الكومي يجبر اللاعبين على التمرد والعصيان!

كتب:daraweesh

كتب اوندي سليمان …  الكومي بيلعب نفس اللعبة القديمة الرخيصة ..يدي اللاعبين مواعيد لصرف المستحقات المتأخرة وما بيوفي بالوعد ..يزهق اللعيبة ، يكفرهم وهو يقصد ويتعمد انهم يغضبوا

واما يزعلوا يقول انهم اتمردوا! …
هو بيختلق مشاكل عشان يطفشهم …

مش هتبيع يا كومي لأنك مش جاي تتشهر وتتمنظر وتبيع ولادنا لغيرنا وتضعفنا وتقوي منافسينا

عايز تكون رئيس للنادي الاسماعيلي يبقى تصرف على اسمك اللي بيتلمع مش هنصرف احنا عليك ببيع ولادنا

برضو مهما غضب اللعيبة ومهما غابوا عن التدريبات مش هنقول بيع ..اديهم مستحقاتهم المتأخرة واحترم كلمتك ووعودك معاهم ..كل لاعب له أسرة وعنده إلتزامات

ده انت رافض تعيين متحدث إعلامي لبق و عنده كاريزما، عشان انت عاشق ” للحديدة” وياريتك بتعرف تتكلم ،لكنك بتدلدق على نفسك وبتفشي أسرارنا وبتفضح مواطن الضعف في نادينا زي مثلا ضعف مواردنا اللي عرفت و طمعت كل من هب ودب في لاعيبتنا اللي حليتنا !!

اللعيبة الجديدة الله اعلم بمستواهم الحقيقي وسرعة انسجامهم وتأقلمهم مع بعضهم …وده اهم شرط اننا نحكم أن الصفقات الجديدة جيدة ولا وحشه .

ياريت ماحدش من الجمهور يكرر نفس أخطاء المواسم السابقة ،اللي نجح فيها رؤساء النادي يضحكوا بيها عليهم بانهم يحرضوهم ويكرهوهم في اللعيبة ويضطروهم انهم يقولوا ” بيع ، النادي ما بيقفش على حد ” لغاية ما كنا كل موسم بنقف على شفى حفرة هاوية الهبوط للمظاليم !!

لا لبيع عبدالرحمن مجدي وباهر المحمدي …اصرف ليهم مستحقاتهم يا كومي وإن كان النادي فعلا ما بيقفش على حد ، فالحد ده هو انت .