جماهير يناير..تريد حلا .. بعد التعادل مع المحلة

كتب:daraweesh

 قلنا قبل كده .. لو لعبنا 100000000 دقيقة لن يسجل الاسماعيلي اهداف  طالما يوجد مهاجم في الاسماعيلي اسمه شكري نجيب و لاعب تاني اسمه محمد الشامي و الثالث ما جاش اشمه شي شي لونجو .. بونجو .. و هونجا حتي الموت

 اه يازمن … رقم 10 و 11 .. اتهانوا و اتداس بكرامتهم علي الارض مع شكري نجيب بتاع بيهجصوا … و  الشامي اللي بيلعب حوكشه و بوكشا و فوكشا

تخيلوا رقم 10 كان منهم مين  في الاسماعيلي … رضا و الهر ابو جريشة و العجوز و صلاح أبو جريشة وشارلي وحمدي نوح وفؤاد جبرت الله

و رقم 11 كان مين .. جون اوتاكا و علي حجازي ودميان و ريعو وأمين دابو وعماد سليمان وبشير عبد الصمد

و تصفصف علي شكري نجيب و الشامي

 نهار مدوحس  و ليل … كحل و اسود من  هباب قعر الحلة

 و ركزوا معانا في دي : في الدقيقة 27 استلم شكري نجيب الكرة في هجمة مرتدة سريعة و اصبح الاسماعيلي 4 علي ثلاثة .. و فجأة وقع شكري نجيب علي الارض ..لوحده .. و زي الرطل ..تماما

و كمان د 63 و د 15 تسديد حواري من شكري نجيب و الكرة في الدقيقة 63 .. تسديدة كلها غباء و بلاهه و انانية و فشل و عبط .. و لو اعطيت الكرة لواحد مخبول ما يشوطها كده … و يا سلام يا سلام علي الفاول من كرة ثابتة في منتصف الشوط الثاني و شكري نجيب شاااااااااااااط … في العياط .. و شم من المدرجات احلي عصبية و شياط الاعصاب و طلعت الفاظ المحطة الجديدة عيانا  بيانا و… كتموا الصوت عندها 

بص شوف الفرصة دي في الدقيقة 63  … و نلاقيها من مين ..من شيلونجو  و الا من شكرينجو 

و علشان الفرصة لا تجئ الا لمن يستحق .. تقدم محمد هاشم ( ربنا يحميه )  و سدد رأسية جميلة من كرة ثابتة من مدبولي ( المتحزلق ) و رأسية رائعة و لكن لازم و حتما تخبط في رأس شكري نجيب قبل ما تذهب الي شباك المحلاوية و تضيع الفرصة الاكيدة للتهديف  طوال 97 دقيقة .. و زي ما قلنا ان الفرصة لا تجئ الا لمن يستحق .. كانت الفرصة للمهاجم اللوزعي شكري نجيب … علشان مزيد من الانجازات له في الملعب كاحسن مدافع لفريق المحلة و يمنع هدف اكيد  .. و لا حول و لا قوة الا بالله العلي العظيم 

 اما اخونا محمد الشامي – ده حدوتة لوحده … ما تعرف رجليه الاتنين شمال و الا الاتنين يمين … و مش مهم الاتنين او الثلاثاء يمين و لا شمال .. لكن الاكيد ان الاتنيين يحكمهم عقل مليان زلط و بحص و دقشوم و كسر رخام .. و ناقص له شوية اسمنت و يبقي مخ الشامي … خرسانة مسلحة مسطحة مفرشحة

هما دول الخرط اللي موجود من بقايا شمعون بن بيريز بن يزوايزمان بن جلودا مائير .. اللي هو ابن المعلم بلفور- الله يسامحه بقي

هما دول الخرط … اللي ما ينفع فيهم خراط  و لا خياط و لا شخباط … و ضيف عليهم المعلم جاستن شونجا

و اتصور لو كان هناك طالب علم يحتاج دراسة في الفشل و الفساد و العبط و الخلل في علم ادارة الموارد البشرية.. علي هذا الطالب ان يقدم اطروحته  بعنوان

 من شونجا الي شيلونجو .. يا خيبتكوا يا نكستكوا

و في الدراسة سيجد العجب العجاب للعته و الهبل و الاسهال و الامساك في وقت واحد

وسيعلم الطالب .. ان الخطأ و الخلل  والخولل .. من من يتولي الامور الفنية في الاسماعيلي

 سموها زي ما تسموها.. لجنة او مجموعة لجان او مجموعة لبان … بيتحول علي طول الي مسخ تفكيري  و بيصابه الحول و العمى الحيثي  و اكبر دليل هو  

 لما يكون افضل لاعب في الفريق للمرة الثانية علي التوالي هو الحارس محمد فوزي .. و يجيبوا حارس يركب عليه بخمسة مليون في السنة و يرفضوا مهاجم هداف بنفس السعر و لكن الحارس وافق يلعب بدون مقدم و المهاجم كان نص العقد مقدما  .. و يقعد ابو خمسة مليون  علي الدكة .. و يظل محمد فوزي هو الاحسن و الافضل … يبقي الحول و العمى الحيثي ..ده مقدر و مكتوب 

و يا خوفي لا تكون اللجنة الفنية و لجنة التعاقدات الجديدة .. ترضي بالهوان و الشغل بنظرية رجل الحمار زي اللجنة السابقة

رئيس نادي مجمد و امين صندوق عاجز و اللي معاه الختم في معسكر مسجون و الدنيا كانت ظلام في ظلام

و الافريقي الوحيد دخل علينا بالحنجل و المنجل و بحبك يا كومي علشان البيه طلعت بيه و ابو اليزيد … يزيد و يزيد

 لو اللجنة الجديدة حتسمح بتكرار نفس الظروف .. و لو بسيناريو مختلف  

 يبقي نهايتها الهبوط  الي درجة المظاليم 

ما تزعلشي قوي يا عزيزي القارئ و تعال نحسبها واحدة واحدة

الاسماعيلي لعب كام ماتش حتي تاريخه .. لعب6 مباريات و سجل هدفين فقط  و استقبل شباكة 10 اهداف و عنده نقطتين فقط من 18 نقطة … و كل ده في 6 مباريات  

و افضل لاعب في اخر مباراتين هو حارس المرمي … لانه شال بلاوي لا تعد و لا تحصي و اخرها كان بالدقيقة د 74 .. و لو كان حميد مو سجل الهدف و اتقدم المحلة .. لو كان الشامي و شكري و حوان براون ..عملوا معزة .. ما كانشي نقدر نتعادل

خلي بالكم كل ده في نصف النصف الاول من الموسم .. يعني بعد كده في ضرب نار.. و لا ثقة و لا امل في الاداء الهجومي للاسماعيلي .. لا دلوقتي و لا لحد اول يناير ..مش اخره

 يبقي الحل ايه

 الحل هو تعاقدات و اضافات ناااااار .. في اول يناير مش في اخره

و مطلوب من الثلاثي في اللجنة الفنية و الثلاثي في لجنة التعاقدات

 يجلسوا مع المهندس يحيي الكومي رئيس الاسماعيلي

و يقولوا له … بصريح العبارة

 عايزين فلوس قدرها ..كذا .. في توقيت كذا

لو الكومي 2021… رجع هو  الكومي 2011.. بتاع طيب اشوف حاضر حاشوف

اللجنتين الموقرتين

 يطلعوا لايف و يستقيلوا و يخلوا مسئوليتهم علي الهوا

 لكن نظام الترقيع و الافتكاسات و الخولل .. ما تنفعشي

و الدليل علي ذلك فتح باب التبرعات  و لو كان الكومي قالها قبل الانتخابات ..ما كانشي حيشم الكرسي من الاصل 

و البهوات عندنا ..يتبرعوا فقط بمئة تذكرة او بعشرين تذكرة او يجيبوا اتوبيس … لكن تبرعات مين يا عم الحاج 

التبرعات بتكون في الخفاء و الدرا .. لكن التذاكر بتكون علني و  ملايين اللايك و الشير هو المراد من رب العباد 

 المهم ان الجماهير في يناير .. تريد حلا .. و بعد التعادل مع المحلة و نتصور ان الاسماعيلي لن يقفز من ثلاثي الهبوط قبل يناير .. بالارقام  و تحليل منطقي رقمي ..احنا الاخير … حتي حين  

الوضع خطير في منتهي الخطورة و لو تتذكروا من ابقي علينا في الموسم المضي هو ارتفاع نسبة التهديف عن نسبة الاهداف في مرمانا  و ده بيترجم في النهاية الي فوز و جمع نقاط .. غير كده .. لو فضلنا علي مستوي شكري نجيب و الشامي و شي لونجو و جاستن شونجا … نهارنا كلنا اسود من قرن الخروب 

و لو هبط الاسماعيلي الي المظاليم .. لن يتضرر احد من البهوات و لا رئيس النادي ..لانه حيرحل الي نادي الشمس و يجلس في الشمس او في القمر … احنا بس اللي حنشوف المرار الطافح

وربنا يسترها علينا .. قولوا امين امين امين  

 و انتهي الكلام خارج المقرر