تصريحات حسني عبد ربه علي قناة اون تايم- فيديو

كتب:daraweesh

في استضافة قناة اون تايم سبورت, برنامج الثالثة مع الإعلامى إبراهيم فايق للكابتن حسني عبد ربه الذي صرح بالتالي :
– أحمد الشيخ و احمد علوي هم المسؤولين عن صفقات الفريق هذا الموسم ، أقسم بالله ما حد خد رأيي في صفقة واحدة ولا جبت صفقة واحدة و مفيش حد في النادي يقدر يكذبني.
– يحيى الكومي قال لوكيل جاريدو يبلغني بالإقالة أثناء عودتنا من الإسكندرية بعد لقاء الاهلي، استمريت لمدة ٥ ساعات تقريبًا منذ خروجنا من الإسكندرية حتى الوصول للإسماعيلية مش مصدق ومش متخيل بعد كل اللي عملته مع الفريق بقالي شهور ، رجعت بيتي مصدوم كان هيجرالي حاجة .
– تتفق أو تختلف معه فنيًا لكن عمر الوحش مش واخد حقه تمامًا، لاعب مخلص بمعنى الكلمة للإسماعيلي سواء هو أو باهر المحمدي وبيدفعوا فلوس من جيبهم في حاجات كتير علشان شكل و سمعة النادي .
– عرض المصري لضم عبد الرحمن مجدي تخطى ٢ مليون دولار في بداية الموسم ، حسيت بالأزمة المالية اللي داخلة على النادي و طلبت من الادارة الموافقة على العرض لكن لا حياة لمن تنادي.
– صفقة عمر الوحش و الشامي للمصري باظت بسبب سمسمرة ٢ مليون جنيه ، انا بتحدى الكومي يطلع ويقول هو فوض مين لإنهاء الصفقة دي .. وفي الآخر يقولوا حسني عاوز يعمل مصلحة من ورا الإسماعيلي
– انا ليا فلوس في الاسماعيلي من السنة اللي فاتت و عمري ما اطلبها في الظروف الحالية لو على رقبتي.
– رحيل مجلس الإدارة هو أول الحلول و أولى خطوات النجاح ، أثق في الدكتور أشرف صبحي بشأن تعيين لجنة قوية لإدارة النادي و إنقاذ الأوضاع في النادي.
– اللاعيبة مضت انها مش عاوزة تلبس شركة الملابس المجهولة بسبب سوء الخامة ، أزمة الملابس لا تخصني من قريب أو من بعيد و لم ابدي اي اعتراض و كل اللي كان يهمني ان النادي الاسماعيلي يظهر بشكل كويس.
– باسم مرسي طلب ٦ مليون جنيه في الموسم، دخلت عليه المكتب أثناء التوقيع في حضور يحيى الكومي و قولتله هما ٣ مليون اللي هتاخدهم يا باسم ، باسم ملحقش يرد عليا لقيت الكومي بيقولي خلاص يا بيه هياخد ٥ مليون ومضى العقود و بعدها قالي ملكش دعوة بمستحقات اللاعبين.
– رفضت عودة محمد صبحي للإسماعيلي ؟ و الله ما حصل ، صبحي أسطورة و كان نفسي يكون موجود تكريمًا ليه في ختام مسيرته بعد كل اللي قدمه للنادي.
– القانون يمنعني من الترشح لرئاسة النادي قبل إتمام ٤٥ سنة، بفكر اشتغل مدير فني
– غير متفق مع ميدو في عمله الإعلامي مع تدريبه للإسماعيلي ، اتمنى يكون تركيزه بنسبة ١٠٠% مع الفريق
– اياد العسقلاني هيكون في حته تانية ، مدافع مميز جدًا علشان كدة وقعت معاه عقد احترافي طويل الأمد في بداية الموسم
– المجلس المستقيل فسخ كل العقود اللي عملها مع شركة الملابس المجهولة و الاكاديميات اللي تمت في بداية الموسم.

 

منقول