اتعادلنا.. و حنفوز و حنخسر و نتعادل .. و بلاش نفسنة

كتب:daraweesh

غريبة جماهير الفيس بوك من الاسماعلاوية .. بعضهم مش مقدر ابدا ( المصيبة ) اللي الفريق فيها .. و هات با تقطيع في اللاعبين و هري و هبد و افترا علي الاخر
كل ده .. علشان اتعادلنا مع فريق البنك الأهلي 2-2 في مباراة دراماتيكية غريبة من حيث السيناريو التي جرى به احداث اللقاء
المهم اننا لم نهزم … ليه
لأننا في مصيبة و كارثة و بلوى كحلي و سودة كمان
و كل واحد من فلاسفة الغبراء .. لازم يخرج المدير الفني الاقرع اللي جواه
و دي غلطة فلان و غلطة علان و غلطة ترتان … و ادبح و قطع و اسلق و اشوي في اللاعبين
وقفة ..لابد منها
كل التحية و الاحترام و التقدير لجماهير المدرجات الاصيلة و المحترمة
مجهود رائع و تشجيع مثالي و اخ جمال و روعة و حاجة تشرف كل اسماعلاوي اصيل
و كمان أخر المباراة .. ندهوا علي الفريق
الدراويش ..يجيي كله
و فعلا حيوا اللاعبين و خصوصا باهر المحمدي .. المتنفسن عليه من الدرجة الاولي
هما دول جماهير الدراويش الحقيقية- اللي في المدرجات – اصحاب النادي و احفاد العظماء اللي بنوا النادي من الاصل
لكن … اه و اه من الفيس بوك و جماهيره الغبراء
ناقص يعلقوا المشانق للاعبين و خاصة قلب الدفاع باهر و هاشم

 حتي البطل الرائع محمد فوزي مش عاجب المنفسننين

مع انه النهاردة شال 3 اجوال في منتهي الصعوبة منهم انفراد كامل د 59 و 61

و كان ممكن احمد مصطفي يدخل التاريخ د 71

لكن كل تركيو المنفسنيين مع الدفاع
ايوة غلطات دفاعية و عدم تركيز لجزء من الثانية
و هدفين ..منهم الهدف الثاني و التعادل ..ما كانش له تلاتين لزمة
و بالحقيقة و العدل ..نقول
انها غلطة جهاز فني .. الفريق يحرز هدف عن طريق وجيه عبد الحكيم د 87
فاصل 3 دقائق
موت الماتش يا عم حمزة
اعمل تبديلات ياعم حمزة
خلي اللعيبة تقع علي الارض يا عم حمزة
لكن ععم حمزة .. مهتم بامور أخري .. خارج الملعب تماما
و عنده كمية نفسنة تكفي حي شبرا ..من القللي إلي شبرا الخيمة

 واضاع الجهاز الفني الشوط الاول في حنكشة و البنك  كان خلصان و كان لازم نجرز جولين علي الاقل في الشوط الاول … و مع ذلك احرزنا هدف و احنا ناقصين عن طريق بديل نزل د 73 ( متاخر جدا )
و مع ذلك .. نقول بلاش تقطيع في اللاعبين .. لان هما دول اللاعبين اللي معانا إلي اخر الموسم
و لو فيه هفوات دفاعية .. ده موجود في احسن دفاعات الفرق .. من غيرها مفيش أهداف
و من ايام محمد عبد السلام و ابراهيم حبلص و محمد العقباوي و سيد أبو جريشة و طه أبو العلا و علي حسين و فرج محمود و مصطفي يونس ( مدافعوا النادي في الاربعينات و الخمسينات ) .. إلي جيل اليوم ( باهر و هاشم ) لازم اخطاء دفاعية و هفوات و عدم تركيز
علشان كده .. دخل في مرمي الاسماعيلي 1442 هدف من سنة 1948 في الدوري العام فقط
1442 غلطة و هفوة
حيكون ايه من غير هفوات و غلطات
لكن ندعو الله السلامة و ربنا يسترها معانا و مع الفريق اللي لعب عشرة لاعبين من الدقيقة 61  مع فريق قةي منظم .. طلع روح بطل افريقيا يوم الاربعاء اللي فات
لكن مفيش حد ركز في أن خمسة محترفين كلفوا النادي اكثر من 30 مليون جنيه
هما فين
عرفتوا بقي الغلطة فين
و من مجلس السلاحف الاخرس إلي مجلس الهمبكة و الزيطة .. هما هما و هي هي البلاوي
يعني اخطاء من خارج الملعب بترمي جوه الملعب

و اللي بيشيل الطين.. عادة من اللاعبين .. الذين لم يتم بيعهم 
و لو كان هناك 3 فقط المحترفين .. محترفين بجد
كان شكل الفريق مختلف
لكن معظم المنفسنين من نوع : الايفواري يا كومي .. و بحبك يا مدفعجي و ماراونا مفيش غيرة و بيحب كمان شيكابالا .. كله منظرة علي حساب النادي … و غيره و غيره

و بيسقطوا خيبتهم القوية علي اللاعبين

عموما
خلونا في اللي احنا فيه
و نخرج من السنة السودة دي باقل الخسائر
صحيح كلنا كان نفسنا نفرح .. حتى المنفسنيين
لكن الدور الثاني .. محتاج رجال في الملعب و من غير نفسنة
و لا في الفيس بوك
و ربنا يسنرها معانا في اللي جاي

و انتهي الكلام خارج المقرر