من غير بولتيكا و افتائيكا … بلطنا سيراميكا

كتب:daraweesh

ألف ألف ألف مبروك فوز الدراويش بثنائية علي فريق سيراميكا كليوبترا العنيد… و الحصول علي ثلاث نقاط رائعة و جميلة و ثمينة فرز أول كمان … و الفوز جميل و أجمل منه الروح الجميلة في الملعب و علي الدكة و في المدرجات .. و مش في المقصورة
لكن الأول نعزي كل جماهير الدراويش في وفاة الحاج محمد أبو السعود ذو القلب الأبيض الرائع و ندعو جميعا أن يلهم أهله الصبر و السلوان و أن يدخله الجنة مع الإبرار و الشهداء .. اللهم أمين أمين أمين
……………………
قلنا فيه روح جميلة في كل مكان ( إلا المقصورة و اللي قاعدين فيها من أهل الهمبكة و نفسرها بعدين ) .. و اغلبنا اكتر علي بولتيكا رئيس الهمبكة و كلاماته الملبخة و الملخبطة مع مهيب … و الحمد لله ..عدت علي خير ( و أنا عارف ) .. و الفضل يعود إلي الله سبحانه و تعالى ثم الكابتن حسني عبد ربه و الكابتن حمزة الجمل و شركاهما
و أمتي رئيس الهمبكة ..يبطل همبكة و الظهور في الفضائيات و يلخبط و يفشكل الدنيا … يا ريت حد قريب منه يركب له ( جلده ) و قلب خلاط علشان يبطل كلام و بولتيكا
أما الافتائيكا خلال الأسبوع الماضي كانت حول تعاقد عبد الرحمن مجدي .. و قالت الافتراءات أن التعاقد فيه شرط جزائي أن يدفع 20 مليون جندي … و يفلسع
و صراحة أنا بأعذر كل ( فتاي ) لان الماضي الأسود و المهبب .. بيؤكد أن الهمبكة بيدور و ينقب علي فلوس .. أي فلوس .. و لو باع المدرجات و الكراسي و طبلة عم غريب كمان
لكن بالبحث و التقصي ..ظهر أن أخونا تامر النحاس المحتاس كان طالب شرط جزائي و فعلا جهز الأوراق بخصوص كده .. لكن فيه شخصية محترمة قعدت مع اللاعب و أقنعه أن ده مش في مصلحته علي الإطلاق و لكن الحوافز هي من تصنع المستوي و المستقبل .. و فعلا تم تغيير العقود و بدون شرط جزائي و أتعمل حوافز بديله مثل مليون جنيه لو انضم اللاعب إلي المنتخب و مليون أخري لو أحرز عدد أهداف معين و هكذا .. و تم إلغاء الشرط الجزائي بالفعل و لم يذكر في التعاقدات المجددة
و انتهي الأمر … لكن لازم من الفتاوي و التشكيك و التوتر و الخوف
لكن نترك كل شئ ..لنهاية الدوري .. و نشوف رئيس الهمبكة حيعمل إيه
و ساعتها .. يبقي لكل حدث حديث و حديد و زرنيخ كمان
و الحمد لله النهاردة أحنا فايزين و مبسوطين
لا و إيه … و جبنا كمان هدفين علي أرضنا
افرحوا يا ولاد ..زقططوا يا ولاد
و عارفين أخر هدف سجلناه علي أرضنا كان أمتي و مع مين
كان في الموسم الماضي

في مباراة الاسماعيلي و الاتحاد السكندري في 5 يوليو 2021 بالاسبوع 28 من الموسم الماضي 2020/2021  و سجله مانويل دافيد افونسو  الشهير بأري بابل و اتهزمنا 2-1 .. يعني 310 يوم من غير اهداف في الاسماعيلية 

مع مراعاة ان مباراتنا مع الاهلي 1-1 كانت في ملعب الجيش في برج العرب بغرب الاسكندرية !!!

و اول فوز  علي استاد الاسماعيلية  بالدوري كان علي غزل المحلة في في 17 يونيو 2021 ..  من 348 يوم يعني كمان شهر كان حيبقي لنا سنة كاملة لم نفوز بالاسماعيلية !!!,,منك لله يا ناظر انت و مجلس السلاحف  و  مجلس الهمبكة 

حتى أخر الأهداف في الاسماعيلي في كاس مصر في الإسماعيلية كان مع فريق بتروجيت .كان من ضربات الجزاء الترجيحية في 12 مارس 2022
ما علينا
المهم أن الفوز عاد و الثلاث نقاط جعلونا 17 نقطة و ده شئ جميل و لو أن مازلنا في المركز 16 من 18 مباراة و تساوينا مع الجونة من 17 مباراة و اللي حتلعب بعد بكرة مع مصر المقاصة
المهم نركز في اللي أحنا فيه .. و شرط أن الهمبوك يبطل بلوتيكا و يبطل بعضنا اقنائيكا
و نتلم حول اللاعبين مهما كانوا هم مين
و الحقيقة أن بهولاء اللاعبين هم من سيبقونا في الأضواء و هم من سيهبطوا بينا إلي الظلام
و لو عرفنا القصة و مافيها
حنعرف أن مشوار البقاء مازال طويل و طويل جدا

و قبل ما اختم اقول

بركاتك يا كابتن سيد توفيق مدرب حراس المرمي الامين … محمد فوزي كان اليوم عملاق و ملك منطقة الجزاء ..بلا منازع

الكابتن حسني عبد ربه اعاد فرمتة باهر المحمدي و رجع كابتن الفريق و قلب دفاعه الامين

محمد هاشم لازم يروح المنتخب مع محمد فوزي

محمد عادل و محمد بيومي ..مسمارين غير مرئيين .. لكن قلاووظ محترمين

عبد ارحمن مجدي .. ابو رجل ذهب

 احمد مدبولي .. يالا يا حازم صحي النايم  لما كان الامبراطور حازم يقود هجمة مرتدة..كانت جول و جول و جول

 عمر الوحش …. منه لله بقي الناظر 

احمد مصطفي ..اثبت ان كرة القدم لعبة جماعية.. فجاء الهدف الثاني 

 الشامي اضاع هدفين منهم هدف لا يضيع د 48 … يا خسارة ..كان ممكن تعمل ريكورد 

الجهاز الفني . تركت الملعب معظم الشوط الثاني لسيراميكا .. و مش ده ينفع مع الفرق الكبير و لكن البركة كانت في وجود باسم مرسي

… و لابد من التركيز في صناعة الفرص التهديفية في التدريبات القادمة

و كل التحية و التقدير لرجال و فنيين نجيلةاستاد الاسماعيلية و هم الجنود المجهولين 

و مرة أخري ألف ألف مبروك يا اجمل جماهير الدراويش

.خصوصا  في المدرجات .. و هم  أحلي من الثلاث نقاط 
و انتهي الكلام خارج المقرر