الهزيمة 2-1 من بيراميدز مع الهمبكة … مكسب

كتب:daraweesh

الاخوة الاعزاء .. اذكروا لي شئ جميل اومحترم او مبشر ..حدث في الاسماعيلي في الاسبوع الماضي 

لا شئ .. غير الفضائح و التوتر وخيبة الأمل والتعجب والقرف والاشمئزاز ووجع البطن ..والسكر والضغط 

 تمرد للاعبين وعدم خوض المران الاساسي وقبلها راحة وتدربوا امس تدريب حمصي ولا له لازمة 

 تسجيل مسرب فضيحة يوضح  عشوائية وسذاجة وبهلوانية القائم علي امور النادي الاسماعيلي 

محاول تمرد من ثلاثة اعضاء المجلس – ساذجة – لاتعرف قوانين ولا لوائح وفشلت فشلا رهيبا 

مدير فني ..جاي من تدريب ابو طشت ليدرب فريق منهار نفسيا وفنيا واداريا ومهنيا … النتيجة زفت الزفت 

 رئيس نادي في عزتلك الامور – طالع يهطرس ويتفلحس ويشطب ويقول حابيع باهر ومجدي  مع 

 ست مباريات و 3 نقاط – فريق تعبان منهم لاعبين بيقبضوا 6 مليون كل واحد – واقسم بالله لا يستحقون مئة جنيه في الموسم .. منهم لاعب كرة رباعية في وسط الملعب – وعطشجي في وسط الملعب اخره يلبس توكة – ولاعب مهاجم حاسم اخره  يشاور للاعبين ويوقع علي الارض – ومدرب معهوش لا جهاز فني وجايب مدرب حراس من دشنا واصلا هو درب مين قبل كده .

ولان المدرب اقل كثير من الموقف الحالي – اول ربع ساعة من المباراة لخصت كل شئ وهدفين في 6 دقائق – وحال اللاعبين و شكلهم و نفسيتهم و مدربهم  و وضح ان مفيش فايدة وعلشان يكون مصر علي رباعي النحس والشوم و اللوم 

الشامي – عصام – دسوقي – مخلوف 

 علما بان الاول والرابع ..كانوا علي اول قائمة التسويق والخلاص –  قبل بداية الموسم و لم يجدوا فريق يقبل بهما ولو مجانا … ولكن قعدوا في ارابيزالاسماعيلي .. وقطموا رقبة حمزة الجمل و جاريدوا وحيقطموا رقبة ايمن الجمل 

 ضيف عليهم الدفع بعمر الوحش بشكل مستديم مع وسط مدافعين اثنين وعندنا ثلاثة ( الوحش وحسن او عماد او مخلوف ) يخلي اجدع وسط في الدنيا يتفك يبقي وسط مخلوع ولا وسط محمود رضا في فيلم اجازة نص السنة

 تغييرات الكابتن ايمن الجمل – حطها علي جنب – غلط نتكلم عنها من الاصل ..كفاية التغييربتاع صالح جمعة .. يبقي ضايع منك الهجوم من باسم مرسي والشامي و ضيع كمان خط الوسط – ويا سلام علي تغييير احمد مدبولي في الدقيقة الكام 84 .. يا سلام يا سلام يا سلام .. منتهي العبقرية 

 بس فيه نقطة انا مش فاهمها او فاهمها غلط .. لما خرج عصام صبحي بالدقيقة 84 .. شفنا الغاني ياوو انور ..باك يمين .. انا صح و الا غلط …. هل ممكن يكون ده تفكير مدرب ؟؟؟؟؟؟؟

 في المقابل فريق بيراميدز لو كان عايز يفوز بالخمسة اليوم .. كان فاز  كما يريد – واتحدي ان ينكر مشجع اسماعلاوي انه كان مطمئن للدقيقة 50 من الشوط الثاني ان بيراميددز لن يفوز او يحرز اهداف اخري .. بمعني انه كان الخوف من فضيحة بجلاجل وجرسة بحناجل ..وال خسارة 2-1 من بيراميدز في ظل مجلس ادارة زلنطحي فاشل جعظري جواظ ( باللغة العربية الفصحي ) – الخسارة تعتبر مكسب وحتي لو كان علي استاد الاسماعيلية بالنسبة للرباعية بالمموسم الماضي 

 المباريات القادمة صعبة واصعب و 3 مباريات خارج الاسماعيلية انبي 20 والمصري 25 والزمالك 29 ديسمبر ..والفريق لديه  3 نقاط .. مش عايزين نتوقع حاجة من النقاط التسعة القادمين … لكن هل تستطيع تلك التشكيلة من اضافة نقطة واحدة الي الثلاث نقاط  … سؤال صعب ولو ان الاجابة سهلة.. وحنشوفها باعيننا وربنا يسترها علي الاسماعيلي 

و لا حول و لا قوة الا بالله العلي العظيم 

ونختتم بكلمات الكابتن محمد صلاح ابو جريشة  علي ” اون تايم سبورت”
– اطالب مجلس إدارة الاسماعيلي بتقديم الاستقالة الجماعية لإنقاذ كيان النادي الاسماعيلي
– يجب علي قيادات اسماعيلية الظهور في هذا التوقيت
لا اريد ذكر اسماء محددة ولكن القيادات المتواجدة تعرف جيداً قيمة النادي الاسماعيلي ، وجماهيرة لا تستحق ذلك ، النادي وكيانه ميستاهلوش الاهانة التي تحدث به
رسالة اوجهها لكي يستطيع النادي الاسماعيلي العودة الي مكانته مرة اخري

ومعها انتهي  كلام خارج المقرر