الفانلة القاتلة …. فيلم رعب فاشل

كتب:daraweesh

واحد ماسك طبلة .. و التاني ماسك صاجات .. و الثالث ماسك مزهر ..و الرابع ماسك دف .. و الخامس ماسك طرومبيطة … السادس ماسك عصايا و غطا حلة رأس العجل …. و الكل بيخبط و بيهبد لوحده و بلحن رتم منفصل … و النتيجة تصم الأذن و تخرج الناسك من تركيزه …و تخلي الأطرش يصوت من الصداع … و كوووووووووووول ده ……. و الخواجة جاريدو عايز هدوء علشان يشتغل … لكن الهدوء يجيي منين و فرقة المجانين شغالة شغل كله مجانين في مجانين
شغل عبط و بله و كل يوم حوار جديد و شخبطة و همبكة و شعوطة … لان موضوع لأسعد الجزيري خلص في الفيفا … و الكومي باع أخر قيراطين عنده .. علشان يسكت الولاد بنسبة من المستحقات … علشان يحصل هدوء
لكن ليه حرام
ما يكونشي فيه حوار جديد .. و نتقسم أتنين و تلاتة و تلاتين و اربعين حزب
مؤيد و معرض و معارض
لازم حوار و تشتيت و لازم الجرس يفضل يرن و يرن لحد ما يتحرق الملف ..و نجيب جرس تاني و نقعد نرن و نرن .. لحد ما يتحرق الملف و يحرق أعصابنا
و أخر الحوارات من نوع الجرس الزنان و فرق المجانين الهبلة
كان أخونا الكومي.. عمل اللي عليه و قال نلعب الماتشين في القاهرة ما عندوش مانع و لو نقلوا المباراتين في طرابلس الغرب في ليبيا .. الكومي مش زعلان
خلص موضوع الماتش فين
حوار .. حنلبس أيه .. في ماتش الأهلي .. اللي جاي
حنلبس كوبا و إلا جامايكا و إلا فجوار و إلا جاجوار
و ده يقول و ده يزيد و ده يعيد
و كله هتش و نتش و انتش و اجري يا رمان
خناقة حارة … و مفيش أصلا ميت
الميت من كتر الحوارات زهق و ردت فيه الروح … و راح يشرب قهوة علي القهوة
فانلة أيه و زفت أيه و خامة أيه و زفت أيه
و قال: يا أبويا .. علمني الهيافة ..قال له : تعال في الهايفة و أتصدر
و أتصدر هنا باللغة الفلاحي بتاعتنا .. يعني أقف مكانه و أحرن .. لا تروح هنا و لا تروح هناك

و كان فين من زمان الخلاف السفسطائي ده .. و ليه قبل بداية الموسم بايام 

الفانلة اصبحت قاتلة  للوقت و الاهتمام و  فرصة للخناقة و التعصب و التغضب..

يعني هي جت علي الفانلة و ماركتها و خامتها و موحنتها و كهنتها
طيب هي مسئولية مين ..اختيار الفانلة و ماركتها و خامتها
طيب مش اللائحة الأساسية للنادي هي اللي حددت الكلام ده
طيب هل تم الترسية علي الشركة الحالية و أزاي
طيب هل الخامة و النوع و كل التفاصيل مش محددة في العقد
طيب هو أزاي نلبس الفريق فانلة عقدها انتهي
و متش الأهلي كمان .. اللي سعره كده
طيب مين حيحاسب الشركة أم ماتش واحد أزاي
و بناء علي أي عرض و علي أي قانون مناقصات
حاجات كتير .. تؤكد إننا لسه ماشيين في سكة اللي يروج ما يرجعشي

فكروا فيها فنيا…. حتلاقوها عيب ..ان تحدث و الفريق فيه اللي مكفيه 

فكروا فيها ..اداريا و ماليا  تنظيميا .. حتلاقوها ما تنفعشي و حتدخلكم في حوارات و مشاكل
فاضل أربع أيام ……………. بلاش وجع دماغ
و أوعي تتكلم علي الماتش اللي كمان أربعة أيام و لا بطاقات الأجانب و لا أي حاجة
المهم حنلبس أيه …. فانلة .. ايوة فانلة إيه
و مش مهم الحشو جوه الفانلة . المهم الفانلة الفانلة

و الجماهير عايشة فيلم ( الفانلة القاتلة ) و كل واحد بيحب الفانلة اللي بيطالب بيها الشخص اللي بيحبه او من شلته او قريبه … فيام رعب فاشل …. و نهايته اكيد من افلام المقاولات 

نصيحة لكل المسخنيين.. و للطرفين المتصارعين … خفوا شوية التسخين و التعصب 

 لان الخسران الوحيد في القضية دي هو الجمهور اللي بيسدد الفاتورة 

كل واحد من المتصارعين او المسخنيين.. له حياته و اهتمامه  و اشغاله 

 احنا – الجمهور – فقط اللي بندفع الفاتورة