طريقة لعب المعيز ... لا تحرز اهداف

انتهت مباراة الانتاج الحربي والاسماعيلي بالتعادل السلبي بين الفريقين وهي المباراة الرابعة التي

لا يحرز فيها الاسماعيلي اهداف وهي المباراة العاشرة التي لا يفوز فيها الاسماعيلي محليا  ... ايه السر في كده

السر ببساطة .. ان طريقة لعب المعيز .. لا تحرز اهداف وبالتالي لا فوز ولا يحزنون

الفريق اليوم لعب 38 تمريرة طولية بطول 40 ياردة في المتوسط  - منهم 24 تمريرة في رجل المدافع الخصم و 8 تمريرات افسدها المستلم  4 تمريرات فقط كان لهم نهاية عادية غير واعدة و2 فقط كانت بشكل صناعة فرصة وهما كانوا في د 45  و د 15 فقط

الفريق الاسماعيلاوي عندما يتسلم الكرة في نصف ملعبه بدون ضغط هجومي من المنافس .. ليس امامه الا حلين

 الحل الاول .. هو تمرير الكرة بالعرض بين المدافعين حتي يصل الي نصف الملعب .. او يعيد بالكرة الي الحارس محمد فوزي ابو كلين شيت

 الحل الثانث .. هو تمرير طولي بطريقة ( جري المعيز ) والحق واجري وحلق يا جدع ... ومهاجم الاسماعيلي الكبير الرعديد ( النام ... بيبي ) شيلونجو ... لا بيعافر ولا يشارك علي الكرة العالية الا لو كانت علي الارض ... يبقي ايه اللي بيحصل .. الكرة ترجع علي مرمي الاسماعيلي ... وهلم جري

وبصراحة المهاجم النام ..وشبع نوم .. بيبي ... شيلونجو ... حاجة غريبة في عالم البطيخة المستديرة .. اكتاف ايه وعامل زي الشماعة وفيها بدلة

 من عند المكوجي ... اما مفيش رجلين ولا فكر ولا اي شئ

و مع اننا غير مختصين ولا بنلهف الالف ولا ملايين .. وقلنا من زمان ان الثلث  الاخير من ملعب الخصم .. لا يوجد به صانع او حتي مدرس العاب ... من ساعة ما تمطع

وتقرقع اخونا ابراهيم عثمان وخرب الفرقة وباع نمرة ( 7) ... وجاب لنا 30 لاعب سكة واي كلام وكله هجص في هجص

في الجانب الثاني مختار مختار المدير الفني لفريق الانتاج الحربي لعب علي مواجهة لعب ( طريقة المعيز ) وركز 4 لاستلام الكرات المعيزية والساقطة واعادتها الي الاجناب  و لعب عليها الانتاج  بكفاءه و علي الاجناب و كلها كرات مرتدة من لطريقة المعيزية ..و كان اكثرها خطورة د 31 من الشوط الثاني عندما  انقذ محمد مجدي الكرة و هي في طريقها الي مرمي فوزي .. ولو غنام محمد بالدقيقة 30 استغل كرة معيزية مرتدة .. لسجل الهدف الاول  للانتاج الحربي 

الجهاز الفني للاسماعيلي - مش عارف بقيادة مين ... جابر والا المنياوي والا المنياوي والا جابر .. معذور . ومفيش قدامه الا الطريقة المعيزية في رمي الكور الطويلة .. و بيلعب بطريقة ... اطلق المعيز ترغي في في النجيل .. لا المعيز بتشبع و لا النجيلة بتخلص 

يمكن فيه كرة ضالة مش معمول حسابها .. تدخل جول .. و لكن النوايا اللي اسود من الزيتون عند الديكتاتور ... مش مخليه الكرة تدخل المرمي  و في

الدقيقة 45 ... بامبو رفضان يوقف سيل الدعاوي علي ابراهيم عثمان في شهر رمضان المبارك .. ولو اعطيت الكرة لواحد احول .. كان جابها جول وجول وجول ...لكن النوايا السيئة... بتضرب في فساد الفساد في النادي  ..

 الاسماعيلي وصل الي كام نقطة وهيلاعب مين و مين في ما تبقي من عمر الدوري .. مش مهم كل الارقام دي ... لان اللي بيحسبوها ويفكروا فيها .. خايفين الاسماعيلي يهبط او يدخل في دوامة الهبوط

لكن برضه نحسبها .. الاسماعيلي امامه من المؤجلات الاهلي الاول والزمالك الثالث .... وامامه الجونة الــ برصيد 36 نقطة 11 والداخلية الــ 17 برصيد 27 نقطة

يعني 3 ماتشات في منتهي الصعوبة وماتش صعب ايضا هو في مواجهة الجونة ... يعني برضه .. ان الاسماعيلي يحصل علي كام نقطة من 12 نقطة الباقيين .. نحسبها ازاي  ونشكي لمين و نروح لمين .. منك لله يا عم الديكتاتور وشوية السلاحف اللي حولك

الشئ الطريف ان مذيع قناة كوميدي التي اذاعت اللقاء . كاد ان يبكي و يبكينا معاه علي احوال وارقام الاسماعيلي طوال التعليق علي المباراة .. والطريف ايضا ان الذي ضمن للفريق البقاء في الممتاز - ان شاء الله تعالي - هو المدرب البلجيكي سيدومير يونافسكي .. اللي قلشوه ... و قلشوا جهازه المعاون ...  و كأن اللي بياخذ القرارات في الاسماعيلي  واحد أطبش 

يجعلها من حظكم و نصيبكم يا مجلس السلاحف ....  دعاوي جماهير الدراويش في شهر مبارك 

قولوا امين 

 وانتهي  كلام خارج المقرر