فزنا ... بثلاث نقاط ... و ارجع يا صبحي

في البداية الف الف مبروك ..فوز الاسماعيلي علي المصري 2-1 و هوالفوز ..

 الاول من 29 ديسمبر 2020 ,, و من الفوز علي اسوان علي اسوان بهدفين و من 68 يوم بالتمام و الكمال و خسارة 40 نقطة

وحتي لو بقينا في المركز ال 17 و برصيد 14 نقطة ..لكنها دفعة معنوية للفريق و الجهاز الفني و الجماهير .. قبل توقف المنافسات لمدة 21 يوم و من بعدها سنلاقي فريق الانتاج الحربي يوم 1 مايو ..و في وسط رمضان المبارك و في يوم عيد العمال

مباراة عصبية عصيبة وصعبة علي الفريقين الاسماعيلي و المصري .. الاسماعيلي بيبحث عن فوز غائب من ثلاث شهور وزيادة .. و المصري بيبحث عن اللعب مع الكبار في المربع الذهبي ... مباراة فيها فنيات و اخطاء بالجملة و اهداف ملغاة و كوارث سببها عصبية ابناء بور سعيد الباسلة .. بدون داعي علي الاطلاق

و خمسة انذارات للاسماعيلي - محمد عمار و عماد حمدي و عبد الله جمعة و العائد من الاصابة عبد الرحمن مجدي ... و حتي فخر الدين بن يوسف ..كمان انذار

و هدف ملغي للاسماعيلي بالدقيقة 4 من لمسة يد من شكري نجيب - افضل لاعب في المباراة - اي و الله افضل لاعب في المباراة  و هدف ملغي للمصري بلمسة يد ايضا د 48 .. و هدف بنيران صديقة لصالح الاسماعيلي من فتوة  الملعب فريد شوقي و الفار لعب لعب صحيح مع الحكم محمد معروف الاسكافي

وعايزن الحق ... انا كنت علي اعصاب اعصابي - بين الشوطين و خايف خوف  رئيس وزراء اثيوبيا من طيران الرافال ...  و طوال 51 دقيقة و هي عمر الشوط الثاني ... كنت في حالة لا يرثي لها و لا لاي حاجة 

 ليه ..حاقول لكم... بس فيه مقدمة بسيطة

العبرة بالخواتيم.. احسن ما يقال للكابتن سعفان الصغير  نجم حراسة مرمي الاسماعيلي السابق و صاحب تاريخ طويل و محترم  داخل جدران النادي الاسماعيلي .... لكنه ختمها خل الخل بصراحة .. عندما قال قولته الشهيرة : حراسة  مرمي الاسماعيلي ... بخير 

و اتصور ان مقولة الكابتن سعفان الصغير - مسحت كل تاريخه الجميل و المشرف و عليه  العودة والاعتذار بالبونت العريض - لجماهير الاسماعيلي و الي نفسه  في المقام الاول

طيب ايه لزمة الكلام ده دلوقتي و احنا فايزين و مزأططين 

ارجعوا الي الدقيقة 48 .. سيبكم من اللي قبلها و الكرة في العارضة د 9 ... شوفوا الحارس محمد فوزي ... اهدي الكرة الي احمد جمعة - يوم الاربعاء - و لكي يدخل بالكرة الي داخل المرمي بيده ... و لولا الفار - الله يستره -  .كانت حتبقي ليلة سودة

 كمان ارجعوا الي الدقيقة 89  و حبيب خالته محمد فوزي ..تتزفلط الكرة و تتلخبط و يدخل جريندو  البورسعيدي و يسجل هدف المصري

شفت الكورة دي يا كابتن سعفان و اللي كانت حتخلي نصف اواكثر من جماهير الاسماعيلي تخسر حسناتها  كلها لصالح الحارس محمد فوزي و اسرته كلها 

فاكر يا كابتن سعفان  لما قلت في 20 مايو 2020 : قلت قبل كدا محمد مجدى حارس موهوب بينما محمد فوزى حارس مصنوع ولكن بإمكانه تقديم مباريات كبيرة حتى لو عائد بعد فترة طويلة من الغياب، وفوزى مزعلش منى لان كل الحراس عارفين أنى صريح ودوغرى

و كان باقي حديثك  يا دولي الدوغري ,,,عن امكانية بيع باهر المحمدي وحيجيب فلوس قد ايه و مش اقل من بيع محمد عواد .. اللي كنت حضرتك عراب بيعه لنادي الزمالك وختمت وصدقت علي كلام رئيس الاسماعيلي المعزول ابراهيم عثمان ... و طلع لا فوزي مصنوع و لا مجدي موهوب ... وكان كله كلام ليرضي سعادة الناظر    

 عارف في 20 مايو 2020 ..كان الاسماعيلي في شباكه كام هدف كان 24 هدف .. قبل ان يصلوا الي الضعف ..  48 هدف في نوفمبر 2020 و في نهاية الموسم في شباك الاسماعيلي ..في رقم قياسي لم يحدث من قبل في التاريخ

 ..ما علينا .. العبرة بالخواتيم وعلي سبيل المثال هناك لاعبين في الاسماعيلي - تنكروا للاسماعيلي وهربوا منه .. لكنهم الان نجوم شباك عند الجماهير و بسبب انهن تابوا و انابوا و عرفوا قيمة الاسماعيلي و انه النادي الذي انتشلهم من الضياع  في الساحل الشمالي و ما فيه .. واصبح اولئك اللاعبين في منتهي الجمال و الروعة باحاديثهم المنمقة و المحترمة  - عند جماهير الاسماعيلي او الشباب منهم  - علي الاقل

 فعلا اليوم .. اتضحت و اتكشفت عورة حراسة المرمي في الفريق .. و انا لو مكان الحارس محمد صبحي .. اقضي ال 21 يوم في الجمانيزيوم او في الصحراء او في كهف بعيد عن الوجبات الجاهزة.. حتي استعيد اللياقة البدنية والفنية واعود اساسي .. حتي ارحم جماهير الاسماعيلي من الضغط والسكر و شلل الاطفال

بالنهاية الف الف مبروك علي الثلاث نقاط لجماهير الدراويش هارد لك لجماهير المصري و المحترم منها و قدموا مباراة كبيرة لولا العصبية فقط

وفوز للدراويش في وقته .. ويا رب استرها معانا  

           وانتهي الكلام خارج المقرر