فارس عطيتو الكلية رسلان .. و الترمس النيئ

في عهد ابراهيم عثمان الميمون ...مازالت الارقام الزفتية القياسية تتحطم تحطيما و ربنا يوريني

 فيكم يوم ... يا قادر يا كريم بحق دي الايام المفترجة و قدوم شهر كريم 

ارقام قياسية زفتية و اسود من الزيتون  .. تحت رعاية ناظر العزبة ,,, طويل العمر يطول عمره و ينصفه علي من يعاديه من القلة الماجورة و القلة القناوي  المندسة

 الفريق الذي لم يفوز من 10 مباريات  في الدوري و هو حرس الحدود .. يفوز علي الاسماعيلي رايج جاي

وادي دجلة اللي ما عملهاش  و لا كان يفكر يعملها قبل كده .. فاز علي الاسماعيلي رايح جاي و بنصف دستة اهداف   

الاسماعيلي صاحب 11 لقب هداف الدوري ... اضعف هجوم في الدوري 26 هدف و اقل من كل فريق القاع حتي النجوم الهابط 28 هدف

 الاسماعيلي اللي كان و كان و كان ... عليه اهداف - 6  يا خلق هوووووو

اخر 6 مباريات بــ 18 نقطة ... احرزنا نقطتين بس و في عين العدو الناظر 

و باقي لنا 5 مباريات بــ 15 نقطة .. لا تضمن اكثر من 3 نقاط منهم

 عدد مرات هزيمة اقل من الفوز و ثاني اضف خط دفاع و اقل نقاط في عدد المباريات و اقل من هدف في كل مباراة 

الاسماعيلي حيلاعب الاتحاد السكندري يوم 5 مايو في دور الــ 8 .. و حيخرج من دور الــ 16

طيب ... الجماهير عملت الجلاشة ..راق قزايز ميه  و راق قباحة  ..مع سعادة الناظر .. و خد مناعة .. و ما اتعملش الجلاشة  مع اعضاء مجلس الادارة السلاحف الخرسة  

 هو اللي اسمه د.ابراهيم فارس و الا الحاج عطيتو ... و الا اللي اسمه رسلان ...دول واقفين ورا  ابراهيم عثمان .. الراجل اتهري طوب و حجارة و كتابة علي التمثال ...  طيب هما مفيش عندهم  اي احساس  خالص  .... و هم منكدين علي شعب الاسماعيلية كلها و جماهير الاسماعيلي كلهم ... هل ينفعهم صيام رنضان القادم .. و هم لا فائدة منهم و عاملين زي الترمس النيْ ... وجوده زي عدمه

بجد  الاخوة كارامازوف و هما اصلا ليس عندهم كرامة من البداية ... و راضيين يكونوا ظل لرجل فقد ظله ... قاعدين ليه

حتي الاخ خالد فرو المهاجر .. و مصطفي اميرو تشايكوفسكي ... قاعدين و مرتاحين و اتحجبوا في بيوتهم ... طيب  بعدين

المهندس فرو ..كان لما حد بيدوس علي صباعه .. قبل كده ..كان بيستقيل قبل ما يقول ... أي يا صوبعاي

و سعادة مصطفي اميرو .. لو كان الكابتن اميرو في مكانه .. كان رئيس النادي في المستشفي الاميري  .. و اميرو في السجن بتهمة ضرب افضي الموت

 الله يرحمك يا ابو الرجولة ..يا كابتن اميرو  

ناس قاعدين في المجلس و لا لهم  30 لزمة .. و ناس بره المجلس ما لهمش اي  60 لزمة .. و ناظر بيضرب التخين من دول و دول بالخرزانة علي مقعده

و هما فرحانين و فاشخين ضبهم ... و يقولوا كمااااان و كمااااان

الدكتور ابراهيم فارس ... بجد استاد و دكتور ازاي و كان عايز يبقي رئيس جامعة عن طريق التواجد في الاسماعيلي .. ما بقتش رئيس جامعة .. ما تروح بقي ... و تروح تشوف البهائم العشر  و المعييز و زمانهم علي ولادة  

و الاخ عطيتو .. بيعمل اييه بالظبط ...  و الفراخ و البانية و السجق و مفيش أطيب من هيك .. سايبهم ... استقيل و روح شوف  شغلك و رمضان علي الابواب ...  و سيب الادارة و ما فيها ... و خليها تعفن

اما رسلان  و الكلية ... و الاخ تامر حسني .. يا حلاوتكم يا قطاقيطكم .. و انت قاعدين  زي أشرجي المرور في شارع بعد نصف الليل

الف الف خسارة .... و الا علشان يا اعضاء مجلس السلاحف .. ما عندكمشي تماثيل يتكتب عليها  بالاسبراي من المنقي خيار ...  و لسه قاعدين و بتقولوا .. خليهم يتسلوا

 و علشان احنا في شم النسيم ... الناظر ..جاب لنا 3 مدربين  من النوع الفسيخ النبراوي المعتق و من السرير الي الملعب  .. و مسكهم الفريق و لعبوا باحمد ايمن في بك شمال .. بعدما ضيع الدنيا امام وادي دجلة ...  في الباك اليمين .. و الــ  3 فسيخات هما اللي غلطانين .. مش احمد ايمن .. اللي اتسبب في الجول بالدقيقة 29 ... و يعمل ايمن يلعب برجليه الاتنين يعني .. عجايب العجايب

 قلنا بقي جهاز فني جديد معاون .. لكنه طلع متعاون مع طارق العشري ... و اول  ما شوفنا حارس مرمي الحرس كان في الدقيقة 18 .. بالأمارة اسمه السعدني ... و بعدين لم نتمتع برؤيا سيادة حارس مرمي الحرس السعدني  الا د 42  كمان و كمان في د 49 من اول محاولة بجد لفريق الفسيخ  علي المرمي  و كمان بالدقيقة 81 محاولة تانية  ..هما كل اللي أتلعب طوال 97 دقيقة ... غيركده .. فريقنا كان منعنع اخر نعنعة .. موزسيس النيجيري كان ملعلع  اخر لعلعة  و رصيده  8 اهداف  مع انه بياخد تعاقده برتقال  و يوسفي  كل يوم بعد العشا .. لكن شيلونجو بتاعنا عايز 3.5 مليون علشان يبقي في لاسماعيلي .. روح يا شيلونجو .. اللهي و انت جاهي ... يا شيلونجو ..  لا توعي و لا تستوعي ..انت و اللي جابك

و بمناسبة  شم النسيم و الزفارة عند عقل بعض الناس.. شوفوا الحلاوة و البقلاوة في القرارات  

 لما اتغلبنا في الدور الاول من وادي دجلة 3-1 .. تمطع و تنطع سعادة الناظر .. و قال ثورة تصحيح .. و بعدين اطاح بالجهاز الطبي 

و لما اتغلبنا تاني من وادي دجلة 3-0  في الدوري الثاني .. تم اقالة الجهاز الفني المعاون و قاعد يرازي في  المدير الفني البلجيكي سيدومير يونافسكي.... هو ده الاصلاح  يا بحر الزكاوة و ترعة المفهومية و يا فيلسوف الحمير

العملية ضربت من راسها الي ساسها .. و منتظرين كارثة و خراب و ضياع  و لحد ما يتحرك مجلس السلاحف  الخرساء

الله يخلصنا منهم ..بفضله و كرمه .. .. كل ماتش  بقي حرقة دم و تعب و قرف و زهق

و ناس بتحس  و تفهم من لمحة او اشارة ... و ناس ما عندهاش من الاحمر .. و لا نقطة

و زي ما قال الفنان الراحل محمود شكوكو 

 الندل ميت  و هو حي .. ما حد يحسب حسابه

 زي الترمس النيئ ... حضوره زي غيابه

و انتهي كلام خارج المقرر