كانت حتبقي ليلة ( جِــلْة ) علي الكل كليلة .. لكن ربنا ستر 

كتب:daraweesh

صحيح فرنا بالمباراة و حصدنا 3 نقاط و قفزنا 3 مراكز و بقينا في المركز 11 مؤقتا … لكن جهازنا الفني بقيادة الكابتن حمزة الجمل ..ما جاش ليه و ازاي يغيب عن ادارة المباراة ..و كيف يلعب الفريق و هو بدون جهاز فني علي الاطلاق …. عجايب و الله 

طيب ما احنا فزنا و سمينا و عدينا .. طيب زعلان ليه 

ايوة فزنا و حصدنا  و قفزنا –  لكن بالدقيقة 79 ..كان الجهبز محمد الدسوقي كان حيقلب ( الليلة  جِــلْة متعاصة جِــلْة ) علي الجهاز الفني اللي ما جاش و علي اللاعبين و علي الكل كليلة 

 كان الجهبز محمد دسوقي سيعيد حرس الحدود الي التعادل ( و هو يستحقه )  بمجرد غلطة من مدافع و ساعتها لا حيكون فيه  فوز و لا نقاط و لا مراكز … ليه حاقول لكم …..

الكابتن حمزة الجمل بقي له 72 ساعة و زيادة  و من بعد مباراة الهزيمة بجوزاهداف  نظيف من البنك الاهلي …. كان ماشي يقول و  يقول : كنا ناقصين 6 لاعبين .. تفطر ايه يا كابتن حمزة ..يرد و يقول : كنا ناقصين 6 لاعبين ..……… تتغدي ايه يا كابتن حمزة يرد و يقول : كنا ناقصين 6 لاعبين …  كل حاجة يقول : كنا ناقصين 6 لاعبين 

 طيب يا عم حمزة .. النهارد رجع لك كل الاساسيين الا عبد الرحمن مجدي .. عملت ايه 

 ادارة مباراة زي القطران و كانك مش موجود انت و عش النمل اللي قاعد علي الدكة 

يعني كان  عش النمل ده كله … يترش  فليت .. لو استطاع اللاعب محمد رضا ان يلحق  باسيست روعة من الجهبز محمد دسوقي .... كانت العملية  كلها  اصبح لقب الكابتن حمزة : المدير الفني السابق للنادي الاسماعيلي 

 طيب ايه اللي وصل الحال لكده .. ارجعوا معايا لمجريات المباراة امام فريق حرس الحدود  و اللي كانت الجماهير بتراهن 3-0 او 4-0 ..و طلع حلم مثل حلم ليلة صيف رطبة و من غير مروحة 

و الفوز 1-0  – يعني اول مباراة فوز بهدف دون رد و شبكة نظيفة  من مباراة تعادل سلبي مع فاركو  من 8 مارس يعني من 74 يوم في الاسبوع 21 – علشان كده لا يوجد اطمئنان عل الفوز بهدف يتيم و هذا لم يحدث طوال الموسم الحالي كله ! الا النهاردة بالفوز 1-0 علي حرس الحدود الاخير و الهابط فهمي رسمي نظمي

و كمان فريق حرس الحدود فقد كابتن الفريق من الدقيقة 4 و طرد الحكم الناجي اسم الله عليه …  للاعب مصطفي جمال ..و من الدقيقة الرابعة فقد الاسماعيلي التركيز تماما و اصبح حرس الحدود هو الكامل و جهاز حمزة هو اللي ناقص العقل و التركيز  و ضاع الفريق تماما 

و الي الدقيقة 17  يوجه فريق حرس الحدود – الكامل – انذار قوي من انفراد تام من النيجيري  فالنتين  و رغم انه تسلل لكن كشف ان اللي قاعد بره من جهاز فني ..كلهم بلا فائدة و العجيب ان كان منهم 3 و 4 مدافعين … و في الدقيقة 20 محمود بن والي الليبي يسدد برأسه رصاصة في العارضة و اللي كان طاير معاه شواط 

 في الاسماعيلي .. مفييييييش و تمريرات طولية عبيطة و تمريرات عرضية عبيطة و فقدان للكرة بطريقة عبيطة 

 و اول كرة خطرة للاسماعيلي – الناقص  كانت بالدقيقة 31  و ينقذها حارس الحدود محمد فوزي

و من بعدها للشوط الاول كله ..مفيش اي حاجة و جماهير زهقت من التشجيع و سكتت و هي تتفرج علي عك و هوبا ليصة و خشخشة و نعكشة و استلام و دوران و نعكشه و شقلطة من احمد مدبولي..  اللي ما لاقاش حد من الجهاز الفني الاخرس .. عيب كده .. ( العب زي الناس انت مش بتلعب بكورة ابوك.. العب جماعي العب ما تقرفناش. يا تطلع بره ) ..و دي عبارة مشهورة لاحد المدربين العظام 

و بين الشوطين و الكل قال ان كان لازم حمزة يغير من طريقة اللعب بعد طرد لاعب حرس الحدود و يلعب كثافة هجومية  و…………… و ……….. و………. و الف نصيحة بنصيحة .. لكن لمين ؟

 لكن كان الرد الجميل و هو : يمكن الكابتن حمزة ما يعرفشي ان حد  اتطرد من حرس الحدود 

بالشوط الثاني – الاسماعيلي هوه هوه …. لا يوجد اي شئ يمكن الحديث عنه الا بالدقيقة 54  و هدف لمحمد الشامي  و من هجمة هي الوحيدة المحترمة لانها اتلعبت سريعة و لمسات سريعة .. يعني احمد مدبولي لم يحنكش و لا محمد حسن عاش دور فريد شوقي و محمود المليجي في الاختراق الفاشل – لكن كانت اللعبة تي كي تاك – جوووووول 

و يبدو ان حمزة كان بيشرب او كان بينظر الي الخلف في المرايا .. علشان لعبة واحدة  اتلعبت صح  – في غياب الاشراف لعش النمل 

و انذارات بالكوم علي لاعبي الاسماعيلي و هو افضل انجاز للاعبين و الجهاز الفني و 6 انذرات كان منها انذار لحمزة الجمل شخصيا ..بالدقيقة 96 

و كل الشوط التاني لا يوجد به الا محاولة اختراق عبيطة من احمد مدبولي و لمسة يد من قلب الجول علي فراس شواط و هو يقلد لاعب الترجي الفريقي اينرامو  اللي احرز هدف بيده في الاهلي .. بس فراس عملها بعباطة و استحق انذار 

الخضة بتاعة الدقيقة 79 بتاعة دسوقي – احمد عادل عبد المنعم –  و خرج ياو انور حتي لا يطرد و خروج شواط حتي لا يطرد ولديهما انذارين من قبل …و سد خانة و خلاص لحد ما الوقت يفوت و لو بالنبوت و نفوز 1-0  .. و ناخد الثلاث نقاط و احتفالات و احضان بين جهاز فني عش النمل ..و خلصت المباراة … و الحمد لله رب العالمين انها جائت لحد كده

و علي فكرة انا فرحان بالثلاث نقاط – لكن ان فكرت انك حتلاعب المباريات القادمة بالطريقة دي امام فرق افضل منك 

 مش عايز اقول لكم .. حيحصل ايه 

و انتهي الكلام خارج المقرر 

و الف مبرو…