إسماعيلي إس سي - i s m a i l y S C - إرحل يا عثمان و حياة أبوك.. و كفاية فضائح

إرحل يا عثمان و حياة أبوك.. و كفاية فضائح

حجم الخط Decrease font Enlarge font
image

بعد الهزيمة الفضائحية من مصر المقاصة ...من الطبيعي و من المتوقع ان

يتوجه معظم جماهير الاسماعيلي الي مواجهة الكابتن ابو طالب العيسوي المدير الفني للفريق  

و محمد هاشم و محمد صبحي و الكابتن الناميبي بينسون شيلونجو و شكري نجيب  و كمان مروان الصحراوي و محمد عمار و مروان الشريفي و ..... و ..... و كل اللاعبين و الفار و القطة كمان 

 لكن زي ما قلت قبل كده .. ما قدرش علي الزغلول الكبير .... راح يعض في البردعة

طيب مين جاب و تعاقد و بيصرف عليهم ملايين .مين جاب ابو طالب العيسوي ومحمد هاشم و محمد صبحي و الكابتن الناميبي بينسون شيلونجو و شكري نجيب  و كمان مروان الصحراوي و محمد عمار و مروان الشريفي .. و لا لوم علي احد منهم علي الاطلاق 

 ريق الجماهير نشف و لسانهم تدلل عن الحديث عن ضرورة التعاقد  مع حارس مرمي من سنتين و زيادة .. و  حبيب الزغلول بيقول الاسماعيلي ( ليس في حاجة لحراس مرمي ) و مفيش اي فايدة .. الزغلول اللي محمد صبحي مش طايق وشه ... راح جاب محمد صبحي  اللي اللياقة البدنية  عنده كانت تحتاج شهور للعودة الي مستواه .. و حبيب الزغلول - ركبه مضطرا  علي الحارسين محمد فوزي و محمد مجدي .. محمد صبحي ما لوش ذنب .. الذنب هو ذنب الزغلول الكبير

اقل الناس عقلا و ادراكا طالب بقلبي دفاع و باك شمال و باك يمين و مهاجم و صانع العاب .. الزغلول الكبير  رمي بمحمد عمار الصاعد الواعد من الدار الي النار .. هل محمد عمار غلطان و هل له ذنب ... الذنب ذنب الزغلول الكبير 

شيلونجو كان اول المستبعدين و لا له لزمة و لا له طعم و لا لون ... لكن مع الزغلول الكبير و البخيل .. اصبح شيلونجو نمبر وان و  فخر الدين بن يوسف علشان ( سًبل عينيه الملونة ) في الفيديو للزغلول الكبير .. هات فخر الدين تاني يا وكيل.. و صاح الزغلول ( و بحبه يا بابااااا ) بصوت الفنانة نيللي

و طبق نفس الكلام  علي اي لاعب في النادي و الاسماعيلي .. و لا لوم علي اي واحد في الفريق و لا حتي خلف نفسه  .. اللوم كله علي الزغلول الكبير

 لان الزغلول الكبير - يقول لكل من في النادي الاسماعيلي : انا ربكم الأعلي ... و الكل في الاسماعيلي من جنود فرعون  فرحانين  متنغنغيين فلوس و رواتب و سفريات ..... و اراهن ان محمد خلف مسافر المغرب مع الفريق  .. و قبل اي لاعب بالفريق !!!

مش حاتكلم عن الهزيمة الثقيلة و الخيبة التقيلة  من مصر المقاصة .. لان ده شئ متوقع و 1+1= 2  مش 3 .. و اي فريق حيلعب علي الاسماعيلي بخطة ضغط من طول الملعب  حيأكل عيش و يحلي بــ ( ملبن ) علي قفا اللي كان اسمه الدراويش 

و لا حتكلم عن اخطاء عمار و  لا الصحراوي  لا ضعف لياقة صبحي و لا ( فلس ) محمد هاشم و لا فاول احمد مدبولي ( المضحك ) و لا اخونا شكري نجيب ملك الكاميرا شوت .... دي قدراتهم و دي اشكالهم و دي مستواهم

لكن مين جاب كل دول ... مين اللي بيخلي اهدأ مشجع  في جمهور الاسماعيلي .. يقلب هتاف اسكندراني و يجعل العاقل ..مجنون و دماغه مهروش

 هو الزغلول الكبير .. اللي محدش  قادر يقول له تلت التلاتة كام و معاه شوية بهاليل و شخاليل و شخاشيخ .. و الجمعية العمومية - مش في جيبة الزغلول .. لا ده راميها في السندرة و لا بيعبر اهلها ... و هما تعالوا ايها العمال المكافحين و علموا علي اهل الاسماعيلية و جمهور الاسماعيلي ... و خلي واحد منهم  يتكلم او يرفع صوته في الجمعية العمومية .. حيتضرب علي قفاه بالبرطوشة

ماتش المقاصة .. خلص و يا خوفي من اللي جاي ... الاهلي و الزمالك علموا علي اندية المغرب و في قلب و ارض المغرب ... و الكاس باسم ملك المغرب .. و احنا فايزين بهدف ضربة جزاء .. و رايحين المغرب  مع محمد خلف .... كل دي كانت عوامل  كان يجب علي الزغلول الكبير ان ياخد باله و يجعل اللاعبين قادرين علي تحدي تلك النقاط  للدخول في التحدي بالبطولة العربية امام فريق الرجاء بفريق  سيحصل علي 100 مليون جنيه و هي عملية تحتاج عقلية محترمة من الناحية الاقتصادية و الرياضية .. و دي لا تتفق مع عقلية الزغلول الكبير من الاصل كديكتاتور الذي لا يري امامه احد و يعتبرهم أقزام في كل شئ و انه هو وحده المعلم و الناظر و الاستاذ و سواق الاتوبيس كمان

 و بكل أدب و احترام  ... يا مهندس ابراهيم عثمان .. كرامة لوالدك المعلم رحمة الله عليه ... ارحل واترك النادي الاسماعيلي و اجعل جماهير النادي تحتفظبذكري المعلم عثمان احمد عثمان و لا تشوه التاريخ الجميل للمعلم و ذكراه  .. بل انك تمحوه تماما   

المرار كبير و الحزن جليل .. ليس لما يحدث للاسماعيلي .. و لكن لما هو قادم لهذا النادي العريق و الكبير 

و اللهم تعالي .. إسترها مع النادي الاسماعيلي و جماهيره  فيما هو قادم     

 و انتهي كلام خارج المقرر   

جديد إس سي
image

إذهب الي النسخة الجديدة من موقع اسماعيلي اس سي

يرجو موقع اسماعيلي اس سي من السادة متابعي المنتدي الذهاب الي النسخة الجديدة من موقع اسماعيلي اس سي
image

محمد حسن يغيب عن مباراة الزمالك

كتب مؤمن مجدي ...حصل لاعب وسط الاسماعيلي محمد حسن علي الانذار الثالث له اليوم اثناء مباراة الاسماعيلي و الاهلي
image

فوزي الأجمل و الأروع .. يحقق التعادل للمتراجعين

من المعلومات الاولي .. ان ممكن حارس المرمي يحقق التعادل او يحافظ علي التقدم و يصلح اخطاء التشكيل .. لكن مش مطلوب من حارس المرمي انه يطلع يهدف و يجيب جول .. ما أظنش و ما حصلتشي من أيام هيجيتا حارس كولومبيا
image

علشان قلب فوزي أبيض زي الياسمين ..و درجات اللاعبين

بقلم د.اكرام نسيم ... بتفوق غير محدود للحارس محمد فوزي يصلح كل غلطات و التفانين .. و تعالوا نشوف درجات اللاعبين
image

تعادل غير عادل للدراويش مع الاهلي بهدف لكل منهما

بقلم د.اكرام نسيم ... الحكم والڤار يقسوان علي الدراويش
image

تشكيل الاسماعيلي لمواجهة الاهلي

كتب مؤمن مجدي .. اعلن الكابتن ايهاب جلال عن تشكيل الفريق لمواجهة الاهلي و التشكيل مكون
image

الاسماعيلي في مهمة صعبة امام النادي الاهلي

مباراة الاسماعيلي و الأهلي مساء اليوم الأربعاء، ضمن فعاليات الأسبوع التاسع و العشرون من الدوري الممتاز. و يدخل الدراويش مباراة اليوم و هو يحتل المركز الحادي
image

فرمان من البوب بتجميد نادر رمضان بعد توقيعه للاتحاد

اصدر المدير الفنى للإسماعيلى إيهاب جلال فرمان يقضي بتجميد اللاعب نادر رمضان لاعب خط وسط الدراويش وخوضه تدريبات منفردة مع الثنائى محمد هاشم والأنجولى أرى بابل،
image

عماد سليمان: جددنا التعاقد مع فخر الدين بن يوسف لمدة شهر

نفى عماد سليمان، عضو اللجنة الفنية بالإسماعيلي، والمشرف العام على الفريق الأول، الاتفاق مع التونسي فخر الدين بن يوسف مهاجم الفريق، على خوض المباريات المتبقية
image

سليمان يوضح حقيقة التعاقد مع فخر الدين وموقف بابل

صرح عماد سليمان، عضو اللجنة الفنية بالإسماعيلي، والمشرف العام على الفريق الأول، الاتفاق مع التونسي فخر الدين بن يوسف مهاجم الفريق، على خوض المباريات المتبقية
Powered by Vivvo CMS v4.1.5.1