و الخيبة مربعة و الحلو في المزرعة

اظنك زي حالاتي يا سعادة القارئ العزيز ....تعتقد ان خيبة الاسماعيلي ( او

اللي كان  اسماعيلي زمان ) ... هي خيبة مربعة الابعاد

لو الفريق لم يهدف .. من الصعب ان يهدف

و لو الفريق جاب جول ... من الصعب يحافظ عليه

ولو الفريق  اتعادل .. من الصعب ان يسجل تاني و يفوز

و لو الفريق متأخر و لو بهدف .. من الصعب ان يتعادل

ليه .... تعالوا نحسبها سوا ... و واحدة واحدة

 الاسماعيلي لعب 19 مباراة بالموسم المهبب ده .. جاب 17 جول  و دخل شباكه 23 جول .. يعني لا هجوم  و لا دفاع و لا وسط و لا خلف  

فريق كله من ماركة اللاعب ( الكتيان ) ... اللي هو  عارف انه ساقط ساقط ..حتي لو غش الامتحان كله من اشطر طالب يجلس بجانبه 

حالة غريبة من الكأبة والحزن و فقدان الثقة  داخل النادي الاسماعيلي ... مفيش حاجة ممكن تخليك تبتسم و ممكن تنزل دموعك لو عرفت التفاصيل  

و سعادة الناظر ( محترز اخر احتراز ) و قاعد في المزرعة و سايب النادي في ايدين   خلف و تامر و الثلاثة ( مع انهم اتنين ) ... لا بيهشوا و لا ينشوا  الا من غير تليفون نعمل ايه يا سعادة البية  ... اما باقي المجلس السلاحفي ..خلاص سلموا النمر ... و لابسين مع الكمامات,,, طراطير طراطير 

    كما ان عملية ادارة نادي في حجم الاسماعيلي  بجماهيريته و مشاكله و طموحات جماهيره .. محتاجة فدائيين بمعني فدائيين بجد ... مش محتاجة مجموعة خرس بيحكمهم و يتحكم فيهم  واحد اطرش

شكل الفريق كله ... حاجة تغم النفس و تجيب الاكتئاب

 العملية مش عبد الرحمن مجدي و لا باهر المحمدي و لا لاعب تونسي اسمه (الروج ) ... مش زي لاعب تونسي تاني اسمه رفيق كابو في وادي دجلة

 ده الفريق بين من اختار ( الروج او المونكيير ) و بين  من اختار ( مقاتل ) تونسي اخر اسمه كابو ...كاد ان يجيب سكتة قلبية لنا في الدقيقة  94 من المباراة

الاسماعيلي من بداية الموسم و هو بيعاني وسيظل يعاني الي نهاية الموسم و ربنا يسترها معانا .. و ما يفضحناش

 فيه نقطة غريبة جدا جدا .. و نركز سوا

 الفريق بيتمرن كل يوم  و ساعات  مرتين في اليوم

و كل اللي بيوصف المران من مراسلين المواقع بتقول عبارة واحدة هي

واختتم المران بتقسيمة حماسية بين اللاعبين وتوقفت عدة مرات لاصلاح الاخطاء وحرص كل لاعب علي ارضاء و لفت نظر المدير الفني

 يا ليلة سودة يا ولاد .... هي كل يوم العبارة دي فعلا في كل المواقع و صفحات الفيس بوك

وايه النتيجة ... العك اللي بنشوفه ده  .. هي ده النتيجة للتقسيمات الحماسية بين اللاعبين

 الاخطاء هي هيه في كل مباراة و لاعبين جايين من تحت الكوبري بعد ما شموا ( كولة ) و جهاز فني ما لوش فيها ( شوفت التغييرين في الدقيقة 87  يا عزيزة )  وقبلها تغيير الشامي في د 62  اللي ما لمسشي كورة اصلا.. تغييرات فككت كل الصواميل المفككة اصلا  

شفتوا  نسبة التمرير الخاطئ و افشل تمرير و تسليم و تسلم لواحد رجليه الاتنين شمال   و فشل التسديد في الهوا و لا فرح العمدة ...  شفتوا الفضيحة ام جلاجل في التغطية الدفاعية  و الانفرادات  بالجملة للفريق الجلاوي   .... شفتوا الجماهير كانت تتمني ان تمر اخر خمسة دقائق بالتعادل و فين .. في استاد الاسماعيلية 

شوفتوا وصلنا لحد فين ... يا عمنا يا اللي في المزرعة و الباقيين في بيت الزواحف

 الهدف اللي احرزه احمد مدبولي هدف جميل و من تحرك رائع من تمريرة مدحت فقوسة .. لكن بيفضح الجهاز الفني كل الفضيحة ..لانه لم يرتب لاعادة نفس الجملة و لو لمرة تانية .. هي مرة واحدة زي شربة زيت الخروع و مع ان الجهاز الفني عنده حلول في عبد الرحمن مجدي اللي بيموته ببطء ولا زم يخرجه كل ماتش علشان يقول العيب عند مجدي مش عندنا

 الاسماعيلي بيختفي وادارة السلاحف في البلالة خالص ... وجماهيره بقت (فافي ) خالص و بعد ما شالت نعش حسني عبد ربه وهزت مصر علشان عودة الاسطورة رضا ... بقت جماهير مشمش خالص وبتقول سلامتك يا حبيبي يا محمود يا متولي ... وعمري ما حانسي بركات ويا حلاوتك يا ابن النادي 

الاسماعيلي بيختفي وادارته بتطلع لسانها وجماهيره بتتحول الي غازات... بتبقي جماهير ننوسة خالص

 مين يرجع لنا الاسماعيلي وجماهيره .. مين    

قبل ما نختم .... هو كان فيه لاعب موقوف اسمه عمر الوحش .. دلوقتي بقي اساسي وكابتن الفريق ... حد كان عارف ليه و بقي كده ليه ولكنه السمك اللبن التمر الهندي ..طيب حازم مرسي وحش يا ناس .. و  خلي الحلو في المزرعة و الخيبة مربعة 

واللهم لا نسالك رد القضاء ولكن نسالك اللطف فيه   

وانتهي الكلام خارج المقرر