة التانية بيقبض مبلغ في الدرجة التانية ( كذا بالجنية المصري ) ..الهمبكة تجيبه بنفس المبلغ ( كذا بالجنية الامريكي  )  يعني علاوة 1500% … علشان كده طيب … و برضه ما بيلعبشي ..  شادي محمد و حسن ياسين و الحلواني ( كل يوم في تعاقده ب 55555 جنيه )  ..كلهم مش جاهزين- ده غير كارميللو و مارشللو  ..طيب جايبينهم ليه و احنا في المركز الاخير ..همبكة همبكة 

طيب الحل ايه … اقول لك مش عارف .. لان الدنيا داخل النفق ظلمة كحل .. و مش سامعك كويس … و لكن اللي انا شايفه ان الامل الوحيد ان منتخب مصر يغلب السنغال رايح جاي و نصل كاس العالم .. يمكن يلغوا الدوري .. اهي اضغاث أحلام .. و يمكن فالديميير بوتين يوقعوا عليه عقوبات جديدة من الامبرالية العالمية و يلغوا الدوري المصري كمان و كمان 

كل الشكر  و التقدير لجماهير الدراويش الرائعة و الجميلة و التي ذهبت الي استاد الكلية الحربية و الحزن الاكبر انهم فرحوا ثم رجعوا حزانى في النهاية 

و كله علي الله ..وحده … سبحانه و تعالى 

و انتهي الكلام خارج المقرر