الخرع -الجلف - مخ البسلة ضحكوا علي عثمان

اقسم بالله العظيم انك يا مهندس ابراهيم عثمان صعبان عليه ... و لكن انت اللي أحطت نفسك بمجموعة

من المنافقين و ما سحي الحوخ و جعلوا منك اسوء رئيس نادي في تاريخ النادي الاسماعيلي

المعلم عثمان احمد عثمان  هو افضل رئيس نادي في تاريخ الاسماعيلي علي الاطلاق ...... و نجله ابراهيم عثمان .. هو الاسوء علي الاطلاق .. و يا سخرية الاقدار

 ممكن ان لا يعلم المنافقين او ماسحي الجوخ قيمة  ابن ( المعلم عثمان ) .. لكن ابن المعلم  عثمان .. لا يعرف قيمة نفسه.. دي تبقي مصيبة سودة

ممكن فعلا المنافقين و الاكلين علي كل الموائد .. لا يهمهم الا بطونهم و ما يلهفونه منك .. لكن يا ابن المعلم ... اصحي و فوق و صحصح ... و الا ستخرج من الاسماعيلي خروجا غير كريما علي الاطلاق ... و تجعل الناس ينسوا  اسم المعلم عثمان ... حرام عليك

 يا ابن المعلم يا عم  ابراهيم .. انت جعلت الدراويش فريق و نادي بلا معني و لا شكل و لا طعم و رائحة 

 عاجبك فريق بيلعب بثلاثي هجومي .. اسوء من السوء و احد ناميبي خرع  و مخروع  و مخلع ... و جناح جلف الجلف لا يعرف مهام مكانه .. و مخ البسلة النيجيري اللي بيلعب لعب حوكشة و السلم  و التعبان و تي كا عالعالي و تي كا عالواطي  .. عايزهم يجيبوا جول واحد  ازاي      

الخرع و الجلف و مخ البسلة.. دول اخر نتاج و اخر الصبر ...  من تجارب اوكيكي و ماندوجا و تارو و كمارا و زايد  و لجزيري و كله  فاشل في فاشل ... في تعبير واضح انك يا عم ابراهيم ... فاشل فاشل فاشل  في ادارة شئون كرة القدم و خليتها خل  .. و عك في خط الظهر و عك في حراسة المرمي و عك في عك في كل شئ

 الله تعالي اعطاك هدية في تواجد الكابتن علي ابو جريشة كمشرف علي الكرة ..... لكنك رفضت الهدية و رفستها... و انتظرت ان يرقص حواليك الكدابين و المنافقين اياهم   

طبعا مش حيعجبك الكلام ده .. و الألاضيش حيوصلوا لك علشان يسخنوا لك الطاسة و تزداد عتوا و نفورا و نفيرا كمان

 عايز مثال واحد

في ظاهرة لم تحدث في الاسماعيلي من يقارب 50 سنة  ...  الفريق خاض 27 مباراة و له من الاهداف 26 هدف و عليه 28 هدف

   و الله حرام عليك و  عيب عليك  ... الاسماعيلي يبقي بالشكل المزعج ده بالشكل التهديفي ده ليه

علشان هجومك مكون من ( الخرع و الجلف و مخ البسلة )  و لا يمكن دول يجيبوا هدف واحد في ظل ضعف خط الوسط و صناعة الاهداف و ضياع خط الوسط المهاجم تماما ... و لكن الفشل في شئون كرة القدم ...تحتاج ناس دماغها صاحية و محترمة و مش ديكتاتورية فارغة العقل تماما

 نعطيك مثال

 الاسماعيلي موسم 88/89 احرز 37هدف و دخل مرماه 32 هدف و حصل علي المركز الرابع للمرة الثالثة علي التوالي و كان المعدل التهديفي  متماثل تقريبا

ماذا حدث

 في موسم 90/91 .. احرز الاسماعيلي 47 هدف  و دخل مرماه 8 اهداف فقط

 سامع كويس ..مفتح ودانك كويس .. نقولها تاني ... احرز مهاجمي الاسماعيلي 47 هدف في  مباراة و دخل مرماهم 8 اهداف فقط

عارف ليه

 لان المشرف علي شئون الكرة كان بيفهم و حوله ناس محترمين  عايزه النجاح و التفوق و الفوز .. ليس مثل الذين حولك عايزين يتعشوا و خلاص

الخرع و الجلف و مخ البسلة  .. اضاعوا اهداف لا تضيع ... 19 و 24 و28 و 32 و 50 ... و طول ما هما الخرع و الجلف و مخ البسلة .. لازم الزمالك يسجل و يفوز  و لولا الحارس محمد فوزي ..كان الاسماعيلي شال شيلة تقيلة .. و في المقابل الاسماعيلي غير قادر علي التهديف

توقيت هدفي الزمالك قرب اخر الشوط الاول و في بداية الشوط الثاني ... توقيت يوضح عجز اي ادوات داخل الملعب لهجوم الاسماعيلي عن التهديف ... يبقي لازم نخسر و عادي جدا ان تخسر.. لان اخر صبرنا  من بعداوكيكي و ماندوجا و تارو و كمارا و زايد .... هم  :  الخرع و الجلف و مخ البسلة

 نعلم تماما ان الان بيتم البحث و الدراسة لاقالة  المدير الفني البلجيكي  سيدمير يونافسكي و بقي السؤال فقط متي سيرحل 

طيب السبب في يونافسكي  و الا  انت

طيب هو كان السبب كان في الجزائري مضوي و الا البرازيلي فييرا ...  و الا فيك انت يا مهندس ابراهيم عثمان 

 بجد فكر كويس و حياة رحمة ابوك عندك و عندنا

 انت قاعد ليه في النادي و متمسك بالكرسي ليه وقابل الشتيمة ليه كده ... مش عارف 

علشان تأكل المطبلاتية و المنافقين حواليك .. و تسمع الي طبلهم و مضغ الطعام في افواههم 

 بجد قاعد ايه  و متمسك بالكرسي ليه

 اقول لكم سر بيني و بينكم .. بس خلوا السر في بير

 المهندس ابراهيم عثمان ... اختار و فكر و فكر و درس و خطط ... في مين علشان يمسك الملف الاعلامي في النادي الاسماعيلي ..مؤخرا

 اصدر قرار ان يمسك الملف الاعلامي ... أضعف من ظهر في الاعلام  خلال اخر شهرين

و كفاية كده ... علشان المرارة  

 بس خلاص ..  و البقية في حياتكم       

  و انتهي الكلام خارج المقرر .