لعيبة و لجنة و جهاز فني … ليلتكم جلة متعاصة بجلة

كتب:daraweesh

هو فيه ايه … و علشان ايه .. يجري كل ده للاسماعيلي .. حاولت اسكت ( و نجحت ) خلال الازمة الاخيرة الماضية بسبب تمرد اللاعبين و عجز اللجنة المصدية و لوك لوك لوك لوك المتحدث الرسمي و المستشار الفني و قلة حيلة الجهاز الفني .. الكل فاشل ابن فاشل في الازمة الأخيرة .. سواء كانوا لعيبة أو جهاز فني أو اللجنة .. كلهم علي بعض .. ليلتهم جلة متعاصة بجلة .
و لا واحد من اللاعبين أو الجهاز الفني أو اللجنة المصدية .. يستاهل يكون في الاسماعيلي باي حال من الأحوال .. كلهم مجموعة مختارة ملعبكة مفشكلة في دماغها كلبة باولادها السبعة
لكنها الايام السودة اللي تجعل المشجع الاسماعلاوي – يسكت و يضرب كف بكف و هو يشاهد سيناريو سلقط متوقع و مكرر ومعاد ..بكل غباء و شكل غريب و باصرار غريب و خاصة من الجهاز الفني القديم بقيادة الجمل حمزة
و اتصور أن و لا واحد من جماهير الاسماعيلي .. قبل الساعة 6 ( قبل بادية المباراة مع فاركو ) ..كانت حالته مختلفة عن العبد لله .. كلنا كنا فلقانيين و متشائمين و معندناش ثقة و لا واحد في المئة ..اننا نكسب و نفرح .. الكل مستعد بحالة من اليأس و الحزن و تصور سيناريوهات منيلة بستين نيلة .. في الساعة 8 .. بعد الماتش ما يخلص
و بصراحة .. كان التوقع في محلة ..كل ماتش للاسماعيلي معناه حزن و ياس و قلق
اللعيبة .. كان فيها و فيها ..و خاصة النجم المش تونسي فراس الشوكاط الشكراط … ما شاء الله د 9 و 17 و 18 و 22 و 35 و 54 .. خمسة أهداف ضائعة و الشامي بيعك و مخلوف بيقطع الكرة علينا و محمد نصر كان حيجيب للجميع جلطة من ( ألشة) في منطقة الــ 6 … و لكن انقذنا بالدقيقة 85 .. من هدف اكيد كان حيتعبنا جدا جدا و وسط الملعب كان افضل – لكن في الثلث الاخير قليل ما تجد اصفر و جتي الكرات العرضية المميزة لعبد الرحمن مجدي .. لو كان هناك كثافة هجومية .. كان سجل الفريق .. لكن مين يقولو مين يفكر
أما الجهاز الفني … 3 ديفندر بالتشكيل و انت علي ملعبك و وسط جمهورك و الاصرار علي الفرقع لوز اللوز مخلوف و الخوف من تغيير طريقة اللعب لازم بعد ما الشوط الأول يخلص ( منتهي الجبن و عدم الثقة ) و اخراج عبد الرحمن مجدي افضل لاعب و رجل المباراة و الاصرار علي محمد الشامي و اللي لازم يجيب هاند بول كالعادة د 31 و يسبق الكورة د 56 و لم يخرج اسوء لاعب بعد مخلوف و هو الشامي إلا بالدقيقة 70 و يخرج من الاصل عمر الساعي بره التشكيل ..مع أن واضح للاطبش أن الكثافة الهجومية في الضياع يا استك ..و الكرة بتتمختر في منطقة 18 الخصم بمباراة فيوتشر و مباراة فاركو .. بدون مهاجمين من الاسماعيلي .. لكنه كما قلت عدم ثقة في النفس و لا في الامكانيات الفكرية و الكتشنة
و بالمناسبة كل فرص الاسماعيلي اليوم كانت من قدرات اللاعب عبد الرحمن مجدي .. يعني بدون أي إدارة فنية من الجهاز الفني
و طالما الاسماعيلي بيجب مدربين .. قاعدين .. يبقي ليلة اللجنة جلة متعاصة بجلة
و طبعا علشان الجهاز الفني السابق اللي وافق علي سيرجي اكا و كريم الديب .. يبقي مستحيل الكابتن الجمل حمزة يلاعبهم من الاصل ..و فيه موقف مش مفهوم ضد الشبراوي
العجيب انه تم طرد قلب دفاع فريق فاركو رامي صبري د 77 و تسبب برجلة كبيرة لطارق العشري مدرب فاركو ..و لعبنا الي الدقيقة 96 .. يعني حوالي 15 دقيقة .. لكن كان الاخطر هو فريق فاركو و انقذ محمد نصر هدف اكيد لفاركو د 85 … و نزل ياو انور لعبكة و الشوواط الشكراط .. في الضياع ..و الفرصة الوحيدة كانت بتسدية بعيدة من البديل صالح جمعة د 91 و باقي الوقت فرض طارق العشري اسلوبه لاضاعة الوقت و الحفاظ علي نقطة سهلة .. اخذها و يستحقها من الجمل حمزة
و علي كده .. يجب صرف مكافأة اجادة للاعبي الاسماعيلي .. لأننا أحرجنا فريق فاركو
و عقبال ما نحرج فريق سموحة يوم 16 فبراير
أنا لو مكان اللجنة المصدية ترحل فورا و في ايديها الجهاز الفني
و نشوف حد بيفهم في إدارة الازمات و إدارة كرة القدم
و حتى ذلك الحين … ليلة الجهاز الفني و اللجنة جلة متعاصة بجلة
ملحوظة اخيرة.. لما انتهي الماتش .. شغلت الاذاعة القران الكريم .. علشان لا احد يشتم و يسب
حركة معلمين .. ولكن !!!!
و انتهى الكلام خارج المقرر