شادي حسين 1-0 صالح جمعة في 2 او 3

كتب:daraweesh

من غير مبالغة او تشاؤم او تفاؤل او اي شئ… كان لازم  يفوز الاهليو لو بهدف واحد او نصف هدف او ربع هدف … لان هناك فارق بين البديل شادي حسين و بين وزن الحاج صالح جمعة 

 شادي حسين ( نزل الملعب و شكله زي المصارعين بتوع الريسلينج منيا او راو ..لياقة و لباقة و حلاقة ) .. لكن الحاج صالح جمعة نزل الملعب كبديل في الدقيقة 77  (  وزن زي اللاعيبة في استعراض القدامي في مباريات الاعتزال و زي الكابتن عبده نصحي رحمة الله عليه  ) .. لا وكمان نزل الحاج جمعة  مكان محمد حسن الدبابة السريع القوي في الالتحامات و محمد حسن كان افضل لاعبي الفريقين … .. لكن صالح جمعة .. اترقص و وقع و اتلخبط و اتشخبط من الدقيقة 77 الي الدقيقة 95 … و وزنه كان 2 و3 اضعاف ما يجب عليه ن قبل 

 بالمناسبة الاسماعيلي تعاقد مع صالح جمعة في 15 سبتمبر .. يعني من من 35 يوم  …. يعني كان ممكن يخس ( طن ) من وزنه  خلال تلك الفترة 

و بالمناسبة كمان … هو الاخ كارلس جاريدو بيدرب علي سطر و سيسي سطر .. يعني بكرة  الخميس اجازة كمان من التدريب و حيدربوا الجمعة و الماتش يوم الاتنين القادم  مع المحلة في المحلة. يعني حنتدرب الجمعة و السبت  نسافر الاحد … و كده يعني 

و بكده يتضح ما نريد ان نشير اليه … ان هذا ليس هجوم علي الموهوب صالح جمعة بشكل خاص و لكن انتقاد لتغييره و الدفع به بديلا لمحمد حسن و في وسط مجموعة شباب بخط وسط الاهلي – يفرموا صالح جمعة و يعملوا منه  ..حواوشي 

و كانت مسئولية الكابتن الاسباني جاريدو و اللي معاه من عائلته و جيرانه الاسبان .. يضبطوا – صالح جمعة مثلا  علي الاقل الوزن .. و الا لا يدفعوا به من الاساس .. لانه كان اضحوكة و صعب حاله علي الجميع .. و ربما يكون هذا الماتش .ذو اثر سلبي جدا جدا علي نفسية اللاعب و رغبته في العودة .. و هي  غلطةالجهاز الفني و عليه معالجتها 

 طبعا .. حيقول بعض الخبراء …. ايه ده ايه ده .. تقطيع في الفريق و اللاعبين و لسه بنقول يا هادي 

 لو قلت كده يا ابو الكباتن يبقي انت لم تفهم السطرالاخير .. واضح ان هناك حالة من الاسترخاء  لدي الجهاز الفني  لقاءات و تصريحات اعلامية من الجهاز الفني  خناقة علي الفانلة هاله هالله  و مستحقات اللاعبين … الخ الخ الخ 

و علشان نثبت اننا لا نهاجم الحاج صالح جمعة .. ارحعوا الي الدقيقة 48 من المباراة و تألق محمد فوزي في صد تسديدة من الحريف البرازيلي برونو و بعد قتال و معافرة و اصرار من البرازيلي .. و قارن معافرة البرازيلي ..بدلع و مسخرة باسم مرسي و حركة المنظرة اللي عملها مع الكامير بعد مشاركة  و التحام مع اللاعب البسكويتي محمود متولي … منظر بارد و منظرة بايخة يا عم النجم ….!

 تخيل اننا لم نصل الي مرمي محمد الشناوي الا عن طريق توغل من محمد محسن  بالدقيقة 70 .. غير كده لا يوجد فرصة واحدة علي مرمي محمد الشناوي  حارس الاهلي..

 بمناسبة الفرص للاسماعيلي .. الكابتن باسم مرسي ايضا ..اعمل ايه مش عارف في استغلال تمريرة سحرية من احمد مدبولي 56 … كلنا قلنا لو كان هنلك حازم مرسي . كان افضل من باسم مرسي 

 حكم المباراة تغاضي عن طرد لاعب الاهلي طاهر محمد طاهر  للعب كرةخطرة ببدايات المباراةو هتفت الجماهير  1 -2  الفار فين .. لكن حكم المباراة محمد عادل طرد نفس اللاعب لكرة خطرة بالدقيقة 93 .و كانت المباراة شبه انتهت 

و مازلت اصر و اؤكد ان نجم الباراة هو الحارس الامين محمد فوزي و لا يسال عن الهدف الذي يتحمل مسئوليته المدافع محمد هاشم و استطاع محمد فوزي ان ينقذا الاسماعيلي من فرص تهديف محققة د 33 و 47 و 65 و 79

 الخلاصة ان الفريق محتاج شغل و شغل كتير  اداريا قبل  فنيا…  وفنيا قبل اداريا لتظبيط الفريق و ما فيه من بطاقات دولية متاخرة و عدم اللاعب بصفقات جديدة غير جاهزة …. و عدم الراحة المتكررة بلا مناسبة .. و خاصة ان الفريق في اخر 20 دقيقة انهار بدنيا  بشكل واضح امام الاهلي الجاهز بدنيا و فنيا … و انتهت مباراة الاهلي و لكن المباريات الخمسة القادمة .. صعبة و تحتاج اداء و فكر مرتب بعيدا عن الاسماء ..مهما كان تاريخها 

و انتهي الكلام خارج المقرر