ميدو أبيض.. و نصر أبيض خاااااالص

كتب:daraweesh

ببساطة و بشكل مباشر .. ما حدث في مباراة اليوم بين الاسماعيلي و المحلة.. يوضح ان الكابتن احمد حسام ميدو.. رائع في كل شئ الا في مجال التدريب … ابيض و ابيض خالص 

 و يمكن ان نتوقف عند عدة نقاط يراها – الاطبش – و كانت السبب الرئيس في الاداء الضعيف جدا و المتهالك للاعبي الاسماعيلي و من الدقيقة الاولي ..و كلها بدون استثناء يقف ورائها و امامها و في النصف كمان … المدير الفني احمد حسام ميدو ..و شوية  ( القلل ) اللي قاعدين علي دكة البدلاء 

و قبل ما نتكلم عن اخطاء الاسماعيلي و ميدو و الهباب المدافع نصر . خلونا نشوف رجالة المحلة الفلاحين و المحترمين .. عملوا ايه !!!

 الحكم الرشيد العتيد الرعديد نادر قمر الدولة …  قام بطرد لاعب المحلة ايهاب سمير  د 45   و كمان طرد مدير فني المحلة عبد الباقي جمال  … اهتز بالفعل اداء المحلة كثيرا بعملية الطرد للمدافع و  بطرد المدير الفني ..و  لم يستغل  المدير الفني للاسماعيلي حسام ميدو الموقف … لكن عبد الباقي و هو باقي في المدرجات عملت تغييرات رائعة و اعاد المحلة الي المباراة و احرز هدف التعادل بالدقيقة 96  و قبلها كان رجل المباراة الاول محمد فوزي حارس الاسماعيلي – لولا الخطأ الاخير –  كان قدم مباراة و لا اروع و انقذ اكثر من خمس كرات ما بين مباشرة و ساقطة و هو دليل علي قوة اداء المحلة 

 بل ان  فريق المحلة من الدقيقة  الاولي بالمباراة كان الافضل  حتي الدقيقة 24 من الشوط الاول و انقذ فوزي هدف رائع من الهداف احمد الشيخ د 22 و من خطأ قاتل ومعتاد من المدافع العتويل الابيض محمد نصر ..و لم يشاهد الاسماعيلي في منطقة جزاء المحلة  الا د 40 و كرة مضحكة كوميدية من اللاعب ابو  8  مليون جنيه  محمد الشامي و شاط النجيل و هو منفرد و لكن الرجل  الشامي شال الطين …و رجعه مكانه – يشكر علي كل حال – و اخري هاندبول كالعادة علي الشامي د 53

المحلة بعشرة لاعبين من الدقيقة 45 ..كانوا افضل من حيث التمركز و الانتشار و تركوا المناطق الهجص في الملعب للعيبة هجص و جهاز فني قلل – عددهم اكتر من الهم علي القلب – و لا لهم اي 60  في ستين  لزمة و الاسماعيلي اول كورنر بالدقيقة 24  امام 5 كورنر للمحلة 

 و كفاية تغيير ميدو العبقري … لياو انور – في الدقيقة 97 ..و كان فاضل 35 ثانية  .. و لو كان هرقل او ماشيست .. حيعمل ايه .. نفسي اعرف بجد … طيب هو ساب مدبولي للدقيقة 74 ليه ..هو ما كانش ميدو شايفه  .

و علشان بنقول الحق دائما في كلام خارج المقرر … الحكم قمر الزمان او قمر الدين .. حرم المحلة من الفار في ضربتي جزاء  واحدة لمسة يد علي الجهبذ محمد نصر و لو كان حسب احداهما لا لوم عليه .. و كانت الاحوال اسود من السواد و حزن الحزن

 تعالوا بقي للنقطة التي تظهر ان الكابتن  ميدو ابيض خالص و هي رعونة المهاجمين و العزومة علي بعض داخل منطقة الجزاء و تناقل الكرة في منطقة  ال 6 يارد  كاننا بنلعب كرة خماسية و الفرص الضائعة من : مدبولي و الشامي و عبد الرحمن مجدي و شواط و مخلوف ..و منهم 5 لاعبين اصفر علي واحد محلاوي … لو كان فيه دكر في الجهاز الفني ..ما كان تكرر ذلك خمسة او ست فرص … و مفيش لاعب مخلصاتي او عايز يخلص الكرة بشكل مريب و عجيب 

هناك امور بالتشكيل من حيث اللعب بثلاث ارتكاز  و التامين الدفاعي و لا يوجد محاولات هجومية بالشوط الاول الا بعد نزول عبد الرحمن مجدي و ضياع الفرص و الارتباك في اخر عشر دقائق بشكل واضح – كان لابد معه من التعادل و خسران نقطتين علي ارضك و وسط جماهيرك و التي يمكنها ان تحرك الصخر .. لكن مع ميدو ونصر .. كل سنة و انتم طيبين

و مع الهجوم المتراخي و عدم الثقة في التهديف و مدرب ابيض و مدافع ابيض خااااالص  – يبقي كويس نقطة افضل من مفيش . ليه 

 علشان يا خوفي من اللي جاي … يا خوفي 

 قبل ما انسي.. هو  فراس شواط اخد رجل المباراة ليه .. علشان لعب حلو … للمحلة !!!! مع انه لابس اصفر !!

وبالمناسبة برضه   .. أحمد حسام ميدو 
لعب ٩ مباريات حصل على ٨ نقاط من أصل ٢٧ نقطة
٣ هزايم
٥ تعادل
١ فوز
هزيمة 3/1 من الزمالك
تعادل سلبي مع البنك الأهلي
هزيمة من حرس الحدود 2/0
هزيمة من المقاولون 3/1
تعادل مع الطلائع 1/1
تعادل سلبي مع أسوان
فوز على الداخلية ٣/١
تعادل مع الإتحاد السكندري 1/1
تعادل مع المحلة 1/1

و انتهي الكلام خارج المقرر 

و ربنا يستر