المحلة تقهر الهمبكة .و البركة في المناخ

كتب:daraweesh

اتصور مع الهمبكة و الشخللة و الصهللة ..لا يمكن ان يكون هناك تركيز

 لا تركيز في التعاقدات و لا تركيز في الاختيارات و لا تركيز في اي شئ ..طالما رئيس النادي هو محترف الهمبكة و الزفلطة و ابو قرش كله 

و سيستمر رئيس الهمبكة و الهمبوكيين …. طالما توقفت المباريات بسبب مؤتمر المناخ  و اترحمنا من مواجهة فيوتشر و احخنا مقهورين  علي كل المستويات

و تعالوا نشوف اراء الجماهير .. من الشمال و من اليمين

مستني ايه من صفقات زي باسم مرسي والنقاز وناس مبطلة كورة وصالح جمعة إلى وزنه وزن لاعب سومو

باين اوي إني اللعيبه بتعاقب الاداره علي قرار إقاله حسني عبد ربه

الرجل الثاني ؟ ؟؟  يجهز يا همبكة

180 دقيقة لعب منذ بداية الدورى – فريق الاسماعيلى مفيش ولا تسديدة حتى الان بين التلات خشبات .

تصدقو بالله الشامي كان ارحم بكتير ولله كنا بنوصل مع الشامي ع جول

كفايه هبد و حصريات .. و افوارى يا كومى.. كفايه وحش و بيومى و عبد الرحمن احسن لعيبه..كفايه كدب و مصالح على ناس و كلام و عكسو ..

فايه حسنى … عمل ايه حسنى جاب كام بطوله .. مش اول مشكله .. اكيييييد مش كل ناس دى غلطانه و حسنى صح.. شجعو زى زمان …. و فكك من تشيرتات و الحصريات و الهجص,, شجعو بس عشان كده خربت

موسم يعد إمتداد للموسم الماضى بالكربون .. لعيبة و مدير فنى و إدارة .. لك الله يا إسماعيلي ..

حرقتوا دمنا ياولاد …  وانا نايم ف المستشفي منكم لله .مجلس ,,,  ولعيبه ,,,,  وحسبنا الله ونعم الوكيل.

محمد صلاح ابو جريشة عبر الاستديو التحليلي : ازاي الاسماعيلي يتعاقد مع لاعيبة و مش عارف يستخرج البطاقة الدولية ، وبيلعب ماتشات ودية و بيتمرن على أساس ايه وانت مش عارف تدخله قائمه الماتشات ، اللي بيحصل ده تهريج

في حاجة في الكواليس واللعيبة قاصدة الي حصل ده

الوحش مدبولي عبدالرحمن .. Textbook لاي حد عاوز يتعمل الحنكشة

حمزة قالهم لازم المدرب هو اللي يختار الصفقات الدنيا قامت عليه وادوله استمارة ٦.. جابوا اللاعيبة المنتهية والفري والمراكز اللي الناقصة زي حارس المرمى وقلوب الدفاع لسه زي ما هي

السيناريو الجاي طبعا هزيمة من فيوتشر وإقالة جاريدو وييجي بعده ٤ ولا ٥ مدربين لحد ما نصارع مع الهابطين ونرجع حمزة وحسني لإنقاذ الفريق.. ده احنا النهارده كان ممكن نخسر ٤ ولا ٥

قولنا كدة بعد ماتش الاهلي و ماحدش صدق
ما بنلعبش كورة على الارض .ما عندناش راس حربة . اللياقة في الضياع .خط النص ما بيقدرش يحتفظ بالكورة ثلاث نقلات على بعض . .ما بنعرفش ننفذ ضربات ركنية او ثابتة ..اسواء فرقة في الكرات العرضية ..ما بنعرفش نعمل هجمة مرتدة .. نفس عيوب السنة اللي فاتت .و زاد عليها السنة دي الاخطاء الدفاعية الساذجة .

فاكرين حضراتكم عندما قلت أثناء – الفرح والهيصه والظيطه والظمبليطه بإبرام الصفقات –  الحكم بعد المشاهده

يعني انا صاحي من ٧ الصبح و عمال اتنطط في المواصلات و سفر و بهدله عشان اشوف لعيبه زي دي

جاريدو مدرب سيء جدا جدا.. تشكيل فاشل وتوظيف وتغييرات وقرايه وكل حاجه

لعيبه مش قادره تجري ومفيش لياقه – كنتم بتعملوا ايه في فتره الاعداد

لجنة التعاقدات في النادي بقالها اسبوع بتكلم دوماس مدرب مازيمبي اللي اقالوه. بعد الخروج من دوري الابطال …بغض النظر بقا جاريدو حلو او وحش و قبل اي نتايج…..هكذا يدار النادي ..جروبات فيس بوك..قالك ميثاق شرف اعلامي

ادارة فاشله فالصفقات واتخاذ القرارات وفاشله انها تجيب حق النادي- حسبي الله ونعم الوكيل

فشل في كل شيء في الإدارة في الصفقات الشتوية و الصفقات الصيفية والظهور بطريقة مستفذه في الفضائيات
واضح ان الإدارة تملك جميع مقومات الفشل الاداري

و انتهي الكلام خارج المقرر

و الحمد لله علي كل شئ