مش مصدق نفسي يا لمبي .. ثلاثة وثلاثة و في سموحة

كتب:daraweesh

الاول كل سنة وانتم و كل مصر و اهلها طيبين وصايمين ومصليين وقائمين وبرمضان وبركاته فرحانين بثلاث نقاط و ثلاث اهداف و في سموحة و الهاني سليمان وفي اسكندرية كمان .. بصراحة مش مصدق نفسي يا لمبي 

الي الدقيقة 45 بنهاية الشوط الاول والنتيجة 3-1 ..وبلفة بسيطة علي الفيس بوك .. مفيش اسماعلاوي الا خايف و حاطط ايده علي قلبه ..و خايف من دش بارد و حركات حمزة .. الكل مش واثق بدرجة مرعبة .. حتي لو كان متقدمين بثلاث اهداف بالشوط الاول مقال هدف .. لكن الكل مرعوب و انا و انت منهم ..من حركات حمزة و مخلوف ..واللي كان كان 

و نرجع لبداية الشوط الاول ..و بالونة كبيرة عملها الاعلام اسمه مدرب الفني لسموحة .. صحيح انا انبهرت بمستوي الفريق و تمركزه و انتشاره و مراكزه .. شئ ازرق زي الموج الازرق .. هوا في هواء . وثلاث اهداف اسماعلاوية .. اه كويسين  محترمين .. لكن سموحة مين والناس نايمين ..منك لله يا كومي انت وابراهيم عثمان  ..و رمضان كريم

و كمان بالدقيقة 47 .. كانوا حيبقوا  4-1 .. لولا ان الهادي سليمان – تشقلط و تلعبط و تشقلب و لحق الكرة من تسديدة عبد الرحمن مجدي .. الي داخل المرمي ..وكانت حتبقي رباعية  تحفة.. لكن الحمد لله علي كل حال 

لكن بالشوط الثاني و من الدقيقة 52 الي الدقيقة 76 ..الفريق بقي مايص وحمزة الجمل لايص ومش شايف .. بالبطاطا خالص ..ومن فرصة لكريم الديب مرت من جانب العارضة .. اختفي الاسماعيلي ..و خفاه زيادة باهر المحمدي و سدد في العارضة مضيعا الهدف الرابع و ضربة الجزاء .. يا خوسارة  يا الف خوسارة 

 مازال الهدف الرابع ضايع 

ومن قبل ما الفريق يتدلع  يتمايص .. هجمات مرتدة تضيع بالهبل و تتسبب في اضطراب في اعصاب المهاجمين و خناقات ما بينهم و اختفي اداء عبد الرحمن مجدي ملك الدلع زز الشامي قبل خروجه ..والجهاز الفني .. لا بيوجه ولا بيتكلم .. شكل الجهاز الفني لحد الدقيقة 80 – مش مصدق نفسه يا لمبي .. زينا تماما .. مرعوب وخايف من شئ ما زي نجوي ابراهيم .. و بصراحة الواحد عنده حق يخاف و يترعب و حتي لو كان اسمه حمزة الجمل 

ده يا راجل .. ياو انوور الامور اللي كان عايز بشتريه  باريس سان جيرمان .. اضاع انفراد لا يضيع الا من واحد ياو مظلم .. ومفيش فايدة الهدف الرابع ضايع و طايح و رايح رايح .

بالمناسبة لا يمكن ان ننسي الحارس محمد كوكو .. انقذ 3 اهداف محققة  كان اصعبهم بالدقيقة 80 و لو ان كوكو وقف يتفرج زي الحارس محمد الشناوي و هدف مالك باعيو و هو يمخر عباب الماء د 41..  و عصام صبحي انقذ  انفراد 100% و لكن كوكو بجد كان نجم المباراة الاول وانقذ كرة اخري لباعيو د 57 و 80 و معاه محمد الشامي اللي كانوا حيبيعوه اوه اوه اوه .. و رجع من بورسعيد غضبان اسفا ومعاه مدبولي اللولي لولي 

عموما المشوار لسه بدري عليه و من هنا الي اسوان و الشلالات .. مش لازم نفرط في نقطة واحدة في الاربع مباريات قادمة ولابد من الحرص علي عم التفريط في اي فرصة تهديفية و ده من مهام الجهاز الفني .. انه يحدد طريقة اللعب الهجومي و يضع اللاعبين امام ان الفرصة = هدف وليس بالضروري انك تسجل ولكن الاهم من سيسجل و يحرز الهدف و يحص النقاط 

 مرة اخري الف الف مبروك علي الفوز و الثلاث نقاط  كل سنة و انتم دائما فرحانين و صايمين  بمناسبة شهر رمضان الكريم 

وانتهي الكلام خارج المقرر