4 فانلات و 4 مدربين و نقطة من دقن الصباحي مكسب

كتب:daraweesh

يعني هي كانت ناقصة الصباحي ابو كرش .. علشان نتعادل .. اصلا احنا مش بنعرف نكسب حتي لو جابو الحكم الاقرع بييرلويجي كولينا العادل او البولندي سيمون مارسينياك، حكم نهائي كأس العالم 2022، .. برضه الاسماعيلي ضد المكسب .. قولوا الحمد لله اننا ما شلناش 4 او 5 – صفر .. علشان مهاجمو فيوتشر احمد عاطف و الوادي و رضا بوبو كان عندهم حول و استجماتيزم  ..و خاصة الاخير بوبو بالدقيقة 33 جاله شلل اطفال و بعد ما مشي زي السكينة في الحلاوة و انفرد و احمد حسن خلصها في اخر فيمتو ثانية ..و كمان في الدقيقة 98 و 15 ثانية .. راسية من لاشين وسط مشاليل الدفاع الاصفر .. ينقذها محمد فوزي ببراعة متناهية.

و كمان اخونا حمزة الجمل بقي حمزة القطة البلدي  من الدقيقة 62 و  واقف محتاس و مشخلل و مخبل و مهبل .. و واقف وسط الغيط بعد ما غرق الدرة و شاطط الشواطي … و لا فيه فكر و لاكتشنة و لا اي حاجة و لو هجايص ! 

مش بس من الدقيقة 62 ..اخونا حمزة القطة ..اتشخلل ..ابدا ده من الدقيقة 18 و ظهر ان الفربق معاه لاعب اسمه احمد مدبولي .. يضيع اجدعها فريق حتي لو كان برشلوتة و ريال مدريد او صن داونز الافريقي … و كمان محمد الشامي … لعيبة بطيخ شليان ..و اخونا حمزة القطة …. و لا حتي بينونو للعيبة .. سايب اللي يعك يعك .. يعني هو كان ماتش ابونا … !

لكن بالحقيقة فريق الاسماعيلي من الشوط الثاني.. اداء اسوء ما يمكن تصوره و فريق متراجع تراجع رهيب و حتي لو حصل علي الكرة .. بيعمل الهجمة المرتدة !!! تنتهي قبل نصف الملعب !!!!!  و برضه اخونا  حمزة القطة … محتار و محتار و محتار .. تصرف كيف عبد الرحيم ..تتصرف كيف يا عبد الرحيم

و يبدو و اكيد ان الاخ حمزة ..لا يفرق عن الاخ ميدو .. باي حال من الاحوال … كله زي هنود الخليج ما بيقولوا  same same.. حتي ان الاتنين ذات وزن الثقيل … و تفكيرهم و كتشنتهم  برضه same same

 الاستحواز  كان بالمباراة 59  لصالح فيوتشر … بالشوط الثاني يقترب من 70% لفيوتشر ..ده بسبب تغييرات الكابتن علي ماهر .. لكن فريق فيوتشر كان بيتدلع  بمعني كل الدلع … او علي الاقل كان بيفكروا  في المباراة الافريقية  القادمة و تعويض الخسارة 2-0  من الجيش المغربي … و لو كانوا ركزوا كنا شلنا اربعة او خمسة 

صحيح  فيوتشر كان بيتدلع .. لكن الحكم الصباحي عبد الفتاح القصري كان اسوء من السوء ( كرة ياو انور و هاند بول الفيل ) و كان ممن ان نلبس جول في اخر دقيقة لولا براعة محمد فوزي .. لكن النقطة مكسب في كل الاحوال 

 صحيح علي ماهر  اتدلع او كان مركز مع افريقيا … لكن انور العشري مع فاركو …. معلق في الهوا … و عايز يعلم علينا و لو في الاسماعيلية … يبقي المباراة القادمة في الاسماعيلية … موت او موت 

بالمناسبة فانلة الاديداس هي الفانلة الرابعة للاسماعيلي بالموسم الحالي مع المدير الفني الرابع .. هو فيه حاجة كده في الدنيا !!!

و انتهي الكلام خارج المقرر 

ربنا يسترها معانا و معاكوا