Connect with us

عيون إس سي

تلاتين يوم في السجن

كتب:daraweesh

بعد ان قدمنا للانتاج الفني الرائعة الخالدة

رد كلــــــــــــــــبي

أفعص

هنا

و بعدها قدم رائعة الشباب الجندية العسكرية المهلبية

جعلـــــوني مظلمــــا

أخبط

هنا

و بمناسبة مرور 30 يوما للادارة الجديدة المستحية في مقر النادي الاسماعيلي العتيد الشديد

تقدم شركة اونلاين للانتاج الفني الفيلم الشبابي المغامراتي

تلاتين يوم في السجن

الالعوبان مدحت الشماشيري ( ابو بكر عزت ) واد أموزجي و عال العال و بيلعب بالبيضة و الحجر
و ماشي علي حسب الريح ما يودي الريح ما يودي
و علشان كده إتفق مع فخامة السيد المحترم كبير النجعاوية ( عبد الغني قمر ) انه يبقي الزعيم و الرئيس للنادي العتيد

و هات يا افتكاسات و بلح امهات و ولعها ولعها و شعللها شعللها و احفر و اردم و أمضغ و أهضم و بقرش تعريفة كربناتو يهضم الجن
مفيش مشكل و بيحلف ( بقفة مصاحف ) انه قدها و قدود و مش أي أي و لا زي زي خالص مالص
و أتحف الجميع بنظام حديد و سنج و مطاوي عال العال و لا الافلام الامريكاني انتاج و اخراج حسن الامام

و شاف الكتير و القليل من الجماهير .. و مفيش مشكلة طالما فخامة السيد المحترم كبير النجعاوية ..راضي و فاضي و مفيش مشكل

لكن توصل الجرأة ان يحرق السيد مدحت الشماشيري شنب كبير النجعاوية – عن قصد و الا اهمال دي تبقي مصيبة رهيبة
لازم يدفع الثمن و بعدين ياخد المليون من اول مليون يدخل النادي – مش مشكل برضه ..كله علي حساب صاخب المخل

و كان لازم رئيس جديد يحل مكان الشماشيري .. و يكون مكانه لمدة 30 يوم في السجن حسب السيناريو و هوبا اه هوبا ايه

جاء السيد الأستااااااااذ أمشير ( فريد شوقي ) الجديد ابو الجمال و الدلال و يا عدويييييييي

عايز عشرة يكتفوني و عشرين يفكوني و فتح عينك تاكل ملبن

و بالفعل اصبح الإستااااااااذ أمشير رئيس النادي و الفضل و البخت له النصيب و ما علينا

و كان لازم الاصدقاء القدام المعلم دنجل ابو شفتورة – محمد رضا – اللي بيقص الكلا
يبقي المتحدث الرسمي للنادي و كان اول تصريحاته

تم اليو …. تعي…. الكابت …. خال … القما .. المدي …. الفني للفري… الاسما ….. و نتمني .. التوفي
. لابن النادي … في موهمتي .. الجدي … و اطالا .. كل جما هي … النادي … التايي .. الكاملي

يا سلام علي الفصاحة و الاختيار السليم و الجمال .. أصلي انا كمان بأقص الكلا – الكلام يعني .. و ما تبقاش عبي

و يجعل في وشك .. الأوبو … القبول يعني

و كمان كان لازم يتم تعيين – سداسي اضواء المسرح – كباقي اعضاء المجلس من اجل حل الازمة المالية

و بالفعل شوية سداسي منشوري متوازي الاضلاع مفيش كده و لا في الاحلام و يا عطارين دلوني الصبر فين أراضيه

و مش كل شوية حماة الالعوبان مدحت الشماشيري الست ( ميمي شكيب ) أم خطيبته سهير ( مديحة كامل ) و علي كده سهلة و يسيره

تقول أم سهير : الإيغاد فين يا مدحت .. فين الإيغاد يا مدحت

المهم يزودوا .. الإيغاد .. يا مدحت

و الالعوبان الشماخيري و لا هوه هنا .. من ساعة ما ساب النادي
و هو داير علي حل شعره مع الموزة الست أنهار ( نوال ابو الفتوح ) و لازم يجوزها حالا بالا .
و الا ترجعه الي السجن .. و هو طبعا يتمني

المهم السادة سداسي اضواء المسرح … سمير و جورج و الضيف و معاهم سمير و جورج و الضيف كلاكيت تاني مرة
علشان يبقوا ستة .. موجودين و مش موجودين و عاملين زي العاصفة .. تحس بيها بس ما تشوفهاش

. حاجة كده زي الترمس النيء .. وجوده زي عدمه
قاعدين سداسي اضواء المسرح .. يغتوا فقط و يقولوا

بص شوف مين يا وعدي .. بص شوف مين يا وعدي
شفت المدير الفني راكب تكسي .. تكس تكسي
و السي في بتاعته راحت فاتحة نفسي .. نفسي .. نفسي
و الفن قال يا حلو مسي . .. مسي … مسي
رديت و قلت بوناسيييرا روح كلم بابي

علي طول راحوا اتعاقدوا مع الخواجة كارماللينو ( سمير صبري ) مخرج و خبير الديناميت
في فيلم .. بنت أخت كليوباترا

بس الديناميت خلاه كفتة و اتعلق علي النخلـــة .. و حيخليه عنتر قريب كوكا ..كولا

المهم ان سداسي اضواء المسرح مركزين و مش عايزين دوشة تخرجهم من تركيزهم المركز تركيزا شديدا

و بصراحة حنرتاح كلنا لو عرفنا بس … هما مركزين في ايه بالظبط

و الكابتن أمشير .. الإستااااذ .. برضه مركز معاهم

يبقي احنا بقي اللي مش عارفين … نركب ..السواق علي حق

تلاتين يوم مش شوية .. الرئيس السابق مدحت الشماخيري ..هد النادي و افسده تماما في تلاتين يوم و عمل تعاقدات زي وشه و مشي

و لكن الرئيس أمشير.. قاعد يقول

عيب ده ده انا .. أستاااااذ

تلاتين يوم بقي كفاية أظن .. للبدء في العمل يا كابتن أمشير و معاك سداسي اضواء المسرح
و يمكنكم تعيين اللي تعينوه ان شاء الست أزهار ( نوال ابو الفتوح ) بس تشتغلوا بقي
و تشيلوا ايدكم – الله يخليكم- من الميه الباردة و خاصة ان الشتا داخل و الجماهير ما بترحمشي

و عن اخر الاخبار ان سداسي اضواء المسرح اتجمعوا و صهللوا في الاجتماع الاخير

و سمعوهم بيغنوا في صوت اوبرالي سيمفوني كورالي

لو كانوا سألونا قبل ما ينتخبونا ..عارفين كنا نقول ايه
كنا نقول اعتقونا بدل ما تدبسونا في العهد اللي احنا فيه
في العهد اللي احنا فيه

حتشتغلوا أمتي ان شاء الله … و الا عايزين ثلاثين سنة في السجن

طبعا مش ممكن

انتظروا الرائعة القادمة في انتاج مصري – منوفي مشترك

أبو …. فوق الشجــــــــــــــــــــرة

بقلم الدراويش