بأقول أيه .. كان لازم الزمالك يفوز 2-1 علي زلطة حمزة

كتب:daraweesh

من الدقيقة 61 من مباراة الاسماعيلي و البنك الأهلي و التي شهدت طرد المدافع الايمن عصام صبحي
كان الشاغل الوحيد لمواقع و صفحات جماهير الاسماعيلي طوال الأسبوع الماضي .. سؤال واحد
من سيحل مكان المدافع عصام صبحي في مواجهة الزمالك و جبهته اليسري النارية المكونة من اشرف بن شرقي و عبد الله جمعة أو محمد عبد الشافي
و الحقيقة .. فكرت الجماهير بصورة جيدة و وضعت تصورات ممتازة لحل مشكلة عصام صبحي
لكن الزلطة اللي في دماغ الكابتن حمزة الجمل .. كان لها راْي اخر … و كان نادي الزمالك هو نادي في دوري مدغشقر او سيرلانكا … و الكابتن حمزة الجمل ما عندوش .. دش
اقترحت الجماهير … أن يضع الكابتن باهر المحمدي مدافع ايمن و يدفع بالمدافع محمد نصر بجانب محمد هاشم و ذلك لخطور ة الهداف و الخطاف بن شرقي وتحركات عبد الله جمعة أو شيفو
لكن الكابتن زلطة .. اختار اسوء الحلول و اشدها سذاجة .. بل يمكن القول اشدها عبطا
اختار الكابتن زلطة الدفع بلاعب الوسط محمد بيومي .. باك شمال
هو لا مؤاخذة يا كابتن حمزة .. انت لم تشاهد ماتش الاسماعيلي و الرجاء بالبطولة العربية .. و إلا كنت مشغول بتدريب القناة و إلا كنت في عمان و إلا السودان .. و إلا كنت فين يا عم انت
فعلا كانت اشد الحلول دمارا لمعالجة الجبهة اليمني .. هو اختيارمحمد بيومي و لو سألت مدرب الزمالك فييرا عايز مين يا عم فييرا ..كان قال :

I suggest and hope Mohamed baumy  play
و فعلا اعلن الكابتن حمزة زلطة عن تشكيل الفريق بتواجد اللاعب موهامد بايومي في مركز المدافع الايمن
و من وقتها كل الجماهير واضعة ايديها علي قلبها
و قد كان
شارع بيومي بن شرقي .. افتتح بدري بدري و كل شغل الزمالك علي الجهة اليمني لنا . و لم نسمع اسم المدافع الايسر محمد الدسوقي علي الاطلاق
و كان الهدف الأول من ناحية بيومي .. و بيومي كان بيتمشي ساعتها

انظر الصورة و شاهد بنفسك

 شايفين محمد بيومي واقف فين و لعيبة الزمالك فين و الكرة لسه في الهواء !!!!!!!!

و لما ظهر أن شارع الشرقي بيومي .. مفتوح و مفيهوش أي مطبات و لا اشارات مرور .. مال الحريف محمد زيزو ناحية البيومي .. و حصل علي فاول من مكان سحري بطريقة ساذجة من بيومي
و هوبا رفع زيزو الكرة و مفيش حد نط من الاسماعيلي و كأن الستة الموجودين في منطقة الست ياردة لابسين اصفر .. ملزوقين بغراء الفئران في الارض
و عمرو السعيد ينط و يفط و يلعب الكرة راسية في الزاوية البعيدة … و ظهر كمان أن محمد فوزي ملزوق في الارض هو كمان .. بغراء الفئران
ليه يا عم فوزي .. لم تخرج للكرة .. مع انك انقذت اصعب من الكر دي من راسية عمرو السعيد و انقذت هدف اكيد د 69
لكن لا … لازم فوزي و الفئران الملزوقة .. يكملوا الخيبة كمان و كمان
…………
مش بس الكابتن حمزة زلطة … بوظ الدنيا و خربها بدري بدري .. بمحمد بيومي
لا
كان الزلطة شغاله زلاطيشن .. طوال الماتش
ازاي اقول .. لكم

 خلال احداث اللقاء من الدقيقة الاولي للقاء ظهرت تعليمات الكابتن حمزة زلطة بالانزراعية الجذورية …. للاعبي الاسماعيلي في وسط ملعبهم .. ماشي خطة حمزاوية .. مفيش مشكلة … و الاعتماد علي الهجمات المرتدة .. برضه مفيش مشكلة 

 واغلق الحمزة  الملعب و لدرجة انه للدقيقة 9 .. لم نشاهد الحارسين فوزي و لا ابو جبل 

 لكن بعد د 15 .. ظهر ان الطريقة دي مش نافعة خالص و الزمالك لازم يهدف و  لازم يفوز و خاصة ان نسبة الاستحواز للزمالك تعدت الـ 70 % 

و بالتالي لم يكن للاسماعيلي اي تواجد هجومي الا كلمحات د 20  و ضربة جزاء غير محتسبة من الحكم ابراهيم نور الدين لصالح لاعبنا محمد عادل 

و من بعدها إنسي يا عمر ….  اول ركنية للاسماعيلي و تركيز هجومي كان بالدقيقة 43 . و قبلها ظهر فشل الطريقة الانزراعية حيث كان 

 مدبولي ..يستلم و يفقد الكرة و اللعبة ترتد علينا 

عبد الرحمن مجدي …يستلم و يفقد الكرة و اللعبة ترتد علينا 

عمر الوحش ….يستلم و يفقد الكرة و اللعبة ترتد علينا 

محمد عادل …. يستلم و يفقد الكرة و اللعبة ترتد علينا 

 عدد الكرات التي تم قطعها و يستردها الزمالك بلغت 15من 15 كرة .. تصدقوا دي

 كل ده و الجهاز الفني الزلطاوي … عامل من بنها 

و الهجمة الوحيدة اللي اكتملت وجبنا منها ضربة جزاء .. انقطعت من عبد الرحمن مجدي قبلها !!!!

 مش بس كده 

 تعالوا للتغييرات 

هو مين سايكو كونتية ده اللي حينزل يقلب الدنيا من الدقيقة 84 و الا مين وجيه عبد الحكيم من الدقيقة 63 

بالمناسبة الاتنين ما لمسوش كرة  خالص .. فيما عدا استلم سايكو الكرة بكرشه …  في منطقة الجزاء و طلعت اوت و الاخ وجيه عبد الحكيم بيلعب 110 حواجز طوال 30 دقيقة

و يا سلام سلم علي الهداف المغوار محمد الشامي د 75 و 79 و قبلها رفعة اخطر من الخطور من جهة بيومي قبل ما يخرج بدقائق  لكن ربنا سلم و قبلها راسية من محمود علاء .. مع شغل غراء الفئران لكل دفاع الاسماعيل كل ده بسبب الزلطة  … زلطة ايه…  زلطةحمزة .. حمزة مين صاحب الزلطة  

 عايزين تركزوا في الماتش كله في تمريرة واحدة فقط 

تمريرة من الكابتن عمر الوحش الي الامام بالدقيقة 47 

تمريرة تحمل كل معاني اليأس و الملل و الفشل للخطة الانزراعية الجعبرية الزلطية في ثانية واحدة

 احرصوا ان تشاهدوا المباراة كلها .. علشان الدقيقة 2 من الشوط الثاني 

 ساعتها حتقولوا .. كان لازم الزمالك 2-1 علي زلطة حمزة الجمل …. و كويس انها جت علي كده 

و استرها معانا يا رب في ما هو قادم

وقبل ما انهي الكلام خارج المقرر .. لا يمكن الا ان اوجه كل التحية و التقدير للجماهير العظيمة  و علشانكم انتم بس … بالدم بالروح .. الاسماعيلي مش حيروح … باذن الله تعالي 

و انتهي الكلام خارج المقرر