تعالوا نعيط شوية .. الفكرية و الا حي العرب

في بطولة افريقيا لابطال الكئوس عام 2002 ... تقابل الاسماعيلي مع فريق حي العرب السوداني في 7

  مايو2000 ... و النتيجة يعرفها جماهير الدراويش ..كانت ثمانية حلوة جميلة رائعة و نظيفة للدراويش

lمين كان تشكيل الدراويش في المباراة في مايو 2000 ..كان التشكيل مكون من ... الحارس المغربي عبد القادر البرازي و عماد النحاس و ايمن رمضان و رضا سيكا  و محمد بركات و حمام ابراهيم ( محمد يونس ) و سعد عبد الباقي و ايمن الجمل ( اسلام الشاطر ) و محمد حمص ( سيد معوض ) و خالد بيبو  و جون اوتاكا 

https://www.youtube.com/watch?v=ngKLLoKeumw

نرجع تاني و نقول  التشكيل تاني و الا ايه !!!!!! ... و كان معاهم ايمن كمال و احمد سامي و طارق فهيم و محمد صلاح ابو جريشة  الفريق ده يا جماعة الخير  فاز علي المحلة الليبي في الدور الاول 5-1 ( هاتريك لاوتاكا  و هدفين لطارق فهيم ) و خسرنا 3-2  في ليبيا ( هدف لاسلام الشاطر و هدف لمحمد بركات ) ... بعد كده استضفنا  فريق حي العرب السوداني  و فزنا 8-0 ( هدف لمحمد بركات و هدفين لاوتاكا و هدفين لرضا سيكا و خالد بيبو و حمام ابراهيم ) ...  و انسحب فريق حي العرب السوداني  من مباراة العودة و لا همه العقوبات --  يعني حيكون هناك عقوبات ايه  اكتر من 8 صفر

 .. يعني بالصلاة علي النبي المختار صلي الله عليه و سلم   ... الاسماعيلي احرز في 3 مباريات 15 هدف .... و في البطولة كلها 27 هدف في 7 مباريات .. احسبوا انتم معدل التهديف  ... ..  و عارفين ليه يا جماعة الخير

https://www.youtube.com/watch?v=UFLd95_f01E

https://www.youtube.com/watch?v=CG-HWcYaIT8

 و من بعد ما شوفنا الفيديوهات ... نرجع لاسماء الفريق 2000 ..ستجد فيه  جون اوتاكا  و محمد صلاح ابو جريشة و محمد بركات و سعد عبد الباقي و  رضاسيكا و خالد بيبو  .. و كمان  البدائل طارق فهيم  و له هدفين ... الكل بيهدف و الكل سعيد

كان الاسماعيلي عنوانه غزارة الاهداف و صناعة الاهداف  و روعة الاهداف ... و حصل الاسماعيلي علي لقب هداف الدوري 11 لقب .. و متفوق علي فرق كبري في الدوري المصري ... لكن حال  المهاجمين اليوم في الاسماعيلي ,,, يصعب علي الاهلاوي نفسه !!!! و فين المهاجمين و فين صناع الالعاب   و فين الجمل اللي كانت قبل ماتكتمل ..كنا عارفين انها جول .. و اي ضربة حرة مباشرة = جول ....  و الله يرحم ايام الدراويش  .. العب يا رضا العب يا رضا .. لكي يتقدم و يسدد الضربة الحرة  و يجيب جول

 صحيح الفريق  فاز اليوم 4-0 علي فريق نادي ناصر الفكرية .. لكن لو كان الاسماعيلي بيلعب ..كان فاز 8-0  علي الاقل

قد يقول قائل - و ده متوقع - يعني فايزين 4-0 .. و بتقول تعالوا نعيط

و الرد بسيط ... لما تكون مليونير ..مش حتفرح بمكسب جنيه واحد... تحمد الله تعالي صحيح ... لكن الفرحة مش كبيرة و خاصة لما تفتكر ان الاسماعيلي كان مليونير و بيكسب بمئات الالوف و اجوال مزيكا ماركة اوتاكا و بركات و ابو جريشة و حمام ابراهيم و عبد الباقي

السر في كده - لا يوجد بالفريق مهاجم قماص او فنان او هجام  و لا صانع العاب فنان - و هما دول السر في فريق الدراويش من ايام رضا و شحته و العربي و ميمي درويش و الدراويش هما الدراويش  ... كان المتفرج بستمتع  بكرة الدراويش و يخرج شبعان كرة- بكل ما تعنيه الكلمة  و الحروف

 لكن ضاعت كرة الدراويش بفعل فاعل و قصد قاصد .. تحت مسميات المبرراتية و فلسفات  المطبلاتية.. و كل لاعب يرفع قامته في الاسماعيلي ..يتم بيعه فورا و التخلص منه .. حتي لا يفرح الجمهور المسكين و المغلوب علي امره

 اي لاعب يتفوق و يتألق .. لابد ان يبحث رئيس النادي عن بيعه فورا  و التخلص منه .. و ازاي يكون هناك نجم في النادي و الفريق ... يا  نهار مش باين له ملامح 

اي لاعب له قيمة ... لازم يخرج بره النادي الاسماعيلي  علي الفور .. بفلسفات و كلام فارغ من اي مجلس ادارة و المبررات جاهزة و ماسحي الجوخ  مستعدين و علي اهبة الاستعداد  لتقديم الخدمات .. و بدل ما يكون رئيس النادي بيكره النجم الهداف 1% ... الهتيفة و الجاهزين  بيخلوا رئيس النادي يكره و لا يطيق اللاعب بنسبة 99%              

 ارجعوا الي اي لاعب احرز او صنع اكثر من 8  أهداف .. ستجدوه فورا خارج الاسماعيلي في الموسم التالي .. نتذكر منهم ... جون اوتاكا و تراوري و  محمد فضل و مصطفي كريم و احمد علي و التعيس و  جون انطواي  مروان محسن و نمرة 7  و  الكولومبي كالديرون و لسه الثقيل جاي .. جاي... اتصور انه لا يوجد لاعب واحد من ما ذكرنا اسمائهم اكمل تعاقده مع الاسماعيلي- كله اتباع قبل اوانه  - الا محمد فضل كان علي استعداد يجدد تعاقده لكن  احد اعضاء مجلس الادارة في ذلك الوقت  رفض اعطاء فضلةللشيمات للتجديد و القصة معروفة .... كل لاعب مهاجم أو غيره لازم يباع ...و المبرراتية موجودين ....  و الله ينور يا ريس ..دبست الاهلي في اللعيب يا  ريس .....  و أحسن صفقة في تاريخ النادي يا ريس و ده لعيب ابن كذا يا ريس ....   و هلم جرا

 الخلاصة و النصيحة لرئيس النادي المهندس ابراهيم عثمان ... بقاء النجوم في الفريق هو من سيجعل لك تاريخ في النادي .. و مع بيع النجوم لن يكون لك اي تاريخ في النادي

  نصيحة هامة و غالية و مخلصة لله سبحانه و تعالي .. و الله من وراء القصد   

و الله حي ... و  يناير جاي

  و انتهي  الكلام خارج المقرر