الكومي و جاريدو و التشكيل …و إنقذهم مروان فاركو

كتب:daraweesh

من غير لف و لادوران … تشكيل الفريق الذي بدأ به الاسباني جاريدو في مواجهة فريق فاركو … من وصايا المهندس يحيي الكومي رئيس مجلس ادارة الهمبكة … و لو مش عايز تصدق…  لازم تصدق…  علي الاقل ان تشكيل جاريدو ..يخدم مصالح الكومي … بس خلاص 

و الحقيقة ان العبد لله لما وصل له التشكيل لكتابته في الموقع ..تصورت ان ا.مؤمن مجدي .. ارسل لي صورة قديمة من موبيله لتشكيل الفريق في مواجهة فريق مصر المقاصة بالموسم الماضي  …  الفرق الوحيد ان التشكيل لم يكن به : محمود دونجا !!!و المدرب كان اسمه مصري حمد او حمزة او اي حاجة !!!

و لو عايز الدليل .. ان كل من تجرأ علي الكومي و اخد رفض علي الشيك الكوميجي … قعد بره .. او لم يذهب الي الاسكندرية من الاصل … و اللي بقي في الاسماعيلية خلاص .. الكومي اعطي توجيهاته بقراءة الفاتحة  علي كل من يقبض بالدولار .. حتي لو كان جاريدو نفسه …و البديل موجود و الباب يفوت ….. الجمل !!!! و هو بيدرس فرنساوي .. لما يبقي هو المدرس الاسباني !!!!!

 القصة كلها … ان الكومي زهق من الصرف و طالما سيادته بيصرف .. خلاص مش عايز اجانب ابو دولارات ..و مش عايش الشواط و لا الزموري و لا النقاذ و لا كوليبالي و لا كوليبالك انت … انابأصرف من جيبي .. لا هو من جيب زين  الا الطيب و لا زايد  ..خلاص خلونا في المضمون مع الجنيه لمصري .. و كمان يا جاريدو .. أدب اللي اشتكوا و منهم عبد الرحمن مجدي  و علي رأسهم طبعا  .و يا سلام لو يطير الزاموري و الشواط … و بكده يبقي وفرنا 18 أرنب مصري و لو طارد جاريدو يبقي وفرنا 22 ارنب مصري كمان !!!

و هي الخطة كده من الكومي  و جاريدو…  .مش عايزه كلام … لكن كانت الخطة حتفشل في الدقيقة 96 و 18 ثانية .. عندما  فشل مهاجم فاركو بالدقيقة مروان مجدي .. في تسجيل هدف بانفراد كامل  بنسبة 100000% .. و لو كان مروان سجل … كان طار جاريدو و لحق باقي مباريات كاس العالم قطر 2022  في مدينة ملقا الاسبانية و هو استلم نص مرتبة فقط .. و مش حيلحق النص التاني … و يمكن كمان طار الكومي لو مروان مجدي سجل الانفراد بالدقيقة 97 .. كان الطيران  حيبقي للركب !!!

 قصة التشكيل خلونا نراجعها..جاريدو لعب بتشكيل و تغييرات كالتالي : مكون من محمد فوزي – عصام صبحي ( كريم عرفات 54) و محمد هاشم و باهر المحمدي و محمد الدسوقي و عمر الوحش ( صالج جمعة 72) و عماد حمدي و محمد مخلوف ( عبد الرحمن مجدي 54) و محمد عبد السميع و حازم مرسي ( باسم مرسي 54 ) و احمد مدبولي ( محمد الشامي 72) 

و كلنا شاهدنا راس الحربة الحزين حازم مرسي بيخرج برة منطقة الجزاء و محمد عبد السميع اضاع مجهوده بالخدمة المزدوجة بوسط الملعب .. لذلك كان اللعب للاسماعيلي من خارج الصندوق و لم تتواجد فرص للتهديف الا عن طريق ضربات رأس من كورنر حازم د 15  و باهرو عماد حمدي قبل نهاية الشوط  .. و تسديدة من خارج المنطقة من مخلوف  د 38 و ان كان اجمل اللقطات من مخلوف بالتسديدة التي تصدي لها الحارس شيكا…  و باك ورد من محمد عبد السميع. و ظل طوال الشوط محمد فوزي متفرجا و تراجع هجوم فاركو 

 حتي كان الدربكة د 48 و منها احرز الجزائري رزقي حمرون هدف فاركو …. سبب في تغيير خطة جاريدو  و الكومي و لعب بتغييرات ثلاث د 54 ( باسم و عبد الرحمن و عرفات )  و تغييرين د 72 ( جمعة و الشامي )  و ظلت التغييرات مجرد استحواز و صل الي 61%  و  بالدقيقة 78  يسجل باسم مرسي هدف التعادل  من اسيست ماكر من صالح جمعة ..و 7 دقائق وقت بدل ضائع و تعصب من لاعبي فاركو بلا مبرر  و يجيي دور الشامي العظيم و يضيع هدف لا يضيع د 92 و عرضية رائعة من عبد الرحمن ينجح  المدافع البكري في تشتيتها قبل ان تصل لباسم مرسي  و عرضية  عبيطة جدا من محمد الشامي 

و بالدقيقة 97 .. ينجح المهاجم مروان مجدي مهاجم فاركو في الابقاء علي جاريدو و الكومي و كل مجلس الهمبكة .. باضاعة فرصة لا يضيعها احد و لا محمد الشامي نفسه … ويؤجل الامر الي وقت اخر 

و لا حول و لا قوة الا بالله العلي العظيم 

و انتهي الكلام خارج المقرر