بص في الصورة و حتكمل الفرحة .. بإذن الله تعالي

كتب:daraweesh

الف الف مليون مبروك علي الفوز الجميل و باذن الله تكون عودة الروح الي الجسد الجريح واللي مفيش جزء منه الا  مجروحة و ملتهبة و حالته بالبلاء و البلا ..  الفوز علي فريق الداخلية 3-1 .هو مجرد خطوة علي بداية طريق طويييييييييل .. لسه علي الفريق والنادي والجماهير .. السير فيه 

 طريق طويل كله دماء رمال وخوازيق ومطبات .. لابد من علاجها بصورة سريعة و عاجلة و مؤجلة – طبقا لاهمية اعراض الداء الاسود الذي تسبب فيه مجلس الهمبكة المأفون وغير المأسوف علي طلعتهم القبيحة 

والله يسد بيت كل مجلس الهمبكة – رئيسا واعضاء جميعا بلا استثناء.. ويا ريت لو نقدر ننساهم ..و لن ننساهم الا بمزيد من العمل و العقل والفهم الصحيح للجرائم اللي عملها رئيس مجلس الهمبكة ونائب رئيس الهمبكة واعضاء وعضوة مجلس الهمبكة .. لازم نعالج كمية الاهتراء والامراض والفشل والفساد الهمبكاوي العفن النتن و الذي وصل الي الجذور  

طيب … ليه بنجيب سيرة مجلس الهمبكة القبيحة والمقرفة .. في عز الفرحة والانبساط وفي وسط الدموع التي سالت بعد هدف الاطمئنان مع محمد الشامي د 85 .. دقق في الصورة ..و انت تعرف السبب و كيف تكتمل الفرحة بإذن الله تعالي

 دققت في الصورة …  دقق كمان في ملامح باهر المحمدي … سيبكم من الاراء الفنية .. مش ده اللي قال عليه الكومي الهمبكة انه عايز يمشي و يرحل من الفريق و ظل الكومي ملك الهمبكة .. من شهر 6 /2022 يؤكد انه طلب الرحيل وكره النادي والجماهير ..وعلي اثر ذلك طلعت الجماهير عايزه تدبح اللاعب وتطالب برحيله وبيعه ومنهم شخصات اجهل من الدواب .مازالت تكتب عن ضرورة بيع اللاعبين فلان و فلان و فلان ..و بيظهروا قدرات عقلياتهم الضعيفة جدا في تقارير مطولة لا تفهم الفرق بين الالف وكوز الدرة .و مخها فسفس و المصيبةانهم فاكرين نفسهم اصحاب خبرات و هما انحس من النحس نفسه 

تعالوا الي افتراض عدم قدرة الفريق و النادي و اللجنة المجهولة القادمة … علي شراء لاعبين و دعم الفريق و الاقرب الي الحدوث بنسبة 99%  ان لا تلحق اللجنة المجهولة عمل تعاقدات جديدة ..او لو لحقت اللجنة ستكون اضافات ثانوية جدا جدا … و السبب في التاخير غير المفهوم و غير المبرر  من وزارة الشباب و الرياضة  في تعيين اللجنة … و السبب الثاني هو مفييييييييييييش فلووووووووووووووس .. و لو فرضنا فيه كام مليون جايين .. احنا اصلا محتاجين اضعاف اضعاف اضعافهم … لفك حالة النحس مع اللاعبين و نفسيتهم التي اصابها الصدأ  من الكذب و الخداع و الهمبكة  

 يعني بالعربي مفيش لاعبين جدد .. حيعملوا الفارق … متفقين …. اظننا متفقين … طيب بص في الصورة 

 حتفهم قصدي 

  اتصور فعلا انك  فهمت قصدي 

 تعال نرجع للصورة السابقة ..و هي توضح ان  الكابتن احمد حسام ميدو .. له اقبال و كاريزما كبيرة و سيطرة و فرحة عارمة بالفوز .. يعني يقدر يعدل الوضع الفاجر والشاذ في موضوع الجناح الايمن عبد الرحمن مجدي .

 يعني بعد ما كان محمد الشامي حيتباع  من وحل البرك الهمبكة .. وبعد ما احمد محسن اتجمد من ميدو و بعد ما اتجمد باسم مرسي .. عاد الشامي الي افضل ما يكون و اخد رجل المباراة اليوم   و عاد باسم مرسي و احمد محسن الي الملاعب و التشكيل 

 فيها ايه يا كابتن ميدو .. لو ترجع  عبد الرحمن مجدي الي الملاعب  .. فاهم يا كابتن ميدو !

و قبل ما تقول رائيك يا عزيزي القارئ  المتحمس ..بالرفض لعودة اللاعب لانه خائن و ابن كذا و كذا 

 حاقول لك علي نقطتين .. بس طول بالك شوية

 النقطة الاولي :  عبد الرحمن مجدي غلطان و يستاهل قطع رقبته الطويلة دي ..ده صحيح .. لكن ملك الهمبكة – الله لا يعيد ايامه – هو السبب في تمرد اللاعب و كلما كان رئيس النادي همبكة و عبيط – لابد ان تجد تمرد –  فاكرين اللي عمله محمد عواد مع سعادة البك الناظر .. طيب نرجع كمان  لزيادة عن ستين سنة .. كل اللاعبين الكبارو النجوم ..زعلوا و اتقمصوا – الاسطورة رضا و الكبير اميرو و الموهوب العربي …. حتي الكونت دي شحتة كان حالف يبطل كورة بسبب رئيس للنادي سنة 1963 ..يعني عباطة عبد الرحمن مجدي ..مش جديدة .. لا في الاسماعيلي و لا في خارجه .. لعيبة الكرة مخها لاسع و ضعيف و عرضة للتأثير و العجن و التشكيل 

النقطة الثانية : لو حبيت تشتري جناح مثل عبد الرحمن مجدي حتشترية بكام و انت في اخر الدوري و ترتيب الفريق زي الزفت و زي القطران ..و خزينتك  المالية زي الزفت و القطران و الهباب كمان .. يعني مفلس و مفيس تعاقدات و مفيش وقت و مفيش اي حاجة …. تفكر تبيع لاعبين مميزين  … لا مؤاخذة بقي دماغك من عند باتا  و محتاج كوردنيري .. يبقي من مهام الكابتن ميدو … انه يرجع عبد الرحمن مجدي .. ليس لان مفيش له بيعه او المبلغ غير مناسب .. لكن الفريق لسه قدامه طريق طويييييييييل و محتاجين الجميع من في ايدينا 

و يجب علي الكابتن ميدو ان يبعد عن الاصوات العبيطة و المنفسنة و يعيد تشكيل الفريق من ناحية النفسية المحروقة بسبب اخر اشهر مرت مع النادي مع غير المأسوف عليهم مجلس الهمبكة – نفر نفر 

 نقول و نؤكد ان الطريق طويل و اننا مازلنا في المركز 18 و لو حرس الحدود له ماتش مؤجل …  و مازل امامنا ايام و اسابيع و وقت طويل كي نطمئن علي بقاء الدراويش في الممتاز … من غير تشاؤم او عكسه … لذلك نحتاج الحفاظ علي كل نجوم الفريق المؤثرين و ليمتنع فلاسفة الغبراء  عن الكلام و كفاية عليهم يلبسوا كسرولة علي دماغهم و يقفوا امام المرايا  و يطرحوا افكارهم الهبابية .. الفرق لا يحتاج اليهم علي الاطلاق 

و الف الف مبروك علي الفوز الجميل 

و اخر دعوانا ان الحمد لله رب العالمين 

 و انتهي الكلام خارج المقرر 

و أنستونا