إسماعيلي إس سي - i s m a i l y S C - الاسماعيلي يمرض ... و يمكن ان يموت

الاسماعيلي يمرض ... و يمكن ان يموت

حجم الخط Decrease font Enlarge font
image

سيبكم من الشعارات و محاولة مواساة النفس بكلام معلب ومحفوظ

 والتاريخ بيقول ان النادي الاسماعيلي في طريقه للهبوط
وطبعا المتعصبين .. حيقول لا لا لا ..ما تقولشي كده
الاسماعيلي يمرض و لا يموت
 حاقول لهم ماشي .. اعمل كوباية شاي و تعال
 من خلال التاريخ يمكن التأكيد ان النادي الاسماعيلي هبط الي الدرجة الثالثة من قبل في  1958 و قعد اربعة مواسم   و ايضا  كاد ان يهبط في موسمين اخرين 1953 و 1979 .. بسبب النوايا اللي مش نظيفة من اصحاب الياقات البيضاء او البهوات الفشلة الذين تولوا ادارة النادي الاسماعيلي
القصة كلها هي نتاج ادارات فاشلة ساقطة ديكتاتورية بغيضة  و حللناها كتير
 في عام 1958 – هبط الاسماعيلي و حاول المؤرخون ان يلبسوا القضية الي اللاعبين الذين غادروا الي نادي هيئة القناة  ولكن الاصل ان  ادارة الاسماعيلي وقتها كانت تعامل اللاعبين بالكرباج من سعادة الباشا السابق رئيس النادي اللي فقد صولجانه بعد ثورة 1952 ولم ينفع مع اللاعبين حكاية : سوس فلاح خرسيس
 و لم يتعظ  قبلها نفس الباشا السابق 1953 خربها من بدري و احتجنا معجزة  بالدخول في دورة ثلاثية  مع اندية بور فؤاد و الترام و الغيت مبارتنا الاخيرة مع الترام  و هبط بور فؤاد
سنة 1979 .. الباشا المعلم ساب الاسماعيلي و هام حبا في السياسة و النسب الرئاسي و نقابة المهندسين المصريين و العرب  و الاتحاد الاشتراكي و الحزب الديموكراطي  ... و خبط الدنيا في بعضها و ترك النادي لنائبه بلا صلاحيات و نجينا من الهبوط بعد مباراة المقاولون العرب 4-0 و بمعجزة مازالت جماهير الكرة تتحدث عنها  و اضطر المحافظ الجديد ان يخلع المعلم خلعا 1988 و قبل ما تخرب مالطة باللي حواليها
 من سنة 2016 الاسماعيلي بيتعرض للتجريف و الدمار و الحريق بالنابالم من واحد برضه صاحب ياقة بيضاء  تحمل رأس ..لكن ليس لها مخ او عقل من الاصل  و ظل خلال اربعة سنوات يدمر و يحفر و يشوه و يلخبط و يشخبط و يتلعبط و يعبط ... فكانت النتيجة ما نراه ... و لن يفلح أي كان من انقاذ الفريق من الدخول في دوامة الهبوط و حصد 8 نقاط من 11 مباريات  و اصبحت كل الفرق تعلم علي الاسماعيلي باي شكل او لون
الدور الاول متبقي للاسماعيلي مباريات كلها اصعب من الصعوبة و مع الاهلي و الزمالك و سيراميكا و انبي و اسهلها – ربما - مباراة طلائع الجيش و هو يعني ان الاسماعيلي  - ربما ينهي الدور الاول برصيد 10 او 12 نقطة
و بالدور الثاني – هو اصعب من الصعوبة بكل المقاييس  و لا ندري ما تخبئه الاقدار و الله اعلم ما سيكون .. لكن بالارقام ... الاسماعيلي مريض  و يمكن ان يموت
ما فعله الديكتاتور الناظر الفاشل  طوال اربعة سنوات مع خلف و ابو الليل و سعفان ..دمار في دمار  .. يمكن ترجمته الي الارقام الكارثية التي نراها و ما نراه في الملعب
 شوف تشكيل الفريق واحدة واحدة
 لاعب كان مطرود مرتين للاعارة اصبح هو المهاجم المنقذ و انظروا الي الدقيقة 62 و 27 لتعرفوا قدرات المهجم الرعديد شكري نجيب ولو قعد عشرة سنوات مفيش منه فايدةو لا عايدة
لاعب كان مهمل تماما من العودة للاسماعيلي اسمه فخرالدين بن يوسف – في 48 ساعة عاد الي الاسماعيلي بعدما ( سبل) عينيه الخضراء في فيديو لايف و هام حبا في الديكتاتور الظالم و اصبح لدينا في الملعب ( زرافة ) بيقع علي الارض اكثر ما بيجري عليها
 لاعب كان في اخر خيارات النادي وكان من المستحيل ان نري أي لاعب ( مسح بكرامة الناظر الارض ) في النادي .. اصبح هو الحارس الاساسي للفريق وظهر انه فقد الكثير من اللياقة الفنية والبدنية ولا عيب عليه علي الاطلاق
 لاعب كان في اخر الصف بالبقاء وفي اول الصف للرحيل اسمه شالينجو .. وكان بيدوروا علي بيع له ولو علي اولكس او سوق دوت كوم ... اصبح بينزل المنقذ في الوقت الصعب و انظروا الي الدقيقة 84 و استلامه الكرة منفردا و ضاعت منه و لو  ناشئ  ابن 10 سنوات كان استلمها احسن منه
 لاعب جاء الي الاسماعيلية بالوزن وبالكيلو و ن الجزائر الشقيق وراح يجري عملية تخسيس علشان يلعب باك شمال ولعب وفشل وقعد بره الدكة ومش عارفين يعملوا معاه ايه يمشوه والا يقعدوه والا ينفخوه
و لاعب هنا و لاعب هناك .. كله من فكر الديكتاتور و المطبلاتية اللي منهم الشاورما و ابو الليل و الدولي  و عيش نملة تاكل سكر و بيتي فوور و ميني بار احسن فندق فيكي يا مصر
ولاعب مصاب من سنة ونص ولا كانه الفنان القدير عبد الوارث عسر في عز شبابه وقاعد في القاهرة يتعالج ويروح عند صبحي كابر وفرح بنت الحضري والخضري والفكهاني . لان الكابتن المحمدي مش مقتنع ابدا بالطبيب الباروكي اللي هو مش طبيب اصلا و لا له علاقة بالطب , حتي البيطري منه .. لكن كان مجايب خلف الحبايب ..جاب لكل اللاعبين صرع و ترامادول حقن و بلابيع
نفس الطبيب اللي مش طبيب – مزق عبد الرحمن مجدي مزقا مضاعفا واتاح له يتجوز و يتزف و يرقص وارقصيو زغردي يا للي ما انتش غرمانة و اتجوز يا بودي في نص الموسم و ارقص  يا حضري
ومع الجهاز الطبي العظيم تحول اصابة الشامي من شد عادي الي شد مضاعف في الضامة وحسين السيد اللي جايبينه عن طريق بيت الطاعة ومتمارض وخد اجازة يا حسين بلا كشف او تقرير واخفوا كل ملفات اللاعبين الطبية والطبيب الجديد جاي علي المجهول
واصابة محمود البدري ... انزل كمل يا بدري وبدل الاصابة ما تكون اسبوعين - انزل العب علشان يبقي العلاج شهرين ..حاجة كده هوبا ليصة الليصة 
 حتي الناظر الديكتاتور - صمم انه يستمر لحد ما يشوف ماتش الرجاء المغربي ايه اللي يحصل ما غير مايدعم الفريق و لو ( بصباع محشي ) .. و طلع الناظر خيب الرجاء وخرجت المظاهرات واستغلتها الجزيرة ورصد .. قعدوا الناظر في البيت .. يقشر بصل وفول سوداني ويعجن العجين ويبخر القلل ويحمي الفرن ويترب تحت البهايم
وقبلها الناظر وبهاليله .دخلونا في حارة سد في موضوع ابراهيم حسن وغرامة 25 مليون جنيه وياالدفع يا الحبس .. والليلة مطينة بطين ولو اتخصم مننا 6 نقاط .. حنلاعب الزرقا ونتغلب من كفر الزيات ونتعادل مع نادي شربين
القصة شكلها ترالالي يا لللي يا للي وارقصوا علي جثة النادي الحزين برازيل مصر سابقا
 الناظر و الديكتاتور و المخربين و البهاليل و السلاحف اشتروا الكفن و حضروا القطنة خلاص
 و قضوا علي كل شئ جميل بالنادي .. جعلوها ارض جرداء لا زرع فيها و لا ماء و لا قطران
................ و بعد كل المصايب دي
 تعالي يا حضرة النائب يا اخو الناظر و هات الهر و الغزال و العمدة و الورداني في الوقت بدل بدل الضائع .. الغزال شافها بدري و خلع بشياكة .. و الباقين علشان مفيش لياقة المباريات .. قبل غلق القيد بــ 6 ايام ... كانت عملية ترقيع .... لا يمكن يخرج منها المريض سليم  و خاصة- بعد العملية اللي كانت من غير بنج -  ان رجلين المريض الاتنين طلعوا شمال .. و مناخيره بقت 3 خروم و وبودن واحدة واللسان لازق في قفاه و ايديه الواحدة بقت بصباع واحد
 يلعب الفريق ازاي و هو احول و و أكتع و أهتم و مفيش في بقه سنان و لا لسان  ... و الاتحاد السكندري فاقد لاعب من الدقيقة 44 و اصلا مفيش سيسه ولكن المريض بينهج والزرافة التونسي بتجري في الصحراء بلا هدف ..المهم انه بيقول علي ابراهيم عثمان ... بابا
 كمان الباشا المدرب البوسني .. تشكيلاته غريبة وعجيبة العب يا هاشم علشان تضرب الرقم القياسي في اصابة الجماهير بالسكر و الضغط و الشللل الرعاش  و الاسهال كمان و اقعد يا كاستيلو و العب يا هاشم ما هي مش ناقصاك انت كمان .ما هو اصلا مدرب بوسني .. حيعرف هاشم وغشوميته منين ومنتظرين المدرب البوسني المساعد من البوسنة والعرايشية البلد
اصلا كنا عايزين مدرب مصري ... لا ابراهيم باشا قال هاتوا بوسني و بلاش تبوسني في عينيه  و اجلوا موضوع المدرب  المصري ..لحد ما يعدي ماتشين الاهلي و الزمالك و بعدين ندبح البوسني و مدرب و شيال الاحمال يا سيد و المدرب العام  وبلاش ابو طالب المرة دي هاتوا بداله خروف سمين وقفص تين .. تخطيط مناحم بيجن يا عالم
..........................
صدقوني دي نقاط ..كتبتها بسرعة والضغط عالي واخر نرفزة وقرف من حال الفريق
قولوا لي نادي واحد يتحمل كل ده من العك و التلطيش و التطبيش و فتاوي الألاضيش
 هل ممكن الفريق ده يعيش و لو بخراطيم الدنيا من الاكسجين والكفن متحضر ومترتب في العزبة من 4 سنين
الايام القادمة عايزه – تغييير من الالف الي الياء
 باضافة اسماء قوية الي اللجنة الفنية
وكفاية خبرات الكبار – يساعدوا بخبراتهم فقط وكان في الله في عونهم وعوننا
 لكن هاتوا حسني عبد ربه و محمد حمص و محمد صلاح ابو جريشة
وادخلوا الفريق في معسكر مغلق بالضبة والمفتاح بلا فيس بوك ولا انستجرام  ... زي ما كان بيعمل ( عدي صدام حسين ) 
 غير كده
 نهارنا اسود من قعر حلة الكانون
وربنا يستر من اللي جاي

جديد إس سي
image

إذهب الي النسخة الجديدة من موقع اسماعيلي اس سي

يرجو موقع اسماعيلي اس سي من السادة متابعي المنتدي الذهاب الي النسخة الجديدة من موقع اسماعيلي اس سي
image

محمد حسن يغيب عن مباراة الزمالك

كتب مؤمن مجدي ...حصل لاعب وسط الاسماعيلي محمد حسن علي الانذار الثالث له اليوم اثناء مباراة الاسماعيلي و الاهلي
image

فوزي الأجمل و الأروع .. يحقق التعادل للمتراجعين

من المعلومات الاولي .. ان ممكن حارس المرمي يحقق التعادل او يحافظ علي التقدم و يصلح اخطاء التشكيل .. لكن مش مطلوب من حارس المرمي انه يطلع يهدف و يجيب جول .. ما أظنش و ما حصلتشي من أيام هيجيتا حارس كولومبيا
image

علشان قلب فوزي أبيض زي الياسمين ..و درجات اللاعبين

بقلم د.اكرام نسيم ... بتفوق غير محدود للحارس محمد فوزي يصلح كل غلطات و التفانين .. و تعالوا نشوف درجات اللاعبين
image

تعادل غير عادل للدراويش مع الاهلي بهدف لكل منهما

بقلم د.اكرام نسيم ... الحكم والڤار يقسوان علي الدراويش
image

تشكيل الاسماعيلي لمواجهة الاهلي

كتب مؤمن مجدي .. اعلن الكابتن ايهاب جلال عن تشكيل الفريق لمواجهة الاهلي و التشكيل مكون
image

الاسماعيلي في مهمة صعبة امام النادي الاهلي

مباراة الاسماعيلي و الأهلي مساء اليوم الأربعاء، ضمن فعاليات الأسبوع التاسع و العشرون من الدوري الممتاز. و يدخل الدراويش مباراة اليوم و هو يحتل المركز الحادي
image

فرمان من البوب بتجميد نادر رمضان بعد توقيعه للاتحاد

اصدر المدير الفنى للإسماعيلى إيهاب جلال فرمان يقضي بتجميد اللاعب نادر رمضان لاعب خط وسط الدراويش وخوضه تدريبات منفردة مع الثنائى محمد هاشم والأنجولى أرى بابل،
image

عماد سليمان: جددنا التعاقد مع فخر الدين بن يوسف لمدة شهر

نفى عماد سليمان، عضو اللجنة الفنية بالإسماعيلي، والمشرف العام على الفريق الأول، الاتفاق مع التونسي فخر الدين بن يوسف مهاجم الفريق، على خوض المباريات المتبقية
image

سليمان يوضح حقيقة التعاقد مع فخر الدين وموقف بابل

صرح عماد سليمان، عضو اللجنة الفنية بالإسماعيلي، والمشرف العام على الفريق الأول، الاتفاق مع التونسي فخر الدين بن يوسف مهاجم الفريق، على خوض المباريات المتبقية
Powered by Vivvo CMS v4.1.5.1